1, 2. 1) Jñáni tsabexkón Niná je choʼndale nichxin kjoatse. 2) Jósʼin tsabekon Jesús je yo̱ngo̱ xi kisʼejna ya Jerusalén. 3) Jméni xi chótʼayá i̱ kjoaʼmiya jebi.

NICHXIN kjoatse kʼoa kao ndʼai, je choʼndale Niná tjínle ʼnde jñani bexkón Niná. Tobʼelañá, je Abel tsakui nichxin jngo sonxta kisichjén kʼianga kitsjoatʼale tsojmi je Jeobá (Génesis 4:3, 4). Je Noé, Abrahán, Isaac, Jacob kao Moisés kʼoati sonxta kisichjén (Génesis 8:20; 12:7; 26:25; 35:1; Éxodo 17:15). Kʼoa je Jeobá kʼoakitsole je chjota israelita nga jngo ndʼianajño katabʼénda jñani skoe̱xkón (Éxodo 25:8). Xijekoan, kʼoakitsole nga jngo yo̱ngo̱ katabʼénda (1 Reyes 8:27, 29). Kʼianga jekitjoni ya Babilonia je chjota israelita, yaa jña sinagoga ʼmi tsakatiojtín (Marcos 6:2; Juan 18:20; Hechos 15:21). Kʼoa je chjotale Cristo xi títjon tsakatio ndʼia kisichjén jñani tsakatiojtín (Hechos 12:12; 1 Corintios 16:19). Nichxin xi tiyoaa ndʼaibi, ñá xi testigole Jeobá maa yaa biyojtián jñani tjío Ndʼia jña chotʼayá kʼianga ʼyaxkoán Niná. Ndʼia jebi jmi mani kʼoa tjío jngo tjíjtsa Sonʼnde.

² Je Jesús nʼio tsabexkón je yo̱ngo̱ xi kisʼejna ya Jerusalén. Kʼianga tsabe je chjotale nga nʼio tsjoake koan Jesús je yo̱ngo̱, kui jaʼaitsjenle nga i̱ tso én xi tongini kichji: “Nga̱ nʼio  tsjoake̱ niʼyali, kuinga machi̱ni̱keña” (Salmo 69:9; Juan 2:17). Alikui ndʼiale Jeobá ma ndʼaibi je Ndʼia jña chotʼayá joni je yo̱ngo̱ xi kisʼejna ya Jerusalén (2 Crónicas 5:13; 33:4). Tonga tjínnele nga jchaxkoán, nga̱ yaa ʼyaxkoán je Jeobá kʼianga biyojtián. I̱ kjoaʼmiya jebi kui chótʼayajiaan jotso je Biblia josʼiaan kʼianga ya tiyoaa ya Ndʼia jña chotʼayá, josʼin si̱kuindaa kʼoa josʼin kʼoainganʼioá nga nkjínsa katasʼenda. * (Tʼexkiai nota.)

3-5. 1) Jmé xi ma ya Ndʼia jña chotʼayá. 2) Jósʼin jchatokoán je kjoajtín xi satíoná.

³ Ya Ndʼia jña chotʼayá yaa ʼyaxkoán je Jeobá. Je kjoajtín xi satíoná jngo kjoatjao xi tsʼe Niná. Ánni. Nga̱ kui xi basenkaoná nga ngisa mamiyosaa je Jeobá. Kʼianga satío je kjoajtínná yaa tsoyaná kʼoa tsjoánganʼioná je naxinandále Jeobá. Kʼianga mangián kjoajtínná joxi kuini tibichaa jmeni xi títsjoáná Jeobá kao Jesús nga xki̱ xomana. Kʼoa nʼio tse kjoanda tjínná nga ya biyotʼá “yámixa̱” xi tsʼe Jeobá kao Jesús (1 Corintios 10:21).

⁴ Je Jeobá kʼoatsoná nga tjínnele kjuian je kjoajtín xi satíoná kʼianga jchaxkoán kʼoa nga si̱nʼiojiaan xíngiaa (tʼexkiai Hebreos 10:24, 25). Nga ʼyaxkoán je Jeobá alikui nichaa je kjoajtín xi satíoná, tokʼiajin nga tsín kjuian tsa ñaki tsín kʼoakoa̱n kjoaixiná. Kʼoa nga kʼoee énná koakoñá nga ʼyachjiá je kjoajtín xi satíoná (Salmo 22:22).

⁵ Tsa nda kuinóʼyá kʼianga tísʼejna je kjoajtín kʼoa si̱kuindaa je Ndʼia jña chotʼayá, kʼoasʼin koakoñá nga tiʼyaxkoán je Niná. Kui xi mená nga nda katanchja̱ni je chjota xi tʼatsʼe jaʼaínle Jeobá. Me ngayeje Ndʼia jña chotʼayá nga faʼaitʼa jaʼaínle Jeobá (Kʼoati me tso én xi koa̱nsjaili ya 1 Reyes 8:17).

6. Jótso kʼa je chjota kʼianga ya bichó ya Ndʼia jña chotʼayá. (Chótsenlai sén xi fitsʼiani kjoaʼmiya jebi.)

⁶ Je chjota be kʼianga ʼyaxkoán Ndʼia jña chotʼayá. Tobʼelañá, jngo chjota xi Turquía tsʼe kʼoakitso nga tokoanxkónle nga tsabe Ndʼia jña chotʼayá nga nʼio nda chon kʼoa nʼio tsje chon. Kʼoati tokʼoakoanle nga ñaki ndasʼin matsen najño xi yʼakjá je ndsʼee kʼoa nga ñaki tsjoa tjíole nga kisitiʼnda. Chjota jebi ki ntsjaintsjai kjoajtín kʼoa tochoatse jaʼato nga kisʼenngindá. Kʼianga kisʼenda chjotse jngo Ndʼia jña chotʼayá ya Indonesia, je ndsʼee kʼoakitsole je chjota xi ya chrian tsʼe, je alcalde kao je chjota xi xá tjínle nga katafikotsen. Je xi alcalde sʼin tíjna tokʼoakoanle nga nʼio ndasʼin kisʼenda ndʼia jebi kʼoa nga naskánachon jñani kji naxó. Kʼoakitso nga kʼoanʼia jmeni xi ʼmiyaa kʼianga nʼio tsje chon jña chotʼayá.

7, 8. Jósʼin bakoá nga ʼyaxkoán Jeobá ya Ndʼia jña chotʼayá.

⁷ Jé Jeobá xi kʼoatsoná nga koanngián kʼianga satíoná je kjoajtín. Kʼoa kuenta sʼín josoyoaa kʼoa jonʼia kʼianga ya tiyoaa. Kuinga chosonnilee jokjoan xi chʼakjá. Alikui koa̱n nga ñaki kʼoéne jokjoan xi koa̱n chʼakjá kʼoa jmeni xi koa̱n sʼiaan. Tonga kʼoati likui koa̱n nga tokʼoasʼiaan jonʼia kʼianga ndʼianá tiyoaa. Je Jeobá kui xi mele nga nda katasʼe tokoán kʼianga tiyoaa ya Ndʼia jña chotʼayá. Alikui mená nga kui kʼoasʼiaan jmeni xi tsín kjoaxkóntokon tjenkao. Kuinga likui tosoyo tomañá  nga mangián. Kʼoa nga tísʼejna je kjoajtínná alikui tsa mensajela nikasén, alikui yala chobá, kʼoa alikui yala bichaa. Kʼoa je xi xijchá ma, tsoyale je ʼndíxtile nga tsín ya tóka kʼoa tsín ya siská (Eclesiastés 3:1).

⁸ Kʼianga mangián ya Ndʼia jña chotʼayá kui xá mangínñá nga je Jeobá ʼyaxkoán kʼoa nga chotʼayá xi tʼatsʼe. Kuinga tsín ma ya chobayañá tsa tʼatsʼe negosio (kʼoati me tso én xi koa̱nsjaili ya Nehemías 13:7, 8). Kʼianga tsabe Jesús nga tsojmi tjíobaténa chjota ya yo̱ngo̱ nʼio koanjtile kʼoa tsakʼaonsje (Juan 2:13-17).

9, 10. 1) Jméni xi sʼín je ndsʼee kʼianga bʼénda Ndʼia jña chotʼayá. 2) Jósʼin tíbichótsjoá nga kʼoasʼín. 3) Jósʼin tíbasenkao je naxinandále Jeobá je jtín jñani tsínle tao̱n nga katasʼenda ndʼia jña kotʼaya.

⁹ Jngo tjíjtsa Sonʼnde, nʼio nkjín testigole Jeobá xi kui xá sʼín nga bʼénda Ndʼia jña chotʼayá. Alikui machjíle nga bʼénda kʼoa tsa bʼéndaya ndʼia jebi. Kʼoa aonla ndʼia tísʼenda nga nyaon nyaon xi jexjaʼaon nó tífaʼato. Kʼoa jetsʼato kanjin jmi Ndʼia jña chotʼayá kisʼenda.

¹⁰ Je Biblia kʼoatso nga je xi tjínle tjínnele kuinyakao je xi tsínle (tʼexkiai 2 Corintios 8:13-15). Kuinga je naxinandále Niná síkasénsíni xi bʼénda ndʼia jebi kʼoa kui síchjén je tao̱n xi batioá ngatsʼiaa kʼianga bʼénda jñani ngisa machjén. Kʼoa nʼio nkjín Ndʼia jña chotʼayá jekisʼenda ya jñani tsínle tao̱n je ndsʼee.

11. 1) Jótso kʼa je ndsʼee nga jekisʼendale Ndʼia jña chotʼayá. 2) Jósʼe tokuin tʼatsʼe ndsʼee jebi.

¹¹ Ya Costa Rica tojin nichxin kisʼendani jngo Ndʼia jña chotʼayá. Kʼoa je ndsʼee xi ya tsʼe kʼoatso nga nʼio tsjoa tjíole. Kʼoa kʼoatso nga tsjoále kjoanda je Jeobá, je naxinandále kʼoa kao je ndsʼee. Nʼio chjí bekon kjoatjao jebi. Kʼoati tsjoa sʼe tokoán tsanda ñá nga kʼoasʼin tsjoále kjoanda je Jeobá tʼatsʼe kjoanichikontʼain xi títsjoále. Kʼoati nʼio tsjoa maná nga ngakjijnda sonʼnde tjínle Ndʼia jña kotʼaya je ndsʼee. Je Jeobá tísíchikontʼain nga kʼoasʼin tjíosʼenda Ndʼia jña chotʼayá. Kʼianga jesʼenda Ndʼia jña chotʼayá, ngisa nkjín chjota fi kjoajtínná (Salmo 127:1).

12. Jósʼin kʼoainganʼioá nga nkjínsa Ndʼia jña chotʼayá katasʼenda.

¹² Jósʼin kʼoainganʼioá nga nkjínsa Ndʼia jña chotʼayá katasʼenda. Koaan koanngínnixá kʼianga sʼenda. Kʼoa ngatsʼiaa koaan kʼoee tao̱n xi sʼe̱ndani. Tsa kʼoainganʼioá jokji tjen kʼoakoa̱nná nʼiojin tsjoa sʼe̱ tokoán. Kʼoa xi ngisa chjíle kuinga je Jeobá chʼa̱sjengʼaa. Mená nga kʼoati sʼiaan jokisʼin je choʼndale Niná nichxin kjoatse, nga ñaki kao kjoatsjoa kitsjoa je tao̱n xi kisʼendani jñani tsaʼyaxkón je Jeobá (Éxodo 25:2; 2 Corintios 9:7).

13, 14. Tojo tso je Biblia, ánni machjénni nga tsje si̱choaan ya Ndʼia jñani chotʼayá kʼoa nga chʼin chʼin si̱katioá je tsojmi xi tjío.

¹³ Je Jeobá nʼio tsje, kʼoa kui xi mele nga chʼin si̱xá. Kuinga machjénni nga tsje si̱choaan ya Ndʼia jña chotʼayá kʼoa chʼin chʼin si̱katioá je tsojmi xi tjío (tʼexkiai 1 Corintios 14:33, 40). Nga tsje koaan joni Jeobá, tjínnele tsje kʼoé kjoafaʼaitsjenná, tsje sʼiaan kʼoa nga ñaki tsje sʼin tíjna je kjoaʼyaxkón xi kʼoailee je Jeobá. Kʼoati machjén nga tsje sóyoaa (Apocalipsis 19:8).

¹⁴ Tsa tsje nichoaan ya Ndʼia jña chotʼayá, ñaki tjínjngojin tokoán nga kʼoakʼuínlee chjota nga katafi kjoajtínná. Kʼoa kʼoasʼin koakonilee nga mená ya kuiyoaa jngo sonʼnde chjotse jñani tsje chon. Kʼoati skoe̱ nga je bʼetsʼoalee Niná xi tsje tíjna kʼoa xi ʼndenaxó sikao i̱ Sonʼnde (Isaías 6:1-3; Apocalipsis 11:18).

15, 16. 1) Ánni nga sakʼoa ñʼai maniná nga tsje nichoaan ya Ndʼia jña chotʼayá. 2) Ánni nga tjínnenile nga tsje si̱choaan ya Ndʼia jña chotʼayá. 3) Jósʼin tjínndajin nga matsje ya Ndʼia jña chotʼayai ji. 4) Jmé kjoanda xi tjínná ngatsʼiaa.

¹⁵ Sakʼoaa ñʼai ma nga tsje nichoaan ya Ndʼia jña chotʼayá. Ánni. Kuinga kjaʼaí kjaʼaísʼin síkjaʼaitsjen je chjota. Tjínkʼa xi ya tjío jñani nʼio tjín chao kʼoa tsa nʼio mandási jñani tsʼe. Kʼoa tjín jñani ñʼai chon nandá kʼoa tsa tsínje̱ jmeni xi matsjeni. Kʼoa josʼin koanjchá nga jngó jngoá kʼoati sakʼoa ya nroani jonʼia. Tojñani tsaan kʼoa ninga kjaʼaísʼin síkjaʼaitsjen chjota, tjínnele nga tsje si̱choaan ya Ndʼia jña chotʼayá kʼoa chʼin chʼin si̱katioá je tsojmi xi tjío, nga̱ yaa ʼyaxkoán je Jeobá (Deuteronomio 23:14).

¹⁶ Tsa mená nga tsje koa̱nchon ya Ndʼia jña chotʼayá, machjén nga ñaki nda sʼe̱ndajin  josʼin koa̱ntsje. Jé xi chjotajchínga sʼin tjío bʼénda je programa kʼoa kʼoati kotsenle nga tsínkʼia koa̱ntsín jmeni xi machjén nga matsje. Kʼoati je kʼoatsole jmeni xi sʼin nga jngó jngó ndsʼee ánni nga nda koa̱ntsjesíni. Tjín jmeni xi tse matsjeni kʼoa tjín xi kʼia matsje nga ñandia ñandia satíoná kjoajtín. Ngatsʼiñá nga tjínná kjoanda nga kʼoainganʼioá nga tsje kamachon Ndʼia jña chotʼayá.

17, 18. 1) Jmé xi bakóyaná jokisʼin je choʼndale Jeobá nichxin kjoatse. 2) Ánni machjénsíni nga si̱sinlee je Ndʼia jña chotʼayá.

¹⁷ Nichxin kjoatse, je choʼndale Jeobá kisikuindaa je yo̱ngo̱. Tobʼelañá, je rey Jehoás kʼoakitsole je naʼmi xi tjío ya Judá nga katabʼéndaya je yo̱ngo̱ kʼoa nga kui katasíchjén je tao̱n xi kitsjoa naxinandá (2 Reyes 12:4, 5). Kʼoa tsʼato jao siento nó nga koanskanni, je rey Josías kʼoati kui kisichjén je tao̱n xi kitsjoa je naxinandá nga tsakʼéndaya je yo̱ngo̱ (2 Crónicas 34:9-11). Jmé xi bakóyaná jebi. Kui bakóyaná nga kʼoati si̱sinlee Ndʼia jña chotʼayá kʼoa kʼoéndayaa jñani machjénle.

¹⁸ Tjínkʼa sucursal xi tjíobe nga tjín naxinandá jñani tsín nda masinle je Ndʼia jña chotʼayá kao tsojmi xi ya tjío. Sakʼoaa kui kʼoamani nga tochoa mani xi male sísinle. Kʼoa sakʼoaa kuinga tsínle tao̱n je ndsʼee xi bʼéndayani jñani machjénle. Tonga tsa tsín kʼoéndayaa, sa chʼao sa chʼaojin sʼe̱. Kʼoa je chjota xi skoe̱ likuijin nda sikʼaxki̱ná. Kuinga machjénsíni nga kʼoénelee yaoná nga si̱sinlee je Ndʼia jña chotʼayá. Tsa kʼoasʼiaan, jé Jeobá chʼa̱sjengʼaa kʼoa alikui tosi̱kitsoán je tao̱n xi tsjoá je ndsʼee.

19. Jósʼin koakui nga ʼyaxkuín Ndʼia jña chotʼayá.

¹⁹ Je testo xi kachotʼayajiaan i̱ kjoaʼmiya jebi basenkaoná nga ʼyaxkoán Ndʼia jña chotʼayá. Ndʼia jebi tsʼení Jeobá, ali tsʼe chjotajin kʼoa ali tsa tsʼejin je jtín. Kʼiatsa ʼyaxkoán je Jeobá kʼoajinti koakoá kjoaxkóntokon nga satío kjoajtínná kʼoa jchaxkónjián Ndʼia jña chotʼayá. Kʼoa kaojin kjoatsjoa kʼoee tao̱n nga katasʼenda Ndʼia jña chotʼayá kʼoa kʼoénejinlee yaoná nga tsje si̱choaan kʼoa nga si̱sinlee. Chjénngilee je choa̱le Jesús kʼoa koakoá kjoaxkóntokon ya Ndʼia jña ʼyaxkoán je Jeobá (Juan 2:17).