1, 2. Jósʼin tsoyanile je én xi nyanele ndso̱ko̱ tso ya Escrituras Hebreas.

YA Isaías 66:1, je Jeobá kʼoatso nga yáxilele ma ngʼajmi kʼoa nga je Sonʼnde kui xi nyanele ndso̱ko̱. Kʼoa ya Isaías 60:13 itso: “Kʼoasjejeyaña je ʼnde jña nyane ndso̱koa”. Jósʼin bʼasjejeya kʼoa naskánasíka je ʼnde jñani nyanele ndso̱ko̱ je Jeobá. Kʼoa jméni xi tsoyanile xi kao ñá xi i̱ tiyoaa i̱ Sonʼnde.

² Ya Escrituras Hebreas, kʼianga síkʼaxki̱ je xi nyanele ndso̱ko̱ Jeobá kʼoati kui tsoyanile je yo̱ngo̱ xi kisʼejna ya naxinandá Israel (1 Crónicas 28:2; Salmo 132:7). Yo̱ngo̱ jebi nʼio naskánakisʼe ngixko̱n Jeobá nga̱ yaa tsakʼétsʼoale kʼoa yaa tsakʼasjejeya je choʼndale xi tjío i̱ Sonʼnde.

3. 1) Jósʼin ʼyaxkoán je Jeobá nichxin xi tiyoaa ndʼaibi. 2) Kʼiáni kisʼejna “yo̱ngo̱ xi tsín matsen xi tsʼe Niná”.

³ Jósʼin ʼyaxkoán je Jeobá nichxin xi tiyoaa ndʼaibi. Alikui tijngo yo̱ngo̱ tíjnani jñani ʼyaxkón jokoan nichxin kjoatse. Je Jeobá kui tíjnale ndʼai jngo “yo̱ngo̱ xi tsín matsen”. Jméni xoʼmi.  Kuiní josʼin tjínndajinle Jeobá nga miyole katama je chjotasonʼnde kʼoa nga katabʼétsʼoale. Kʼoa kuinga tjínniná kjoanda jebi nga jetsakʼéchjíntjainá je Jesús. Kʼiáni kisʼejna “yo̱ngo̱ xi tsín matsen xi tsʼe Niná”. Kʼianí nga nó 29 kʼianga kisʼenngindá je Jesús kʼoa naʼmi ngʼajko̱ sʼin tsakʼejnale je “yo̱ngo̱ xi tsín matsen xi tsʼe Niná” (Hebreos 9:11, 12).

4, 5. 1) Tojo tso Salmo 99, jméni xi sʼin je choʼndale Jeobá. 2) Jméni xi chjónangilee yaoná.

⁴ Nʼio bʼailee kjoanda je Jeobá nga tsakʼéndajin josʼin jchaxkoán. Jósʼin bakoá nga ʼyachjiá jebi. Kʼianí nga kʼoaʼmilee je chjota nga Jeobá ʼmi Niná kʼoa nga kisikasén i̱ Sonʼnde je Jesús kʼianga kʼienntjainá. Nʼio tsjoa maná nga tsʼato jin miyón mani je chjota xi tjíobʼasjengʼa je Jeobá nga nyaon nyaon. Nʼio nkjín chjota xi kjaʼaí relijión tjíojin xi kʼoasʼin makjainle nga ya ngʼajmi koai nga jekuiyá kʼoa nga kʼia kʼoasjengʼa je Niná. Tonga ñá ʼyañá nga ndʼainí ndʼaibi kʼoa i Sonʼnde nga chʼa̱sjengʼaa je Niná.

⁵ Kʼianga chʼasjengʼaa je Jeobá, kui timangíntjenngiaa choa̱le je choʼndale Niná xi tsakatio nichxin kjoatse (tʼexkiai Salmo 99:1-3, 5). * Tobʼelañá, je Moisés, Aarón kao Samuel kitsjoanganʼio josʼin tsaʼyaxkón Niná (Salmo 99:6, 7). Nichxin xi tiyoaa ndʼaibi, jao mani jtín tjío xi ñaki tjíojtín nga tjíobʼasjengʼa je Jeobá. Je xi títjon jtín jéní xi ya koai ngʼajmi nga naʼmi koa̱n kao Jesús, kʼoa yaa tjíosíxá ya yo̱ngo̱ xi tsín matsen xi tsʼe Niná xi tíjnale i̱ Sonʼnde. Kʼoa je xi majaoni jtín, miyón mani chjotale, kʼoa “xi kjaʼaí barré” ʼmile koa nʼio tjíotsjoánganʼiole je xi ya koai ngʼajmi (Juan 10:16). Nga jngó jngóñá nga chjónangilee yaoná: “A titsjoanganʼioña josʼin tíʼyaxkón je Niná”.

6, 7. 1) Jméni xi koan kʼianga koanskanni nga jekisʼejna je jtín xi tsʼe Cristo. 2) Jméni xi koan kʼianga nó 1919.

⁶ Je pastro Pablo tongini kʼoakitso kʼianga koatio kʼa xi yátsʼi̱n kuinyale je relijión xi ñaki kixi kʼoa kjoandiso koakoya ya jinjtín (Hechos 20:28-30; 2 Tesalonicenses 2:3, 4). Kjoa jebi kʼiaa kʼoakoan nga kjesa fetʼajin siglo 1 kʼianga jekisʼejna je jtínle Cristo. Kʼoa nʼio ñʼai koan nga tsaʼyale je xi ñaki choʼndale Niná ma. Kʼoa nga jenkjín siento nó jaʼato, je Jeobá jé Jesús kisichjén kʼianga tsakʼéjnatsen ʼyáni je xi ya tjíosíxá ya yo̱ngo̱ xi tsín matsen xi tsʼe Niná.

⁷ Kʼianga nó 1919, kʼiaa tsaʼyale ʼyani xi ya tjíosíxá ya yo̱ngo̱ xi tsín matsen xi tsʼe Niná. Chjota jebi kisindaya yaole kʼianga kʼoasʼin tsabexkón Jeobá josʼin nga mele (Isaías 4:2, 3; Malaquías 3:1-4). Kʼoa kʼiaa kitsʼiani nga kitjoson je sén xi tsabe je pastro Pablo. Kataʼyala jme sén xi tsabe.

8, 9. Jméni “ʼndenaxó” xi tsabe je Pablo.

⁸ Kui nganʼiole Jeobá kisichjén kʼianga tsakakóle Pablo jmeni xi koa̱n nichxin  xi nroaján (tʼexkiai 2 Corintios 12:2, 4, TNM). * Je xi tsabe Pablo “ʼndenaxó” kitsole. Jméni xi ʼndenaxó kitsole. Tochale jan koya tjínni. Xi títjon, je ʼNdenaxó xi jeme sʼe̱jna i̱ Sonʼnde (Lucas 23:43, TNM). Xi majaoni, nga nyʼán kuiyoaa kʼoa nga jtín kuiyoaa ya sonʼnde chjotse. Kʼoa xi majanni, je “ʼnde xi naskáchon xi tsʼe Niná”, xi tsonile, je kjoanda xi tjínle xi ya tjíokao Jeobá ya ngʼajmi (Apocalipsis 2:7).

⁹ Ánni kʼoakitsosíni Pablo nga kui kinrʼoé je én xi tsín tiʼndele chjota nga kuinchja̱. Kuinga tsín tjínnele nga kʼia kuitsoya jmeni xi tsabe. Tonga nichxin xi tiyoaa ndʼaibi, ñá xi choʼndale Jeobá maa, koaan kʼoakʼuínlee chjota jme kjoanda xi tjínná nga naxinandále Jeobá tiyojiaan.

10. A tikuini je yo̱ngo̱ xi tsín matsen xi tsʼe Niná kao ʼndenaxó xi tsín matsen.

¹⁰ Je xo̱n xi nichjén kjitʼaa nchja̱ni tʼatsʼe ʼndenaxó xi tsín matsen. Tonga a tikuini je yo̱ngo̱ xi tsín matsen xi tsʼe Niná kao ʼndenaxó xi tsín matsen. Mai. Tojosʼin jekaʼyaa, je yo̱ngo̱ xi tsín matsen xi tsʼe Niná kuiní josʼin tjínndajinle je Jeobá nga jchaxkoán. Kʼoa je ʼndenaxó xi tsín matsen kuiní nga nyʼán tiyoaa kʼoa nga jtín tiyoaa. Kʼoa jebi kui xi basenkaoná nga ʼyaa ʼyáni xi ya síxá ya yo̱ngo̱ xi tsín matsen xi tsʼe Niná (Malaquías 3:18).

11. Jmé kjoanda xi tjínná ndʼai.

¹¹ Saʼnda tjen nó 1919, je Jeobá títsjoáʼndele je chjotasonʼnde nga je katasíkuinda je ʼndenaxó xi tsín matsen nga katamankjín chjotale kʼoa nga nʼio katasʼejna. Kʼoa ji a tibʼainganʼioní. A ʼyachjíní nga je Jeobá tinixákoai kʼianga tichʼasjejeyai.

12. Jósʼin ʼyañá nga tíbitjoson jmeni xi tso Isaías 60:17. (Chótsenlai sén xi fitsʼiani kjoaʼmiya jebi.)

¹² Jokji tífaʼato nó, nkjín koya jmeni xi tíbʼantjaiyajin ya jinnaxinandále Niná. Kʼoa je profeta Isaías tongini kʼoakitso nga kʼoakoa̱n (tʼexkiai Isaías 60:17). * Je ndsʼee xi sʼa xti kao chjota xi sʼa tjíokotʼaya tsakui nichxin tjín xi tsakʼéyanajmíle jmeni xi tíbʼantjaiyajin ya naxinandále Niná kʼoa tsa maije̱ ya tsakʼéxkia je xo̱n xi nichjén. Tonga nʼio nkjín ndsʼee xi jekjoatse tjíojin naxinandále Niná xi tsabe nga kʼoakoan. Ndsʼee jebi ñaki tjíojngo kon nga je Jesucristo tísíchjén Niná nga tíbándiaale naxinandále. Kʼiatsa kuinyañolee jmeni xi bʼéyanajmíná ndsʼee jebi, ngisa koa̱nnʼiotʼasaa je Jeobá.

13. Tojo tso Salmo 48:12-14, jméni xi sʼiaan.

¹³ Ngatsʼiñá nga tjínnele kʼoéyanajmílee je chjota xi tʼatsʼe naxinandále Jeobá. Kʼianga kʼoasikji chʼao chon i̱ Sonʼnde, tokʼoamaná nga nyʼán kʼoa jtín sʼin tiyoaa kao ngatsʼi ndsʼee xi tjío jngo tjíjtsa Sonʼnde. Kuinga kʼoéyanajmísínilee tʼatsʼe naxinandále Niná kao tʼatsʼe ʼndenaxó xi tsín matsen xi tiyojiaan, je xi sʼa xti kʼoa kao xi sʼa tjíokotʼaya (tʼexkiai Salmo 48:12-14). *

14, 15. 1) Jméni xi tsʼantjaiyajin kʼianga jejaʼato nó 1970. 2) Jósʼin tíbasenkao je naxinandále Niná jmeni xi tíbʼantjaiyajin.

¹⁴ Nʼio nkjín testigole Jeobá xi jekjoatse tjíojin naxinandále Niná xi tjíobe jmeni xi tíbʼantjaiyajin ya jinnaxinandále Niná.  Tobʼelañá, tsabe nga nichxin kjoatse tojngo mani xi tsakándiaale nga jngó jngó jtín, nga tojngo koanni xi tsakándiaale nga jngó jngó sucursal kʼoa nga tojngo chjota tsakasentítjonle je oficina xi tíjnatítjon xi tsʼe Sociedad Watch Tower. Ninga tsakatio xi tsakinyakao ndsʼee jebi, tonga tojngo koanni xi kʼoakitso josʼin tjínnele koa̱nxá ya jinjtín, ya sucursal kao ya oficina xi tíjnatítjon. Kʼianga jejaʼato nó 1970, kʼiaa kisʼendajin nga jngo jtín xi chjotajchínga sʼin tjío kʼoakuitso josʼin koa̱nxá. Nichxin xi tiyoaa ndʼaibi, nga jngó jngó jtín jngo jtín mani xi chjotajchínga sʼin tjío xi bándiaale je jtín, nga jngó jngó sucursal jngo Comité xi tsʼe sucursal tíjna kʼoa je xi tjíobándiaale je testigole Jeobá jngo tjíjtsa Sonʼnde jngo jtín mani xi chjotajchínga sʼin tjío xi ya koai ngʼajmi kʼoa jéní xi Cuerpo Gobernante ʼmi.

¹⁵ Kʼianga kʼoasʼin tsʼantjaiyajin nʼio tsakasenkao je naxinandále Niná. Nga̱ kui kʼoakoanni nga ngisa nda majinná ndʼaibi jmeni xi tso je Biblia. Je naxinandále Niná nʼio basenkao nga tsín tsa tojngo chjota kʼoatso ndʼaibi jmeni xi ma. Tosa tsjoánganʼio ngatsʼi je “kjoatjao” xi kitsjoa Jeobá, xi tsonile, je xi chjotajchínga sʼin tjío, nga jme xi sʼendajin (Efesios 4:8; Proverbios 24:6).

16, 17. Ngayeje jmeni xi chriansʼa tíbʼantjaiyajin naxinandále Niná, jméni xi ngisa nʼio tsjoachai, kʼoa ánni.

¹⁶ Kataʼyala kʼaa jmeni xi tíbʼantjaiyajin naxinandále Niná jokji nga tífaʼato nó. Tobʼelañá, je xo̱n xi nichjén nʼio naskásʼin matsen kʼoa kui nchja̱ni je kjoa xi tjín sonʼnde ndʼaibi. Kʼoati tinichjén je ki̱cha̱ xi sʼa kjimatsen nga tiʼmiyasoán. Kʼianga tíjnaná ya Internet je pájina jw.org nʼio nkjín chjota xi tíbʼaile nganʼio xi machjénle. Ngayeje jmeni xi tíbʼantjaiya jinnaxinandále Jeobá kui xi bakó nga tsjoake Jeobá je chjota kʼoa nga mandosinle.

¹⁷ Kʼoati ʼyachjiá jmeni xi tíbʼantjaiyajin ya kjoajtínná nga ngisa tjínná nichxin nga chotʼayá nga toñá kʼoa tsa kao familianá. Kʼoati  ʼyachjiá jmeni xi tíbʼantjaiyajin je kjoajtíntse xi satíoná. Sa kjimandaya sa kjimandayaa nga tífaʼato nó. Kʼoati ʼyachjiá jmeni xi ʼmiyaná ya skuela xi kʼoasʼin satío. Ngayeje jmeni xi tíbʼantjaiya kui xi bakó nga Jeobá tíbándiaale je naxinandále kʼoa nga sa naská sa naskásʼin katasʼejna je ʼndenaxó xi tsín matsen xi tiyojiaan.

18, 19. Jósʼin kʼoainganʼioá nga naskánasʼin katasʼejna je ʼndenaxó xi tsín matsen.

¹⁸ Je Jeobá jngo kjoanda títsjoáná nga tibʼainganʼioá nga naskánasʼin katasʼejna je ʼndenaxó xi tsín matsen. Jósʼin kʼoainganʼioá. Jngo koya josʼiaan kuinga kao kjoatsjoa kʼuínyasoán kʼoa koakoyalee Biblia je chjota. Kʼianga ʼya xi binyakoaa nga testigole Jeobá katama, ngisa kjimatsesa je ʼndenaxó xi tsín matsen (Isaías 26:15; 54:2).

¹⁹ Ijngosa koya josʼin nga kʼoainganʼioá nga naskánasʼin katasʼejna je ʼndenaxó xi tsín matsen kuinga chʼa̱sjee nganʼio nga si̱ndayaa je yaoná. Tsa kʼoasʼiaan kui xi koasenkao je chjota nga sichriantʼale naxinandále Niná kʼoa nga koa̱nmele skoe̱ xi tʼatsʼe Jeobá kao tʼatsʼe Jesús. Je xi ngisa kuenta sʼín je chjota kui jonʼia ali tsakuijin je kjoankjíntokon xi tjínná.

20. Tojo tso Proverbios 14:35, jméni xi sʼiaan.

²⁰ Alikui jao tjínná nga nʼio nda sʼele je Jeobá kao Jesús nga tjíobe jonaskásʼin tíjna je ʼndenaxó xi tsín matsen xi tiyojiaan. Kʼoa ñá kʼoati tsjoa maná nga bʼainganʼioá kʼianga ngisasa nda katasʼejna. Tonga ngisa titsjoa sʼe̱ngáni tokoán kʼianga naskánasi̱choaan je sonʼnde, nga ʼndenaxó si̱koaa. Proverbios 14:35 kʼoatso nga je rey nʼio tsjoa male kʼianga chjine je choʼndale. Kuinga chjine katamasíñá kʼoa chʼa̱sjesíñá nganʼio nga sa nda sa nda katasʼejna je ʼndenaxó xi tsín matsen xi tiyojiaan.