Jmeni xi chjonangiaa xi tʼatsʼe Biblia
Ánni nga kjoatsʼen tjínsíni
ʼYáni xi koanmele nga kui xi chʼaotjín kʼoakatasʼín je Jesús (Mateo 4:8-10)
Aliʼya xi mele nga tsʼen koa̱n kʼoa tsa kʼoendiso. Je chjota kui xi mele nga ndasʼin. Tonga, ánni nga to taon besíni xínkjín chjota, nga kjoatsʼen tjínsíni kʼoa nga tokui xi tsín kixi kʼoasʼínsíni. Nga nyaon nyaon, tokui sʼejinná nga kui xi chʼaotjín kama. ʼYáni xotísíkao chjota nga kʼoasikji tsʼenni. (Tʼexkiai 1 Juan 5:19.)
A kʼoasʼin kisindaná Niná nga tsʼen koaan. Mai. Kʼianga kisindaná, kʼoasʼin kisindaná jokjoan je. Kʼoasʼin kisindaná nga chjénngiaa kjoatsjoachale (Génesis 1:27; Job 34:10). Tonga kʼoati kitsjoaná kjoandái nga koa̱n ñá chjoéjiaan jme xi mená sʼiaan. Je chjotajchínganá xi títjon koannda alikui koanmele nga Niná kiskenngile kʼoa kui xi chʼaotjín kisʼin. Kʼiaa likui tichjotatsje koanni. Kʼoa kʼianga kisʼele xti, kʼoati kui kisikakinle xi chʼaotjín. (Tʼexkiai Deuteronomio 32:4, 5.)
A sʼe̱ntsjai je kjoatsʼen
Je Niná kui xi mele nga tsínkui kʼoasʼiaan xi chʼaotjín (Proverbios 27:11). Bakóyaná jmeni xi sʼiaan nga nda chjota koaan. Tsa kjuintjenngiaa jme xi tsoná kʼoa chjénngilee jokjoan, tsjoa sʼe̱ tokoán. Ninga tsín kʼoamaná ndʼaibi nga ñaki nda chjenngilee jokjoan Niná, alikui tokʼoakoa̱nntsjai. (Tʼexkiai Salmo 32:8.)
Nʼio tse kjoatsʼen tjín ndʼaibi, kʼoa kuinga títsjoáʼndeni Niná nga jchaa jokji chʼao machon nga kjoatsʼen tjín. Tonga alikui totsjoáʼnde ngantsjai (2 Pedro 3:7-9). Je Sonʼnde jeme ʼndenaxó koa̱n, kʼoa tojé xi nda chjota kʼoa xi sítjosonle Niná koatio. (Tʼexkiai Salmo 37:9-11.)