XI NGISA TÍNCHJA̱NI REBISTA JEBI: JÓSʼIAAN NGA TSÍN NʼIO SI̱KJÁOJIAAN
Nʼio síkjáojin xi tʼatsʼe familiale
Je Janet itso: “Tochoatse jaʼato nga jekʼien je nʼaina kʼianga kʼoakitsona je xʼinna nga kjaʼaí chjoón jetjínle. Kʼoa nga ki, saʼnda tsín jokitsonajin. Tsakʼaa najñole kʼoa tojin kisikatíonajin kao nga jao ʼndíxtina”. Ninga kisokoxále je Janet, tochoa njele kʼoa likui koansonnile tao̱n. Tonga ali tsa tokuijin tao̱n xi ñʼai koanle. Je Janet itsosa: “Nga kʼoasikji nʼio kisikjáojian nga toʼansa kjinena ngayeje je xá, ñaki chan kichobena. Nga tsín kʼoakoanna nga kʼoakjoan tsojmi kitsjoale ʼndíxtina jokjoan xi tsjoále ʼndíxtile je xi kjaʼaí chjota, joxi an kisʼena jée koanna. Kʼoa ndʼaibi tojo makjáojinna josʼin síkjaʼaitsjen xi tʼatsainjin xi ngikʼa. Tsakui nichxin kʼoasʼin síkjaʼaitsjen nga an kisʼena jée nga kʼoasʼin ki xʼinna”.
Janet
Je xi basenkao Janet nga tsín nʼio síkjáojin kuinga bʼétsʼoa, kʼoasʼin ngisa machriantʼasale Niná. Itso: “Kʼiaa nga jemanjio nga ngisa nʼio sikjáojian. Nga jejñá machon tokui ngotjo ngosá fiyani jkoa je kjoa xi tijnajian. Tokui xi basenkaona nga ma bajnafe nga bʼetsʼoa kʼoa nga je Biblia bʼexkia. Jngo testo xi nʼio tsjoake̱ jotso kuiní Filipenses 4:6, 7, jñani tso: Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno. Jekjoan nkjín kʼa nga ñaki bʼetsʼoa bʼajnda nitje̱n, kʼoa ñaki tsen kjimana nga je Jeobá síkinjenyʼánjin kjoafaʼaitsjenna”.
Kʼianga tsakakóya Jesús ya jngo jko̱nindo kui kinchja̱ni xi tʼatsʼe kjoabʼetsʼoa, kʼoa kui kʼoakitso jmeni xi nʼio tsjoánganʼioná kʼianga nʼio nikjáojiaan. I kitso: “Je Nʼaino be ngayije xi machjénno, tongini nga nijáo” (Mateo 6:8). Tonga je Niná kui xi mele nga si̱jélee xi machjénná. Kʼoa je kjoabʼetsʼoa kui xi nʼio basenkaoná nga machriantʼalee je Niná. Jósʼin bichótsjoá nga kʼoanʼia. Je Biblia itso: “Je [Niná] sichriantʼano nga jon” (Santiago 4:8).
Salmo 65:2). Kuijin nga kʼoakitsonile Jesús je chjotale nga “machjén nga kʼoétsʼoantsjé” (Lucas 18:1). Si̱jélee ngantsjai je Niná nga katabándiaaná kʼoa nga katabasenkaoná, kʼoa ñaki kʼoakʼoé tokoán nga tsjoáná jme xi kanijélee. Likuikʼia jao katasʼe tokoán nga mele koasenkaoná je Niná. Tsa ntsjaintsjai kʼoétsʼoaa, koakoñá nga je Niná ninʼiotʼaa kʼoa nga makjainná xi tʼatsʼe (1 Tesalonicenses 5:17).
Tonga ali tsa tokuijin nga kʼoétsʼoañá nga kʼoéyanajmílee Jeobá jme kjoa xi tibitjatojiaan. Mani nga je Jeobá xi nrʼoé je “kjoabʼetsʼoa”, jé síkuinda je chjota xi je sínʼiotʼa (JÓSʼIAAN NGA ÑAKI KATAMAKJAINNÁ
Kʼianga koa̱nkjainná xi tʼatsʼe Niná machjénní nga nda kataʼyaa (Juan 17:3). Kʼianga chotʼayá Biblia kʼiaa ʼyaa jokjoan je Niná kʼoa josʼin síkjaʼaitsjen. Tobʼelañá, ʼyañá nga mandosinlee nga jngó jngoá. Tonga alikui tsa tochoajin xi tjínnele jchaa xi tʼatsʼe Niná, machjénní nga nda kataʼyaa, nga ñaki miyo ndaná katama. Si̱kjaʼaitsjenla joma kʼianga jngo miyo sʼená, tse bichómani nga ñaki miyo ndaná ma. Kʼoakjoánti ma je kjoamakjain xi tjínná xi kao Niná, sa nʼio sa nʼio matajasa kʼianga ʼyaa xi tʼatsʼe, kʼianga kʼoanʼia jme xi sasénle kʼoa nga ʼyaa josʼin basenkaoná (2 Corintios 10:15; Juan 8:29). Kui kjoamakjain tjínle je Janet kʼoa kui tíbasenkao nga tsín nʼio síkjáojin.
Je Janet itso: “Nga tiʼbe josʼin tíbasenkaonajin Jeobá sa kjimataja sa kjimatajasa kjoamakjainna. Nʼio chʼao koantʼainjin kʼoa saʼnda kʼoasʼin kinikjaʼaitsjainjin nga tsínkʼia tinda kuiyonijin. Nga kjoa kitjatojinjin nkjín kʼa tsakʼetsʼoa kʼoa je Jeobá tsakasenkaonajin, ninga tsín koanchoyana josʼin koasenkaonajin. Kʼianga tsjoale kjoanda kui sikjaʼaitsjenjian ngayeje josʼin tsakasenkaona. Je Niná basenkaoná ngantsjai, kʼoa sakʼoaa nga kʼiakjoan nga kjoa tibitjatojiaan. Je Niná kʼoati nkjín miyo xi ñaki nda títsjoána, je ndsʼe kao tichja xi ngóson sʼin makjainnajin, xi tjíonda nga binyakaona kʼoa xi nda choa̱ batíole ʼndíxtina. *
”Jemachoyana ndʼaibi ánni nga kʼoatsosíni Jeobá ya Malaquías 2:16 nga jtike kʼianga tsjion xínkjín xi jekabixan. Je xi ngisasa nʼio síkiʼaon je chjota kʼianí tsa sichajngi je chjoónle kʼoa tsa xʼinle. Ningalani jenkjín nó jejaʼato, sakʼoaa toʼan tijna mana. Kʼianga kʼoamana tosa tjín xi basenkoa, kʼoasʼin chajinnina jokji aon tjín tokoan”. Kʼianga kʼoasʼín je Janet kui fitjenngi jotso je Biblia nga tsín koa̱n toñá chʼaa yaoná (Proverbios 18:1). *
“Je Niná, Nʼaile mani je xi jchʼa̱n kʼoa jé basenkao je yánchjínkʼan.” (Salmo 68:5)
Je Janet itsosa: “Je xi ngisa tsjoánganʼiona kuinga tiʼbe nga je Niná Nʼaile mani je xi jchʼa̱n kʼoa jé basenkao je yánchjínkʼan. Je Niná nikʼiajinla tsjiónkonnajin jokisʼin tsa je xʼinna” (Salmo 68:5). Je Janet bení nga tsín tsa kotʼayakaoná je Niná. Je Niná tosa tsjoáná je kjoachjine xi machjénná kʼoa kao “je nganʼio xi nʼio tse” ánni nga tsínkui sikinjesíniná je kjoanikjaojin (Santiago 1:5, 13; 2 Corintios 4:7).
Tonga kʼiatsa kui nʼio nikjáojiaan nga xkón tiyoaa, jósʼiaan.
^ párr. 9 Yaa yʼangini ya 1 Corintios 10:13 kao Hebreos 4:16.
^ párr. 10 Tsa mesali jchai xi tʼatsʼe josʼiaan nga tsín nʼio si̱kjáojiaan, chótʼajin je kjoaʼmiya xi fitsʼiani ya rebista ¡Despertad! xi tsʼe julio de 2015 ya jñani tso “Recupere el control de su vida”. Kʼoati faʼaitʼa ya www.pr418.com.