1, 2. 1) Ánni nga ñaki kʼoatjínsíni tokuin nga tsjoake Jeobá je choʼndale. 2) Jméni xi machjénná xi chjotaa.

A ÑAKI tjínjngo tokuin nga tsjoake Jeobá je choʼndale. Tikjaʼaitsjenlai choa̱ jebi. Jngo tichjaa xi Taylene ʼmi mele nga tsesa jmeni xi sʼin tonga nga tsín kʼoamale ba sʼe kon. Nkjín nó nga kʼoasʼin kitsjoanganʼiole je ndsʼee nga tsín kʼoakatabʼé kon. Kʼoatso tichjaa jebi, kʼiatsa tsínlani tsjoake Jeobá, alikuijin kʼoasʼin kitsjoanganʼiole kʼoa alikuijin tsakʼaile kjoafaʼaitsjen. Ijngo tichjaa xi Brigitte ʼmi kʼien xʼinle kʼoa jao mani ʼndíxtile. Tichjaa jebi kʼoatso nga nʼio ñʼai kjimale nga tísíjchínga ʼndíxtile, kʼoa ngisa nga jetoje tíjna. Tonga ñaki kʼoatjín kon nga tsjoake je Jeobá, nga̱ tíbasenkao nga kjoaba kʼoa kjoaʼaon tífaʼatojin kʼoa nga tsín títsjoáʼnde nga nʼiosa tse kjoañʼai kjoaʼa jokji tjen ska̱le (1 Corintios 10:13). Jngo tichjaa xi Sandra ʼmi, jngo chʼin xi tsín timandanilee kiskatʼale. Kʼianga jngo kjoajtíntse kisʼejna, jngo tichjaa xi saʼnda tsín bexkon kisichriantʼale nga kisitiʼnda kʼoa tsakjákaonajmí. Je xʼinle tichjaa Sandra kʼoatso nga nʼio kitsjoanganʼiole jebi. Kʼoatso nga je Jeobá xi tíbakóle kjoatsjoacha kʼianga jmeni xi sʼín je ndsʼee.

 ² Ñá xi chjotaa machjénná nga sa̱kóná kjoatsjoacha kʼoa nga kʼoati koakoá tsanda ñá. Toxá kʼoasʼin kisindaniná je Jeobá. Tonga tsa chʼin tjínná, tsa tsínná tao̱n kʼoa tsa tsín ʼya xi nrʼoéná nga ʼmiyasoán tsakui nichxin kjuinroajen tokoán kʼoa kʼoasʼin si̱kjaʼaitsjeen nga tsín titsjoakeniná Jeobá. Kʼiatsa kʼoakoaan, si̱kjaʼaitsjeen nga mandosinle Jeobá xi tʼatsaan kʼoa nga mele koasenkaoná. Alikuikʼia tsjiónkonná kʼianga kixi timangíntʼalee (Isaías 41:13; 49:15).

3. Jméni xi koasenkaoná nga ñaki kʼoasa̱tío tokoán nga tsjoakená je Jeobá.

³ Je ndsʼee xi jekanikʼaxkiaa ñaki kʼoatjío kon nga je Niná tsakinyakao nga ñʼai kjoa jaʼatojin. Kʼoati koa̱n kʼoakʼoé tokoán tsanda ñá nga je Jeobá koasenkaoná (Salmo 118:6, 7). Tsakui si̱kjaʼaitsjeen jmeni xi ndatjín títsjoáná je Jeobá, ñaki kʼoasa̱tío tokoán nga tsjoakená (tʼexkiai Salmo 77:11, 12). * I̱ kjoaʼmiya jebi ño koya tjínni xi jchaa xi títsjoáná je Jeobá: jme xi kisinda, je Biblia, je kjoabʼetsʼoa kʼoa kao kjoabʼechjíntjai (chótsenlai je rekuadro “Jósʼin tsoyanile”).

4. Kʼianga chotsenlee jmeni xi kisinda Jeobá, jméni xi tsoyaná.

⁴ Kʼianga chotsenlee jmeni xi kisinda Jeobá, yaa ʼyañá kʼianga tsjoakená (Romanos 1:20). Tobʼelañá, je Sonʼnde xi kisindaná tjínle ngayeje jmeni xi machjénná nga koa̱n kuiyochoán. Nʼio nkjín tsojmi xi ma chine kisinda nga koa̱n kʼoétsaojinkoaa (Eclesiastés 9:7). Ya naxinandá Canadá, jngo tichjaa xi Catherine ʼmi kʼoatso nga nʼio tsjoa sʼele nga kotsenle joma nga maxkoén ijngokʼa ngayeje kʼianga fetʼa cha̱nnyʼán kʼoa nga fitsʼia cha̱nndoá. Nʼio tsjoa sʼele nga kotsenle joma nga bitjo je naxó kʼoa nga faʼai ijngokʼani je nise xi fi kʼianga cha̱nnyʼán. Nʼio tsjoa male kʼianga jngo tondsi̱n bichókjine jmeni xi bʼéjnajchxole ya ventanale ndʼialʼíle. Tichjaa jebi kʼoatso nga kuinga tsjoakená je Jeobá nga kʼoasikji tsojmi xi naskánatjín tsjoániná. Je Jeobá nʼio tsjoa sʼele nga kotsenle jmeni xi kisinda kʼoa kui xi mele nga kʼoati tsjoa katasʼená tsanda ñá (Hechos 14:16, 17).

5. Jósasʼin ʼyaa nga tsjoakená je Jeobá.

⁵ Ijngosa koya xi bakóná nga tsjoakená je Jeobá kui josʼin kisindaná. Kʼoasʼin kisindaná nga kui kʼoasʼiaan je xá xi tsjoa kʼoee tokoán kʼoa xi nda kʼoee tokoán (Eclesiastés 2:24). Kui xá kitsjoaniná sonʼnde nga si̱tsee, nga kʼoéntjé tsojmi kʼoa nga si̱kuindaa je cho̱ kao jmeni xi tjín (Génesis 1:26-28). Kʼoa kʼoati kʼoasʼin kisindaná nga koa̱n chjénngilee jokjoan (Efesios 5:1).

6. Ánni nga kʼoaisíñá kjoanda nga kijnaná je Biblia.

⁶ Kuinga tsjoakená je Jeobá nga kitsjoaniná je Biblia. Kʼoailee kjoanda je Jeobá nga kitsjoaná kjoatjao jebi, nga̱ yaa bakóyaná jokjoan kʼoa jotjín kon xi tʼatsʼe chjota. Tobʼelañá, je Biblia kʼoatso jokisʼe kon xi tʼatsʼe chjota israelita ninga ngotjo ngosa tsakajngijéeni. Ya Salmo 78:38 itso: “Kisʼele kjoamatokon; kisichatʼaa je jéele kʼoa alikui kisikjeson. Kjitʼaa tsakjaʼáxinle kjoajti yaole ʼndele nga kʼoasje ngayeje kjoajtile”. Kʼianga nikjaʼaitsjeen bersíkulo jebi ʼyañá nga nʼio tsjoakená je Jeobá kʼoa nga mandosinle xi tʼatsaan ninga saténgiaa (tʼexkiai 1 Pedro 5:6, 7).

7. Ánni nga nʼio ʼyachjísíñá je Biblia.

⁷ Nʼio tjínnele jchachjiá je Biblia. Ánni. Kuinga kui síchjén Jeobá kʼianga fákaonajmíná. Kʼianga jngo nʼai kao jngo ʼndí nda fákaonajmí xínkjín, ngisa nʼio sʼesale kjoatsjoacha kʼoa nʼiosa manʼiotʼa xínkjín.  Tikʼoasʼinni, je Jeobá Nʼainá mani kʼoa nʼio tsjoakená. Ninga tsín ʼyañá xkoaan kʼoa ninga tsín noʼya sontsenlee, je Jeobá kao Biblia fákaoniná. Kuinga koasenñosíñá jmeni xi tsoná kʼianga bʼexkiaa Biblia (Isaías 30:20, 21). Tsa kʼoasʼiaan, jchañá nga mele Jeobá koandiaaná kʼoa sikuindaná. Ngisa ndasa jchaa kʼoa ngisasa koa̱nnʼiotʼaa (Salmo 19:7-11; tʼexkiai Proverbios 1:33). *

8, 9. 1) Jméni xi mele Jeobá nga kataʼyaa. 2) Jngola choa̱ tʼejnai nga kui xi ngisa kuenta sʼín Jeobá jñani nda nʼia tikʼoajinni jñani chʼao nʼia.

⁸ Je Jeobá kui xi mele nga kataʼyaa nga kui xi ngisa kuenta sʼín jñani nda nʼia tikʼoajinni jñani chʼao nʼia (2 Crónicas 16:9). Kataʼyala choa̱le jngo rey xi tsakʼejna ya Judá xi Jehosafat tsakʼin. Je Jehosafat yaa kisijngokao yaole je rey Acab nga kiskan kao chjota sirio, kʼoa alikui nda kisʼin nga kʼoakisʼin. Ño siento mani profeta ndiso xi kʼoakitsole je Acab nga kuinje̱le kjoajchán jebi. Tonga je profeta Micaya xi ñaki kixi kitʼale Niná kʼoakitsole je Acab kao Jehosafat nga sicha kjoajchán jebi kʼiatsa ya koaijin. Kʼoa kʼoakoan. Je Acab yaa kʼienjin kjoajchán, kʼoa je Jehosafat tome ya kʼien tsanda je. Xijekoan, je Jeobá jé Jehú kisikasén nga kisikixiyanda je Jehosafat jmeni xi kisʼin, kʼoa kʼoati i̱ kitsole: “Kʼoati tjín jmeni xi ndatjín kinʼiai” (2 Crónicas 18:4, 5, 14-22, 33, 34; 19:1-3).

 ⁹ Jméni xi ndatjín kisʼin je rey Jehosafat. Kʼoasʼin tsakʼénele je chjota xi nyatítjon, je chjota levita kao je naʼmi nga katafi ngakjijnda Judá kʼoa nga katatsoyale ngatsʼi je chjota jotjínni kjoatéxomale Niná. Nʼio nda kichotsjoá nga kʼoakisʼin, saʼnda je chjota xi xin naxinandále tsabe xi tʼatsʼe Jeobá (2 Crónicas 17:3-10). Ninga tjín jñani chʼao kisʼin je Jehosafat, je Jeobá alikui kisichajin jmeni xi ndatjín kisʼin. Jméni xi bakóyaná choa̱ jebi. Ninga sa̱téngiaa, kʼiatsa ñá xi kʼoénelee yaoná nga tosi tonda si̱xálee je Jeobá, tosi tonda tsjoake koa̱nná kʼoa alikui sichajin jmeni xi ndatjín tinʼia.

10, 11. 1) Ánni kʼoabixónsíñá nga jngo kjoatjao je kjoabʼetsʼoa. 2) Jméni xi síchjén Jeobá nga basenkaoná kʼianga bʼetsʼoalee. (Chótsenlai sén xi fitsʼiani kjoaʼmiya jebi.)

¹⁰ Jméni xi sʼín jngo nʼai kʼianga mele kjoakaonajmí je ʼndíle. Kʼianga mandosinle nʼai jebi xi tʼatsʼe ʼndíle, bʼasjeʼale nichxin nga nrʼoéle kʼoa be jotjín kon je ʼndíle. Je Jeobá Nʼainá mani, kʼoa nʼio mandosinle xi tʼatsaan. Kuinga nrʼoéniná kʼianga bʼetsʼoalee. Kʼoa nʼio tse kjoanda tjínná nga ma nokjoakoaa je Jeobá.

¹¹ Je kjoabʼetsʼoa jngo kjoatjao xi Jeobá tsjoáná, nga̱ ma nokjoakoaa tokʼiani nga mená. Miyoná mani kʼoa tíjnandantsjai nga nrʼoéná. Ya párrafo xi títjon jngoná tichjaa kanikʼaxkiaa xi Taylene ʼmi. Tichjaa jebi kʼoatso nga ma bʼeyanajmílee Jeobá tojmeni xi mená. Kʼianga kʼoaʼmilee Niná jotjín tokoán, nkjín koya josʼin basenkaoná. Tsakui nichxin jngo bersíkulole Biblia sichjén, tsakuije̱ xo̱n xi nichjén kʼoa tsa jngo ndsʼee tsjoánganʼioná. Je Jeobá nrʼoéná kʼoa machoyale jmeni xi matʼeen ninga tsín ʼya xi tjíobe. Kʼianga tsjoáná jmeni xi nijélee kao kui ʼyañá nga nʼio tsjoakená.

12. Ánni nga ndatjínsíni nga chótʼayajiaan kjoabʼetsʼoa xi faʼaitʼa Biblia kʼoa jñá kʼanile kjoabʼetsʼoa jebi.

¹² Je kjoabʼetsʼoa xi faʼaitʼa ya Biblia nʼio tse jmeni xi bakóyaná. Machjénní nga sakʼoa kui chótʼayá nichxin nga chotʼayajtían Énle Niná ya niʼyaná. Tobʼelañá, koaan chótʼayá je kjoabʼetsʼoa xi tsakʼéjna Jonás kʼianga tíjnaya yatsʼoa̱ je jti̱ (Jonás 1:17–2:10). Kʼoati koa̱n chótʼayajiaan je kjoabʼetsʼoa xi tsakʼéjna Salomón kʼianga tsakʼaitʼale Niná je yo̱ngo̱ (1 Reyes 8:22-53). Kʼoati si̱kjaʼaitsjenjiaan je kjoabʼetsʼoa xi tsakakóya Jesús (Mateo 6:9-13). Kʼiatsa chótʼayajiaan kjoabʼetsʼoa xi kanikʼaxkiaa ngisa koa̱nsaná josʼin kʼoétsʼoaa. Kʼoa alikui koa̱n si̱chajiaan nga nʼio machjén nga kjitʼa kʼoétsʼoaa. Kʼoa “je kjoanyʼántakonle Niná xi ñaki faʼatole ngayije kjoafaʼaitsjenle chjota” kui sikuinda kjoafaʼaitsjenná kao ni̱ma̱ná. Tsa kjitʼa kʼoétsʼoaa, ngisa kʼoaisalee kjoanda je Jeobá jokji kjoatsjoacha tíbakóná (Filipenses 4:6, 7).

13. Jmé kjoanda xi tjínná xi totʼatsʼe je kjoabʼechjíntjai.

¹³ Ijngosa koya josʼin bakóná kjoatsjoachale Jeobá kuinga kitsjoa je kjoabʼechjíntjai. Kui xá kitsjoani kjoatjao jebi nga katasʼená kjoabijnachon (1 Juan 4:9). Je pastro Pablo kʼoakitso nga nijngojin xi tsjoá kjoabijnachonle xi totʼatsʼe jngo chjota xi kixi kʼoa kʼoakitso nga tsakui nichxin tsjoá kʼa kjoabijnachonle xi totʼatsʼe jngo xi nda chjota. Tonga je Niná tsakakó jokji tsjoakená kʼianga kʼienntjainá je ʼNdíle ninga “chjotajée” maa (Romanos 5:6-8). Je kjoabʼechjíntjai jebi kui xi basenkaoná nga koa̱n miyole Niná koaan kʼoa kui xi ngisasa bakóná jokji tsjoakená je Niná.

14, 15. 1) Jósʼin binyakao je kjoabʼechjíntjai je xi ya koai ngʼajmi. 2) Jósʼin binyakao je kjoabʼechjíntjai je xi i̱ koatio Sonʼnde.

¹⁴ Jósʼin basenkao kjoabʼechjíntjai je xi ya  koai ngʼajmi. Chjota jebi jngo kjoanda tjínle josʼin tsjoake je Jeobá (Juan 1:12, 13; 3:5-7). Kao nganʼiotsjele Niná kitjoejinni kʼoa xtile ma (Romanos 8:15, 16). Je Pablo kʼoakitso nga ya tjíone yáxilele “ya ngʼajmi kao Cristo” (Efesios 2:6). Jókitsonile Pablo nga kʼoakitso nga̱ isa tjíokʼa sonʼnde je xi ya ngʼajmi bʼakaole. Kui xi kitsonile nga tjínle kjoachoya ngatsʼi nga koa̱n ya koatio ya ngʼajmi (Efesios 1:13, 14; Colosenses 1:5).

¹⁵ Kʼoa jósʼin binyakao je kjoabʼechjíntjai je xi tsín ya ngʼajmi bʼakaole. Tsa tjínle kjoamakjain tʼatsʼe kjoabʼechjíntjai koaan miyole Niná koa̱n tsanda je. Kʼoa nichxin xi nroaján koaan xtile Niná kʼuínle kʼoa koaan koatio ngantsjai nichxin i̱ Sonʼnde. Je kjoabʼechjíntjai kui xi bakó nga nʼio tsjoake Jeobá je chjotasonʼnde (Juan 3:16). Tsjoa maná nga nʼio nda kuiyoaa ya sonʼndenaxó kʼiatsa kixi kjuintʼalee je Niná. Je kjoabʼechjíntjai kui xi ngisasa bakó nga tsjoakená je Jeobá. Kuinga tosi tonda kʼoaisínilee kjoanda nga kʼoasʼin kitsjoa xi tsakʼéchjíntjainá.

16. Jméni xi sʼiaan kʼiatsa si̱kjaʼaitsjenjiaan josʼin bakóná Jeobá nga tsjoakená.

¹⁶ Nʼiosa nkjín koya josʼin bakóná je Jeobá nga tsjoakená. Je rey David i kitso: “Xi kao an, nʼio naskánatjín kjoafaʼaitsjenli. Ji Niná, nʼio tse kjoafaʼaitsjen tjínli. Kʼiatsa an xi kʼoexkia, ngisa nkjín mani tikʼoajinni tsomí” (Salmo 139:17, 18). Kʼiatsa si̱kjaʼaitsjenjiaan josʼin bakóná Jeobá nga tsjoakená ngisa koa̱ntsjoachasaa kʼoa ngisa koa̱nmesaná nga si̱xálee.

17, 18. Jósʼin koakolee je Jeobá nga tsjoachaa.

¹⁷ Jósʼin koakolee Jeobá nga tsjoachaa. Jngo koya jokoa̱n sʼiaan kuinga kao kjoatsjoa kʼuínyasoán je énnda chjotse xi tsʼe chjotaxále (Mateo 24:14; 28:19, 20). Ijngosa koya, kʼianí nga kixi kjuintʼalee kʼianga kjoa tibitjatojiaan nga tíchotʼayakao kjoamakjainná (tʼexkiai Salmo 84:11 * kao Santiago 1:2-5). Ninga nʼio tse kjoa kuitjátojiaan, je Jeobá bení kʼoa koasenkaoná nga̱ nʼio tsjoakená (Salmo 56:8).

¹⁸ I̱ kjoaʼmiya jebi kui kachotʼayá josʼin koakolee je Jeobá nga tsjoachaa. Xi títjon, nga si̱kjaʼaitsjenjiaan jmeni xi kisinda. Xi majaoni, nga chótʼayá je Biblia. Xi majanni, nga kjitʼa kʼoétsʼoalee ánni nga ngisa koa̱nmiyosíñá. Kʼoa xi mañoni, nga si̱kjaʼaitsjenjiaan jokji chjíle je kjoabʼechjíntjai (1 Juan 2:1, 2). Tsa kʼoasʼiaan, ñaki sʼe̱jngo tokoán nga tsjoakená je Jeobá, kʼoa ñá sa tsjoacha sa tsjoachaa koaan.