Tjínjinkʼa xi kʼoakuitso nga tomakjainyejená jmeni xi ʼminá kʼianga kui makjainná tʼatsʼe kjoafaʼáya. Tonga je Pastro Pablo alikui kʼoasʼin kisikjaʼaitsjen, tosa i kitso: “Ñá xi biyochoán i̱ sonʼndebi, tsa tokjoachoyakaokjoa xi tjínná xi totʼatsʼe Cristo, bʼakaoná nga ngisa skoe̱ma̱ná kaoni tsa ngatsʼi chjota. Tonga ndʼai Cristo jekinikjaʼáyajinnile je xi kʼen. Je xi koan tjonle je xi jekʼen” (1 Corintios 15:19, 20). Je Pablo koankjainle nga sʼe̱ kjoafaʼáya. Ánni nga tsín jao kisʼenile. Kuinga jaʼáyale je Jesús (Hechos 17:31). * Je Pablo kʼoakitso nga je Jesús xi títjon jaʼáyale nga kʼoéjna ngantsjai nichxin. Nga je títjon jaʼáyale Jesús kuinga kʼoabixónsíñá nga sʼe̱sa chjota xi kjoaʼáyale.

Xi ijngosa koya anni nga makjainniná nga sʼe̱ kjoafaʼáya kuinga je Jeobá “likui bʼanacha” (Tito 1:2). Je Niná nisañandiajinla nga tsakʼéndiso kʼoa alikuikʼia kʼoendiso. A kʼoakuitsoná nga sikjaʼáyale je kʼien, koako nga sikjaʼáyale kʼoa tsínni sitjoson jmeni xi tso. Maijin.

Je Jeobá nʼio tjínle kjoatsjoacha. Kuinga sikjaʼáyanile je kʼien. Je Job i kitso: “Tsa jngo chjota kuiyá, a koaan kʼoéjnakon ijngokʼani [...]. Kuinókjoaní kʼoa kjuinrʼoele. Nʼio si̱metokuin jmeni xi kisinda ndsai” (Job 14:14, 15). Je Job ñaki kʼoatsakʼé kon nga je Jeobá nʼio simekon nga sikjaʼáyale. A tojo kʼoatjín kon Jeobá. Jaon, itso: “Anña je Jeobá, ali bʼantjaiyajian” (Malaquías 3:6). Je Niná nʼio mele nga sikjaʼáyale je kʼien nga tsín jme chʼin katasʼele kʼoa nga nda katabatio. Joni jngo nʼai nga kui xi mele nga kjoaʼáyanile je ʼndíle, je Niná kʼoati kui xi mele. Tonga je Niná ali tsa tomejinle nga sikjaʼáyale je kʼien, tjínle nganʼio nga kʼoasʼin (Salmo 135:6).

 Je Jeobá tsjoále nganʼio je Jesús nga koa̱nle sikjaʼáyale je kʼien, kʼoa nʼiojin tsjoa sʼe̱ kon je xi jekisicha xínkjín. Kʼoa je Jesús nʼio mele nga kʼoasʼin. Ánni kʼoabixónsíñá. Kuinga kʼianga kjesa síkjaʼáyajinle je Lázaro, xi miyole koanni, “kiskiʼndá Jesús” nga tsabe jokji aon tjío kon je ndichja kʼoa kao miyole Lázaro (Juan 11:35). Kʼoati ñandia, kʼianga tsabe jngo ʼndíchjoónkʼan xi kʼien je tile, je Jesús “koanmake nga je, kʼoakitsole: Ali chjiʼndájin” kʼoa kisikjaʼáyale je tile ʼndíchjoónkʼan (Lucas 7:13). Kui bakóyaná jebi nga aon male je Jesús nga nʼio tse kjoaba síkatíojinná je kjoabiya. Nʼiojin tsjoa sʼe̱le kʼianga sikjaʼáyale je kʼien, kʼianga tsjoa sa̱tío kon ngatsʼi chjota.

A saje kʼien jngo xíngi. Tsakui nichxin kʼoasʼin nikjaʼaitsjain nga tsín tikʼia jchaxkonni xíngi. Tonga tjín kjoachoya, nga̱ je Niná sikjaʼáyale je kʼien kʼoa jé ʼNdíle kʼoexále nga kʼoasʼin. Je Niná kui xi mele nga ya kuijnai nga chjoéyai je xíngi xi jekʼien. Tikjaʼaitsjenlai josʼe̱ tokuin kʼianga ñatjen nijcháo yaono kʼoa nga kʼoéndajion jmeni xi sʼiaon kʼoa nga koa̱n kuiyo ngantsjai nichxin.

Je Lionel, xi kanikʼaxki̱ná ya kjoaʼmiya xi títjon, itso: “Kʼianga kʼoatsakʼinna nga sʼe̱ kjoafaʼáya, likui koankjainna tsa kjoaixi, tsa totíbʼéndisoná kixinña. Tonga nga tsaʼbe nga kʼoatso kjoaixi je Biblia kʼiaa koankjainna. Nʼio tsjoa tjín tokoan nga skoe ijngokʼa je pajchána”.

A meli nga jchasai xi tʼatsʼe jebi. Je testigole Jeobá kao kjoatsjoa kuitsoyali nga koakoli kao je Biblia ánni nga ñaki tjíojngoni kon nga sʼe̱ kjoafaʼáya. *