A jesa kichjonangilai yaoli tsa tokui xá tiyoñá nga si̱ská, nga si̱xá, nga kuixaan, nga xti sʼe̱ná kʼoa nga koa̱njchíngaa (Job 14:1, 2). Ya Biblia kʼoatso nga saʼnda kui kiskonangile yaole chjota xi nʼio chjine koan. (Tʼexkiai Eclesiastés 2:11.)

Kʼianga jchaa jme xá tiyoñá machjénní nga títjon kjoanla jchaa jósʼin kitsʼiani kjoabijnachon. Nga jekichotʼayason josʼin tjínnda je xokoajkoaa kʼoa kao yaoná, nʼio nkjín je chjota xi kʼoatso nga nʼio chjine je xi kisindaná (tʼexkiai Salmo 139:14). Tsa tjín xi kisindaná, tjínjin xá kisindaniná. Nga ʼyaa jme xá koanndañá ngisa nda sʼe tokoán.

Kʼianga kisinda je Adán kao Eva, jngo xá xi nʼio naskánatjín kitsjoale. Je xi mele Niná tsakai kuinga koatio ngantsjai nichxin je Adán kao Eva, nga kao ntje̱le sitseni sonʼnde kʼoa nga ʼndenaxó sikao. (Tʼexkiai Génesis 1:28, 31.)

Kʼianga yátsʼi̱n tsakinyále Niná je chjota, je Niná alikui kisichajin jme xi tjínndajinle. Je Biblia kʼoatso nga saʼnda kʼia tísítjosonni Niná jme xi tsakʼéndajin nga kʼoasjentjai choʼndale kʼoa nga kʼoakatama josʼin mele i̱ Sonʼnde. Je Niná kʼoati mele nga sʼe̱li kjoabijnachon ngantsjai, tojosʼin koanmele saʼnda ngasʼa (tʼexkiai Salmo 37:29). Je Biblia kʼoatsoná jmeni xi sʼiaan nga kʼoasʼin kjuinkoaa yaoná josʼin mele Niná.