XI NGISA TÍNCHJA̱NI REBISTA JEBI
Jmé xi ma kʼianga jebiyaa
“Kʼoasʼin sikjaʼaitsjen tsakai ngasʼa nga kʼianga jebiyaa ya mangián tsa ya ngʼajmi, tsa ya jña lʼí tíbʼájnga̱ kʼoa tsa ya jña purgatorio ʼmi. Kʼoasʼin kisikjaʼaitsjen nga tsín bakinna tsa ya ngʼajmi kjuía kʼoa tsa ya jña lʼí tíbʼájnga̱ kjuía. Xi tsín nʼio nda koanjinna kui tʼatsʼe je xi purgatorio ʼmi. Likuikʼia tsakʼexkia jotso Biblia, tokui xi ʼbe jmeni xi tso je chjota.” (Lionel)
“Kʼoasʼin tsakʼinyana nga ya ngʼajmi mangián ngatsʼiaa kʼianga jebiyaa, tonga likui ñaki tjínjngo tokoan tsa kjoaixi. Tsa toyaa tjen fetʼa nga jebiyaa xinña.” (Fernando)
A saje kichjonangilai yaoli jméni xi ma kʼianga jebiyaa. A kjoañʼai tjíofaʼá je xíngiaa xi jekʼien. A koaan jcha ijngokʼá. Jósʼin ʼyañá tsa ñaki sʼe̱ kjoafaʼáya. Kʼianga koa̱njinna xi tʼatsʼe jebi, kataʼyala jmeni xi tso je Biblia. Kui títjon jchaa jótso tʼatsʼe kjoabiya kʼoa xijekoa̱n, kʼiaa chótʼayajiaan jmé kjoachoya tsjoá je Biblia.
Jósʼin tjío xi jekʼien
JE BIBLIA ITSO: “Je xi tjíokon bení kʼianga kuiyá, tonga je xi jekʼien nijmejin xi tibeni kʼoa likui tichjíle síkinjeni, nga̱ jekichajin. Ngayeje jmeni xi koa̱nle kʼoasʼin ndsai, kʼoatʼiain kao ngayeje nganʼioli, nga̱ tsín xá, ni kjoafaʼaitsjen, ni kjoankjíntokon, ni kjoachjinejin tjín ya Tsjó, * ya ʼnde jñani tiʼmi.” (Eclesiastés 9:5, 10.)
Je “Tsjó” yaa jña fi ngatsʼi chjota kʼianga jebiya. ʼNde jebi totsoyanile. Kui tsoyanile nga tsín jme xi tiʼyañá kʼoa tsín jme xi tinʼiañá. Tobʼelañá, tikjaʼaitsjenlai jmeni xokitsole je Job kʼianga tsjó kisikʼaxki̱. Tojngo nichxin kʼienni ngatsʼi xtile kʼoa kisicha ngayeje xi tjínle. Kʼoa nʼio tse kjoañʼai tsakjaʼá nga jtsé tsakajon yaole. Kʼoa i kitsole Niná: “Tongisajin nda tsa yala Tsjó [“infierno” tso La Sagrada Biblia, xi tsʼe Guillermo Jünemann] si̱kʼéjnaʼmanái” (Job 1:13-19; 2:7; 14:13). Je Job alikui kʼoasʼin kisikjaʼaitsjen nga ngisa tse kjoañʼai kjoaʼa ya tsjó kʼoa tsa ya infierno. Tosa kʼoakitso nga ya sikjáya.
Ijngosa koya josʼin koa̱n jchaa josʼin tjío je kʼien, kʼiaa nga kʼoéxkiaa jotso je Biblia tʼatsʼe je chjota xi jaʼáyanile (chótsenlai rekuadro xi tso: “ Jin kjoafaʼáya xi síkʼaxki̱ Biblia”).
Nijngojinla chjota xi jaʼáyale xi kʼoakitso tsa nʼio nda chon jñani kicho kʼoa tsa kjoañʼai tsakjaʼá. Tsa xinlani ʼnde ki, a tsí tsakʼéyanajmí jochon jñani kicho. A tsí kʼoati kisʼetʼa ya Biblia nga kataʼyale jñani ki. Tonga je Énle Niná alikui jme xi síkʼaxki̱. Je chjota xi kinikjaʼáyale alijme xi kitso nga̱ lijme xi tsabe. Kʼianga kʼien alijme xi titsabeni, joxi totsakjayofe. Je Biblia sakʼoaa kui síngósonkao je kjoabiya joma nga “sʼefé”. Tobʼelañá, kʼianga síkʼaxki̱ tʼatsʼe rey David kʼoatso nga “kisʼefe”, kʼoa kʼoati tso tʼatsʼe chjotatjenngile Cristo xi Esteban tsakʼin (Hechos 7:60; 13:36).
A toyaa tjen fetʼa kʼianga jebiyaa. A koaan kjoaʼáyaniná.
^ párr. 7 Je Biblia Traducción del Nuevo Mundo de las Santas Escrituras “Tsjó” sʼin kisikʼatoya je én xi Seol tso nga én hebreo kʼoa xi Hades tso nga én griego. Tjínkʼa Biblia xi “infierno” kʼoa tsa “jña nga títi lʼí” sʼin síkʼatoya, ninga tsín jña kʼoatso je Biblia tsa tíjna jngo ʼnde jña nikjaʼá kjoañʼai je kʼien.
Tsa kʼoati meli jchai xi tʼatsʼe jebi
XO̱N XI BÁJINKONNÁ
A ñaki kisikjaʼáya kjoaixile kʼien je Jesús
Jmé xi tsakakó je Jesús tʼatsʼe nichxin xi nroaján nga kʼoasʼin kisikjaʼáyale kʼien.
