Je Paul, xi jao ma xtile, itso: “Kʼianga nʼio tsakin tsojmi ya naxinandánajin, tochoasa tsojmi xi ma chine kisʼe kʼoa nʼio chjí koan. Nʼio nkjín kʼa nga nkjín ora tsakinyandiaijin nga tsangínkindaijin tsojmi, tonga toje lijme xi titjínni nga jebʼakaonajin. Je chjota ñaki jeto nindasa koankjoan kʼoa ngaʼi̱ ngaján koanʼinda ya ʼnyo kaye. Sasa tsakinni je tsojmi xi nʼio machjén kʼoa miyón kisʼejna chjíle, kʼoa nga tsakinsa, jmi miyón kisʼejna chjíle; kʼoa tochan lijme tichjí koannile je tao̱n xi machjén ibi. Ñaki kisicha tsjetsjeña tao̱n xi tíjnatjaona ya banco, kao xi tsʼe segurona kʼoa kao pensiónna”.

Je Paul koanchoyale nga tjínnele skósonnile jme xi sʼin kʼianga tsín kjinrá kuiyá je familiale (Proverbios 3:21). Itso: “Ninga xá kiskotʼayaña nga lʼí bʼenda, tijnandaña nga kʼoasʼian tojme xáni ninga nʼiosa choa kuinje̱na. Tjíokʼa chjota xi to tsojmi xi ma chine kʼoa kao xi machjén ya yaniʼya kitsjoana. Kʼiatsa ño ndo̱jo̱ tsjoána, jao kjoe kʼoa jao batena. Kʼoa chan ñachan koansonni xo̱ʼnda̱ʼndína kʼoa an kisijchá. Nga jekoantsian, tsakatenaña kʼoa ngi jan siento tsakatse. Kʼoa ñandia nga ñachante xo̱ʼnda̱, jao chʼá skoa̱nnajmé xi ñachante kilo tjínle kisikʼóntje. Nʼio tse koanle skoa̱nnajmé jebi, kʼoa kui tsakichijin je familiana kao xi kjaʼaísa familia”.

Je Paul kʼoati be nga kui xi ngisa chjíle nga je Niná ninʼiotʼaa yaoná. Je Niná basenkaoná kʼianga nitjosonlee. Kʼoa je Jesucristo kʼoakitso nga tsín toxkia si̱kjáojiaan nga kjoásjee je tsojmi xi biyochonñá, kitso: “Je Nʼaino bení nga machjénno je kjoabi” (Lucas 12:29-31).

Tonga xi tokʼoamaná kui jmeni xi tísʼín je Na̱i, kontrale Niná. Kjimale nga tíbʼanachale chjota nga kʼoasʼin katasíkjaʼaitsjen nga je xi ngisa chjíle kuinga kui katasʼená tsojmi xi tjín sonʼnde. Je chjota nʼio síkjáojin nga so̱kole jmeni xi machjénle kʼoa kao jmeni xi mele nga sʼe̱le. Kʼoa ñaki síkʼienjin xá yaole tojoni nga so̱kole jmeni xi saʼnda tsínni machjénle.  Kʼoati tjío chjota xi toxkia mjétʼain tao̱n yaole kʼoa kʼiaani be yaole nga “je xi síjékinya choʼndale mani je xi kasíkinyale” (Proverbios 22:7).

Tonga tjínkʼa chjota xi tsín nda kosonnile josʼín. Je Paul itso: “Nkjín chjota ʼbexkoan xi kisikatío familiale kao miyole kʼoa tʼaxin naxinandá ki, nga̱ kʼoasʼin kisikjaʼaitsjen nga ngisa nda koatio. Kʼoa nga tojaʼasʼenché ya naxinandá jñani ki, likui kisokoxále. Tsakatioʼmale je polisía kʼoa sakʼoaa toya ʼnyo kaye tsakjayofe. Alikui je Niná kisinʼiotʼa nga je koasenkao. Tonga jinjin, jtín tsakiyuijin ya yaniʼyanajin kʼoa koan kitjatojinjin kjoañʼai jebi kao nganʼiole Niná”.

Je Paul itsosa: “Je Jesús i̱ná kitso: Ali bʼexkónjinlao yaono xi tʼatsʼe nyaon, nga̱ nyaonli sʼe̱no kjoa xi kʼoéxkónnilao yaono. Katamanile jngójngó nichxin kjoañʼaile. Nyaon nyaon tsakʼetsʼoale Niná kʼoa tokui kisijéle xi kuiyochonnijin nga jngó jngó nichxin. Kʼoa je Niná kitsjoanajin xi tsakiyochonnijin, tojo kitso Jesús. Kjoaixi nga sakʼoa likui kui kisokonajin xi ngisa tsjoachaijin. Tobʼelañá, ñandia tsakasenndiaa jñani tjín xi tísaténa ninga tsín ʼbe jmeni. Nga jetsʼakaona, yogurni tísaténa. Tonga an ñaki tsín tsjoake je yogur. Tonga nga ma chine, kui kichinaijin. Nʼio tsjoale kjoanda je Niná nga tsínkʼia totsakjayonchjan je familiana jokji tse nga kjinrá kisʼe. *

”Jelikui tinʼio ñʼai chonninajin tao̱n ndʼaibi. Je kjoa xi kitjatojinjin kui tsakakóyanajin nga je Jeobá * nʼio si̱nʼiotʼaa, ánsíni nga tsín je kjoanikjaojin sikinjeniná. Tsa kʼoasʼiaan josʼin mele, jé koasenkaoná. Kui kjoanda tísʼenajin xi tso ya Salmo 34:8, jñani tso: Chótʼao kʼoa kataʼyao nga nda chjota je Jeobá; tsjoa tjínle je chjota xi je sínʼiotʼa. Alikui tinʼio makjáojinninajin xi tʼatsʼe tao̱n ninga kui kjoa kuitjátojin ijngokʼaijin.

”Je xi machjénná nga kuiyochoán kui tsojmi xi chinee, ali tsa tao̱njin kʼoa tsa xájin. Ñaki jemená nga katafaʼai je nichxin nga kuitjoson én jebi: Nʼio sʼe̱ tsojmintje i̱ sonʼnde. Tonga ndʼaibi, koaan kʼoéjngoaa tokoán tsa tjínná xi tichinee kao najño xi chʼakjá. Itso kjoafaʼaitsjen xi tsjoá je Biblia: Kʼoasʼin tiyo ali kjoanyinájin nimetakon. Tʼejngo takon kao xi jetjínno, nga̱ Niná kʼoakitso: Likui xin koatejnale, nitsjionkonjinle. * Je én jebi nʼio tsjoánganʼioná.”

Kʼianga kʼoaiʼndee nga je Niná katabándiaaná jokisʼin tsa je Paul kao familiale, tjínnele nga nʼio taja katasʼejna kjoamakjainná (Génesis 6:9). Ninga jetse kjoañʼai tibitjatojiaan ndʼaibi xi tʼatsʼe tao̱n, kʼoa ninga skan kuitjátojiaan kjoa jebi, nʼio chjíle xi bakóyaná je choa̱le Paul kʼoa jme xi kisʼin kʼianga kjoa jaʼatojin.

Tonga jósʼiaan kʼiatsa nʼio nikjáojiaan xi tʼatsʼe familianá.