1, 2. Jósʼin tsakakó Jesús kʼianga nʼio tsjoake je chjotasonʼnde.

YA KAPÍTULO 8 xi tsʼe Proverbios kui nchja̱ni xi tʼatsʼe kjoachjine, kʼoa jo chjota sʼin síkʼóya. Je kjoachjine jé Jesús tsoyanile kʼianga kjesa faʼaijin i̱ Sonʼnde. Ya Proverbios kʼoatso kʼianga kisinda Niná ngayeje tsojmi, je Jesús yaa tíjnatʼale “joni jngo choʼnda xi nʼio nda síxá”. Nʼiojin tsjoa kisʼele nga tsakʼejnakao Niná kʼianga kisinda ngʼajmi kao Sonʼnde. Tonga je xi ngisa tsjoake koan je Jesús jéní chjotasonʼnde (Proverbios 8:22-31).

² Jósʼin tsakakó Jesús kʼianga nʼio tsjoake je Niná kao chjotasonʼnde. Kʼoasʼin tsakakóní kʼianga jaʼai i̱ Sonʼnde nga kitsjoa kjoabijnachonle kʼoa nga tsakʼasjentjainá xi  tʼatsʼe jée kao kjoabiya (Mateo 20:28; Filipenses 2:5-8). Xi ijngosani, kʼianga tsakʼejna i̱ Sonʼnde, tsakʼaile nganʼiole Niná kʼianga tsakatío kjoaxkón. Kjoaxkón xi tsakatío kʼoati kui bakó nga nʼio tsjoakená kʼoa jmeni xi sʼin nichxin xi jemachrianle.

3. Jméni xi jchaa i̱ kjoaʼmiya jebi.

³ Kʼianga tsakʼejna Jesús i̱ Sonʼnde, kʼoati tsakjákaoni chjota xi tsʼe Chjotaxále Niná (Lucas 4:43). Je Jesús be nga je chjotaxá jebi sitsje jaʼaínle Niná kʼoa nga kʼoendajin tokʼia saʼndani je kjoa xi tjín sonʼnde. Kʼoa je kjoaxkón xi tsakatío kʼianga kitsoyason kui tsakakó nga tsjoake ngatsʼi je chjota. Nʼio mandosinná xi tʼatsʼe jebi. Ánni. Kuinga tsjoáná kjoachoya je kjoaxkón xi tsakatío. I̱ kjoaʼmiya jebi ño kjoaxkón xi tsakatío je Jesús jchaa.

4. Jméni xi koan kʼianga jngo chjota xi tífiʼndojon yaole kiskajin je Jesús.

⁴ Kʼianga títsoyason Jesús jngo ʼnde ki ya jñani Galilea ʼmi. Jngo chjota tsabe xi nʼio táo xi tífiʼndojon yaole (Marcos 1:39, 40). Chjota jebi nʼio tímʼe nga̱ je Lucas, je xi chjinexki koan, kʼoakitso nga ñaki “tífiʼndojon [“ngakjijngo”, TNM] yaole” (Lucas 5:12). Kʼianga tsabe Jesús, chjota jebi tsakasén xkóle kʼoa kitsole: “Señor, tsa meli koaan si̱tsjenái”. Chjota jebi be nga koa̱nle Jesús sindaya. Tonga likui be tsa koa̱nmele Jesús nga sindaya. Ánni. Kuinga je chjotatítjonle je relijión judío tsakʼasjengi je chjota xi tjíofiʼndojon je yaole. Kʼoa chjota jebi jejin nʼio chʼao kji yaole nga kui chʼin tjínle. Tonga jméni xi kisʼin je Jesús. A kʼoati kisikao jotjíosʼín chjotatítjonle je relijión. Jméni xi kinʼiai tsa jilani.

5. Ánni nga koanmesínile Jesús nga kisindaya je chjota xi tífiʼndojon yaole.

⁵ Je kjoatéxomale Moisés kʼoatso nga jngo chjota xi tífiʼndojon yaole tjínnele kʼoakuitso nga chʼin tjínle kʼianga sichriantʼale xi kjaʼaí. Tonga je chjota jebi tochale likui kʼoakisʼin (Levítico 13:43-46). A koanjtile je Jesús. Mai. Tosa koankjaojinle xi tʼatsʼe chjota jebi kʼoa koanmele nga tsakasenkao. Ninga tsín ʼya xi síchriantʼale je chjota xi tjíofiʼndojon yaole, je Jesús koanmake chjota jebi kʼoa kisikao. Kitsole: “Mena katamatsjai”. Kʼoa kjitʼanangi koanndaya (Lucas 5:13). Alikui jao tjínná nga je Jeobá kitsjoale nganʼio je Jesús nga tsakʼéjna kjoaxkón jebi kʼoa nga tsakakó jokji tsjoake je chjota (Lucas 5:17).

6. 1) Jméni xi tokʼoamaná josʼin kisindaya chjota je Jesús. 2) Jméni xi bakóyaná je kjoaxkón xi tsakatío Jesús.

⁶ Kʼianga kitsʼaile nganʼiole Niná je Jesús, nʼio nkjín kjoaxkón tsakatío. Ali tsa tojejin xi kisindaya xi tjíofiʼndojon yaole, kisindayaa chjota xi kjaʼaísa chʼin tjínle. Ya Biblia kʼoatso nga ñaki tokoanxkónle je chjota “nga tsabe nga koan kinchja̱ je xi yo̱ma̱, kʼoa je xi tjíoxkóya ntsja koanndani, koan tsakʼemani je xi chjiʼngé, koan kiskotsenni je xi xka̱” (Mateo 15:31). Nichxin xi tiyoaa ndʼaibi, je chjinexki sakʼoa kui machjénle nga kjaʼaí chjota tsjoá órganole kʼianga ʼya xi sindaya. Tonga je Jesús alikui kʼoakisʼin. Koanle nga tiʼakʼia kisindayani tojñani nga chʼin tjínle je chjota. Saʼnda  koanle kisindaya ninga kjin tjío je chjota (Juan 4:46-54). Jméni xi bakóyaná. Kuinga je rey Jesucristo koaanle kʼoa mele kjoaʼaxin ngantsjai je chʼin. Kʼianga ʼyaa josʼin tsabekon chjota kui bakóná nga skoe̱ma̱ “je xi nangi tíjna kʼoa je xi ma̱ tísíjchá yaole” kʼianga jekjoaʼaí je ʼNdenaxó (Salmo 72:13). Ñaki mele nga sindaya ngatsʼi je xi kjoañʼai tjíofaʼá.

7, 8. Kʼoalasi, jméni xi koan kʼianga kjesa kajinjin Jesús jngo chjota xi tsín ma fi.

⁷ Xi jejaʼato jngo jao sá nga kisindaya Jesús je chjota xi tífiʼndojon yaole, kitjoni ya Galilea nga ki ya Judea nga tosi tonda kitsoyason. Nkjín jmi chjota kinrʼoéle Jesús kʼoa tsabe nga tsjoake koan. Kisinʼio kon je xi kjoañʼai tjíofaʼá kʼoa jngo kjoachoya kitsjoale (Isaías 61:1, 2; Lucas 4:18-21).

⁸ Kʼianga sá nisán, je Jesús yaa ki ya Jerusalén kʼianga tsakʼéjna je sʼuí Paxko. Nkjín jmi chjota fi kʼianga sʼejna sʼuí jebi. Je Jesús yaa ki ya jñani tíjna jngo xjáonandá xi nʼio ʼyale xi tíjna ya tʼain yo̱ngo̱. Yaa tíjna jngo chjota xi yá kjia xi tsín ma fi.

9, 10. 1) Jmé xá kini chjota ya jña tíjna jngo xjáonandá ya Jerusalén. 2) Jmé xi kisʼin Jesús ya xjáonandá. (Chótsenlai sén xi fitsʼiani kjoaʼmiya jebi.) 3) Jmé xi bakóyaná kjoaxkón xi kisʼin Jesús.

⁹ Nʼio nkjín chjota fi jñani tíjna je xjáonandá. Kʼoasʼin koankjainle nga koa̱nndaya je chʼin xi tjínle tsa ya koaisʼenjin nga koa̱ntinya nandá. Síxkónjin chon chjota xi mele nga koa̱nndaya. Tonga nga chjotatsje je Jesús alijme chʼin kisʼele kʼoa alikui xá kini ʼnde jebi nga mele koa̱nndaya. Ánni nga ya kichosíni. Kuinga tsjoake je chjota. Kʼoa yaa kiskajin je chjota xi tsín ma fi. Kʼiaa saʼnda kʼoakjini saʼnda nga kjesa tsinjin je Jesús (tʼexkiai Juan 5:5-9).

¹⁰ Je Jesús kiskonangile chjota xi tímʼe tsa mele koa̱nndaya. Kʼoakitso nga mele tonga nga tsín ʼya xi tjínle xi koasenkao nga koaisʼenjin nandá. Je Jesús kitsole: “Tisotjain, chjoai nijñali, kʼoa tómjain”. Kʼoakisʼin chjota jebi. Kjoaxkón jebi kui síkjaʼaitsjenná jmeni xi jeme kʼoasʼin je Jesús ya ʼNdenaxó. Tonga kʼoati kui bakóyaná nga nʼio tsjoake chjota je Jesús. Kuinga ya kini jñani tíjna xjáonandá nga jé tsakásjai chjota xi nganʼio machjénle. Ñá kʼoati koa̱n chjénngia choa̱le kʼoa kuijnyísjee chjota xi nʼio tjíosíkjaojin jme xi chʼaotjín kjima sonʼnde.

11. Jósʼin ʼyañá nga tsjoake koan Jesús je chjota xi chʼin tjínle.

¹¹ (Tʼexkiai Marcos 5:25-34.) Jngo chjoón xi jetejao nó nga jngo chʼin xi  táo tíjnakao. Jekisikje ngayeje tao̱nle nga nʼio nkjín chjinexki kikonle tonga tongisa táo koan chʼinle. Xi totʼatsʼe chʼinle, ñʼai koanle nga tojo kʼoasʼin tsabexkón Niná josʼín ngantsjai. Tonga nga mele koa̱nndaya kijinle chjotankjín saʼnda nga kicho jñani tíjna Jesús kʼoa kisikao najñole (Levítico 15:19, 25). Kʼoa koanndaya chjoón jebi. Je Jesús tsabení nga nganʼio kitjojin yaole kʼoa kisikʼófayaa kʼoa kiskonangi ʼyáni xi kisikao. Je chjoón ñaki tíbʼatsé nga títsokjón, tsakasenxkónyʼintʼale Jesús kʼoa tsakʼéle najmí ngayeje. Je Jesús bení nga je Jeobá xi kisindaya chjoón jebi. Kuinga i̱ kitsosínile: “ʼNdínaa, kui nga koankjainli, kamandani”. Kʼoakitsole nga tsín tijme xi katasíkjáojinni. Je Jesús tsjoake koan je chjota xi chʼin tjínle.

12. 1) Tojosʼin jetiʼyaa, jósʼin nikjaʼaitsjain ji xi tʼatsʼe Jesús. 2) Jmé choa̱ xi nʼio nda tsakʼéjnaná je Jesús.

¹² Sínʼiojin tokoán kʼianga ʼyaa nga nʼio tsjoake chjota je Jesús kʼoa ngisa je xi chʼin tjínle. Alikui mangóson kao je Na̱i. Je Na̱i kui xi mele nga kʼoasʼin si̱kjaʼaitsjeen nga tsín jme chjíná kʼoa nga tsín ʼya xi tsjoakená. Je kjoaxkón xi tsakatío Jesús kui bakó nga mandosinle xi tʼatsaan kao kjoa xi tjínná. Nʼio bʼe kjoanda nga jngo rey kʼoa jngo naʼmi tíjnaná xi nʼio tsjoakená (Hebreos 4:15). Kʼiatsa tsín chʼin tjínná, tsakui nichxin likui koa̱njinná jomale xi jekjoatse chʼin tjínle. Tonga koaan kʼoasʼiaan jokisʼin Jesús. Ninga tsín chʼin kisʼele Jesús, koanjinle jomale xi kui tjínle kʼoa koanmake (1 Pedro 3:8). Kjuintjenngiaa je choa̱le.

13. Jméni xi bakóyaná xi tʼatsʼe Jesús nga kisikjaʼáyanile je Lázaro.

¹³ Je Jesús nʼio aon koanle nga kjoañʼai tjíofaʼá xi ngikʼa. Tobʼelañá, kʼianga kʼien je Lázaro, nʼio ba koanle Jesús nga kjoaba tjíojin je familiale Lázaro kao miyole (tʼexkiai Juan  11:33-36). Je Jesús be nga sikjaʼáyanile Lázaro, tonga tojo kiskiʼndá. Alikui soa koanle nga kʼoakisʼin ninga chjota tjío. Nʼio tsjoake koan je Lázaro kao familiale kʼoa kisichjén nganʼio xi kitsjoale Niná nga kisikjaʼáyanile je miyole (Juan 11:43, 44).

14, 15. 1) Jmé xi bakó nga mele Jeobá kjoaʼaxin ngayeje kjoa xi síkjaʼákonná. 2) Ánni nga tjínnile kjoandosin je én griego xi “nyʼoákʼen” sʼin jaʼatoya.

¹⁴ Ya Biblia kʼoatso nga kʼoatikjoan Jesús jokjoan je Nʼaile (Hebreos 1:3). Je kjoaxkón xi tsakatío Jesús kui bakóná nga mele kjoaʼaxin Niná tojmeni xi síkjaʼákonná, jolani tsa chʼin, kjoaʼaon kao kjoabiya. Je Jeobá kao Jesús, miyón mani chjota xi jeme sikjaʼáyale. Je Jesús kʼoakitso nga sikjaʼáyale “ngatsʼi xi tjío ya nyʼoákʼen” (Juan 5:28, 29).

¹⁵ Je én griego xi “nyʼoákʼen” sʼin jaʼatoya yaa nroani je én xi “sikjaʼaitsjen” tso. Kʼoa kixi tíjna én jebi, nga̱ je Niná xi nʼio ngʼa tíjna, je xi tsakʼénda ngʼajmi kao sonʼnde, koaanle sikjaʼaitsjen jokjoan koankjoan je xíngiaa xi jekʼien (Isaías 40:26). Kʼoa ali tsa tokuijin nga koa̱nle kʼoasʼin, mele kʼoasʼin. Je kjoafaʼáya xi síkʼaxki̱ je Biblia kui bakóná jmeni xi koa̱n ya ʼNdenaxó.

16. Jmé kjoaxkón xi sa̱tío xi skoe̱ choʼndale Niná.

¹⁶ Kʼiatsa si̱tjosonlee ngantsjai je Niná, koaan kuitjátojin tjínkoaan je Armagedón. Kui kjoaxkón jebi xi nʼiosa tokʼoakoa̱nná xi sʼe̱jna. Kʼoa kʼiaa jchasaa je kjoaxkón xi sa̱tíosa. Tobijbi chjotatsje koa̱n je chjota (Isaías 33:24; 35:5, 6; Apocalipsis 21:4). Je chjota alikui ticho̱tsín koa̱nchjénnile, yánise, muleta, silla de rueda, kʼoa je chjota xi tsín nrʼoé alikui ti aparato kʼoeyani xo̱ño. Je xi kjoaʼatojin tjínkon je Armagedón, jé Jeobá koasenkao nga sʼe̱le nganʼio kʼoa nga nchjá koa̱nkjoan. Kʼoa nʼio koa̱nchjénle jebi, nga̱ je sixá nga ʼndenaxó koa̱n je Sonʼnde (Salmo 115:16).

17, 18. 1) Ánni nga kjoaxkón tsakatíosíni je Jesús. 2) Ánni nga mesíniná si̱tjosoán jmeni xi ʼminá nga koa̱n kuiyoaa ya ʼNdenaxó.

¹⁷ Kʼianga kotʼayajin je kjoaxkón xi tsakatío Jesús, je chjotankjín xi koatio i̱ Sonʼnde ngisasa sʼele kjoachoya nga tsín tichʼin sʼe̱nile (Apocalipsis 7:9). Kjoaxkón jebi kui bakóná jokji tsjoakená je Jesús (Juan 10:11; 15:12, 13). Je kjoamatokon xi tsakakó Jesús kʼoati kui síkjaʼaitsjenná jokji tsjoake Jeobá je choʼndale.

¹⁸ Je sonʼnde xi tiyoaa ndʼaibi, biyañá, kjoaʼaon kʼoa kjoañʼai tjín (Romanos 8:22). Kuinga machjénsíniná je ʼndenaxó. Ya Malaquías 4:2 kʼoatso nga nʼio tsjoa sa̱tío tokoán ya ʼndenaxó nga̱ tsín tichʼin sʼe̱niná kʼoa chjotatsje koaan. Kʼianga kui nikjaʼaitsjeen, jé Jeobá bʼailee kjoanda kʼoa ʼyañá nga ñaki kuitjoson jmeni xi títsoná. Kuinga si̱tjosonsíñá jmeni xi ʼminá nga koa̱n kuiyoaa ya ʼNdenaxó. Nʼio tsjoa sʼená kʼianga ʼyaa kʼianga je kjoaxkón xi tsakatío je Jesús to choa̱ní jmeni xi jeme sʼin kʼianga jekoatexoma.