1. Jóchon nichxin xi tiyoaa ndʼaibi.

NʼIO ñʼai chon nichxin xi tiyoaa ndʼaibi. Kʼianga nó 1914, kʼiaa kitsʼia je nichxin fikjetʼa. Saʼnda nga kʼia, sa chʼao sa chʼao kjimachon je sonʼnde (2 Timoteo 3:1-5). Kʼoa ʼyañá nga ngisasa nʼio chʼao koa̱nchon, nga̱ je Biblia jetongini kʼoakitso nga nʼio tsʼen koa̱n je chjota nichxin xi tiyoaa ndʼaibi (2 Timoteo 3:13).

2. Jméni xi nʼio bʼétsaojinkao ndʼaibi je chjota. (Chótsenlai sén xi faʼaitʼa ibi.)

² Nichxin xi tiyoaa ndʼaibi, nʼio nkjín chjota xi kui bʼétsaojinkao jmeni xi jtike je Jeobá. Tobʼelañá, je kjoatsʼen, kjoachajngi, majia kao na̱i xi ndajin. Je kjoa jebi to ndatjín male chjota nga kui kotsenle ya Internet, ya telebisión, ya cine, nga bʼéxkia libro kao rebista. Tjínkʼa naxinandá jñani tjíosíkʼantjaiya kjoatéxomale kʼoa jetsjoáʼndele ndʼaibi je chjota nga kui kʼoasʼín jmeni xi chʼao be ngasʼa. Tonga je Jeobá alikui tísíkʼantjaiya kjoatéxomale, tojo jtikení jmeni xi chʼaotjín (tʼexkiai Romanos 1:28-32).

3. Jósʼin síkjaʼaitsjen chjota tʼatsʼe xi kjoatéxomale Niná fitjenngi.

³ Kʼianga tsakatio je chjotale Cristo, je chjota kʼoati kui tsakʼétsaojinkao  je kjoatsʼen kao kjoachajngi. Tonga je chjotale Cristo alikui kʼoakisʼin, nga̱ kui kisitjoson je kjoatéxomale Niná. Nʼio nkjín chjota xi to kjaʼaísʼin tsabekon, totsabesin kʼoa kitjenngike (1 Pedro 4:4). Nichxin xi tiyoaa ndʼaibi, kʼoati kui nitjosoán je kjoatéxomale Jeobá. Kʼoa kuinga to kjaʼaísʼin bekonniná je chjota. Je Biblia kʼoatso nga koaitjenngike chjota ʼyani xi choa̱le Cristo koaitjenngi (2 Timoteo 3:12).

4. Jméni xi sʼiaan kʼiatsa mená nga Niná si̱tjosonlee.

⁴ Kʼiatsa mená nga si̱tjosonlee je Niná, alikui koa̱n nga je “sonʼnde, ni ngayije jñale xi chon sonʼnde” koa̱ntsjoachaa (tʼexkiai 1 Juan 2:15, 16). Ya Biblia kʼoatso nga je Na̱i kjinentsja je sonʼnde. Kʼianga bʼanachale chjota kui síchjén je relijión, je chjotaxá, kjoa xi tsʼe negosio kao jmeni xi tso jolani tsa ya telebisión kao radio (2 Corintios 4:4; 1 Juan 5:19). Kʼiatsa tsín mená nga je sonʼnde kʼoanachaná, si̱kuindalee yaoná ʼyani xi si̱miyoaa. Ya Biblia kʼoatsoná nga tsín ʼya xi katabʼanachaná, itso: “Je miyo xi tsín nda, jé xi síkitsón xi nda tjín” (1 Corintios 15:33). (Chótsenlai je rekuadro “Jósʼin tsoyanile”.)

5, 6. 1) ʼYáni xi tsín koa̱n si̱miyoaa. 2) Ánni nga tsín koa̱n je si̱miyosíñá je xi chʼao sʼín.

⁵ Kʼiatsa mená nga tosi tonda miyole Niná koaan, alikui koa̱n je si̱miyoaa je chjota xi chʼao sʼín. Kʼoati tsín koa̱n je si̱miyoaa xi Jeobá síxále tso tonga likuini sítjosonle. Kʼiatsa jngo xi jée koa̱njngí kʼoa tsín tikʼoakoa̱nnile jéele, alikui tije nokjoakaoñá kʼoa alikui tije nimiyoñá (Romanos 16:17, 18).

⁶ Kʼiatsa je si̱miyoaa jngo xi chʼao sʼín tochale kʼoati sʼiaan tsanda ñá. Ánni. Nga̱ me ngatsʼi chjota nga kui kʼoasʼín josʼín miyole tojoni nga nda koatiokao xínkjín. Tobʼelañá, kʼiatsa je si̱miyoaa jngo xi síchajngi kʼoajin tisʼiaan tsanda ñá. Tjíokʼa testigole Jeobá xi kʼoakjima. Xi kui kjoa kitsaojin kʼoakoan kʼanile jéele tonga kʼoati tjío xi mai kʼoa tsakichonsjejin naxinandále Niná (1 Corintios 5:11-13). Kʼiatsa tsín tikʼoakoa̱nnile jéele kʼoakoa̱n jotso ya 2 Pedro 2:20-22 (tʼexkiai).

7. ʼYáni xi koa̱n si̱miyoaa.

⁷ Kjoaixiní nga nda si̱koaa ngatsʼi je chjota. Tonga alikui koa̱n je si̱miyoaa je chjota xi tsín sítjosonle je Niná. Tobʼelañá, alikui ndatjín tsa jngo testigole Jeobá xi sʼa toje tíjna nga je kʼoámjekao jngo ti kʼoa tsa jngo tsoti xi tsín testigole Jeobá ma. Tongisa nʼio chjíle nga miyole Niná maa tikʼoajinni nga je nimiyoaa jngo chjota xi tsín tsjoake je Jeobá. Toje si̱miyoaa xi kʼoasʼin fikao yaole josʼin mele je Niná. Je Jesús kitso: “Toʼyanibe xi kʼoasʼin sʼín josʼin mele Niná, jebi xi ñaki ndsʼe” (Marcos 3:35).

8. Jméni xi koanle je chjota israelita nga je kisimiyo chjota xi chʼao sʼín.

⁸ ʼYani xi je símiyo je xi chʼao sʼín tse kjoa batiojin. Tobʼelañá, je Jeobá kʼoakitsole je chjota israelita nga tsín je katasímiyo je chjota xi ya tjín ʼya ʼNde jña kitsole nga tsjoále. Kitsole: “Ali tsa xkólijin basenlai je ninále kʼoa nikuijinla nimetokuin nga je si̱xálai, kʼoa alikui koa̱n kui kʼoasʼiain jmeni xi sʼín je. Tosa tikixojain kʼoa tixkoai je xjáo xi sʼetsʼoale. Kʼoa jon jé Jeobá Nináno si̱xálao” (Éxodo 23:24, 25). Tonga me ngatsʼi je chjota israelita nga tsín tsakʼaʼén kʼoa nʼio tse jée kitsaojin (Salmo 106:35-39). Jméni xi koan nga koanskanni.  Je Jeobá tsakʼasjengi je naxinandá Israel kʼoa jé jtín xi tsʼe Cristo xi naxinandále kisikao (Mateo 23:38; Hechos 2:1-4).

9. Ánni nga nʼio nkjín pelíkula, programa xi tsʼe telebisión, canción kʼoa xi faʼaitʼa Internet nga tsín kixi tjíosíni.

⁹ Nʼio nkjín pelíkula, programa xi tsʼe telebisión, canción kʼoa xi faʼaitʼa Internet xi tsín kixi tjío. Tsa tsín si̱kuindalee yaoná koa̱nkjinlee Niná. Kʼiatsa kui kjuintjenngiaa tochale kui si̱miyoaa jmeni xi chonle sonʼnde je Na̱i ʼndele nga je Jeobá si̱nʼiotʼaa kʼoa nga kui si̱nʼiotʼaa jmeni xi tongini tsoná. Alikui koa̱n kui chótsenlee, kʼoa tsakui kʼoéxkiaa kʼoa tsakui kuinóʼyalee xi kui simekonná jmeni xi chʼaotjín (Tito 2:12).

10. Jméni xi koa̱nle je pelíkula, xo̱n, canción kao pájina xi tsʼe Internet xi chʼao tjío.

¹⁰ Jeme tjóxin jmeni xi chonle sonʼnde je Na̱i kʼoa alikui tisʼe̱ni je pelíkula, libro, xo̱n kao pájina xi tsʼe Internet xi chʼao tjío. Ya Biblia kʼoatso nga kjoeson jme xi chon sonʼnde, tonga je xi kʼoasʼín josʼin mele Niná koatio ngantsjai nichxin (1 Juan 2:17). Je libro xi tsʼe Salmo kʼoati tso nga si̱kjeson je chjotatsʼen, tonga je chjota xi kixi ñaki tsjoa sa̱tío kon nga koatio ngantsjai nichxin i̱ Sonʼnde nga sʼe̱ kjoanyʼán (Salmo 37:9, 11, 29).

11. Jósʼin basenkaoná je Jeobá nga kixi kjuintʼalee.

¹¹ Ñandia kʼianga tíbʼétsʼoa Jesús, kʼoakitso kʼiatsa mená nga kuiyoaa ngantsjai nichxin, machjénní nga nda kataʼyaa je Jeobá kao je ʼNdíle (Juan 17:3). Tije Niná basenkaoniná nga ʼyaxkoaan kʼoa nga kixi kjuintʼalee. Jósʼin basenkaoná. Kui síchjén naxinandále. Alikui mangóson kao jmeni xi chon je sonʼnde nga̱ je naxinandále Niná kui bakóyaná jmeni xi sʼiaan nga kuiyoaa ngantsjai nichxin. Kʼoa bʼasjee je xo̱n, video kao pájina xi tsʼe Internet xi kui faʼaitʼa. Xi ijngosani, bakóyaná kʼianga mangián kjoajtínná. Kʼoa tsʼato 110,000 mani jtín xi tjío jngo tjíjtsa Sonʼnde jñani mañaa. Jmeni xi ʼmiyaná ya kjoajtínná kao ya kjoajtíntsená kui xi basenkaoná nga nʼiosa ninʼiotʼaa je Jeobá kao jmeni xi tongini tsoná (Hebreos 10:24, 25).

12. Ánni nga toje kuixankaosíñá xi ngóson sʼin makjainná.

¹² Kʼiatsa mená kuixaan, kʼoati nʼio nda si̱kuindaa yaoná. Ya Biblia kʼoatsoná nga tsín koa̱n je kuitómjekoaa jngo chjota xi tsín Jeobá síxále, nga̱ tsín mangósoán. Kʼoasʼin mangóson joni tsa xi isen tíjna kao xi njio tíjna (2 Corintios 6:14). Ya Biblia kʼoati tso nga toje kuixankoaa xi ngóson sʼin makjainná (1 Corintios 7:39). Kui xi tsonile nga toje kuixankoaa jngo testigole Jeobá xi jekisʼenngindá, xi bexkón je kjoatéxomale Niná. Kʼiatsa je kuixankoaa jngo chjota xi tsjoake Jeobá, koasenkaoná nga kixi kjuintʼalee je Niná.

13. Jméni xi kitsole Jeobá je chjota israelita.

¹³ Je Jeobá bení jmeni xi nda sikatíoná. Kʼoa ngantsjainí nga kʼoatsole je choʼndale nga toje katabixankao xi kʼoati je síxále. Tobʼelañá, je Jeobá kʼoakitsole je chjota israelita nga tsín je katabixankao je chjota xi kjaʼaí niná bʼétsʼoale. Ánni kʼoakitsosínile. Kuinga skénʼndóbʼakjá je chjota israelita nga kjaʼaí niná kʼoetsʼoale. Xi ijngosani, je Jeobá kʼoakitsole kʼiatsa tsín sitjoson, nʼio koa̱njtile kʼoa sikjeson (Deuteronomio 7:3, 4).

14, 15. Jméni xi koanle je Salomón kʼianga tsín kisitjosonle je Jeobá.

 ¹⁴ Kʼianga jerey koan je Salomón ya naxinandá Israel, tsakʼétsʼoale je Jeobá nga kisijéle kjoachjine. Je Jeobá kitsjoale kjoachjine kʼoa je Salomón nʼio tsʼaxki̱ nga nʼio chjine koan kʼoa nʼio nyiná koan naxinandále. Ya Biblia kʼoatso nga saʼnda jngo chjoón xi xin naxinandále xi reina sʼin tíjna kichosíxatʼa nga kinrʼoé kʼianga nʼio chjine kʼoa nʼio nyiná je Salomón. Kʼoa kʼianga jetsabe tokʼoakoanle (1 Reyes 10:7). Ninga kʼoalani, jmeni xi koanle je Salomón nga koanskanni kui bakóyaná jmeni xi koa̱nná kʼiatsa tsín si̱tjosoán kʼoa je kuixankoaa jngo chjota xi tsín Jeobá síxále (Eclesiastés 4:13).

¹⁵ Ninga nʼio tse kjoanda kitsjoale Salomón je Jeobá, je Salomón alikui kisitjoson. “Nʼio nkjín yánchjín xi xin naxinandále” chixankao. Jngo jmi yánchjín kisʼele. Jméni xi koanle nga tsín kisitjosonle je Jeobá. Kʼianga jekoanjchínga, alikui tikixi kitʼanile Jeobá xi totʼatsʼe yánchjínle (1 Reyes 11:1-6). Kʼiatsa kʼoakoan je Salomón ninga nʼio chjine koan, kʼoati koaan tsanda ñá tsa tsín si̱kuindaa yaoná. Kuinga tsín koa̱n kui cha̱niyasíñá jkoaa nga je kuixankoaa jngo chjota xi tsín tsjoake Jeobá.

16. Jmé xi sʼin jngo testigole Jeobá xi tsín makjainle je chjoónle kʼoa tsa xʼinle.

¹⁶ Kʼiatsa jngo xi jechixan, kʼoa testigole Jeobá koa̱n, jmé xi sʼin. Je Biblia itso xi tʼatsʼe je yánchjín: “Nangi tiyolao xʼinno, jméni nga je xʼinno xi tsín makjainle je énle Niná kuinje̱tʼasínile Cristo, ali totʼatsʼe énle yánchjínlejin, tokui kjoa nga nda fikao yaole je yánchjínle” (1 Pedro 3:1). Jótsonile én jebi. Kʼiatsa je chjoón xi  kʼoenele yaole nga ñaki nda sʼin kʼoa koaitjenngi kjoafaʼaitsjen xi tsjoá je Biblia, tsakui nichxin skoe̱ je xʼinle nga sa tísíndaya sa tísíndaya yaole kʼoa kʼoati testigole Jeobá koa̱n tsanda je. Nkjín chjota xi jechixan xi jesa kʼoakoan. Kʼoa tsa jngo ndsʼee xi tsín testigole Jeobá ma je chjoónle kʼoati kui kjoafaʼaitsjen koaitjenngi xi tso ya 1 Pedro 3:1.

17, 18. 1) Jméni xi tsakasenkao je Noé nga kitjontjaile yaole nga jaʼai jtsínʼio. 2) Jméni xi tsakinyakao je chjotale Cristo nga kitjontjaile yaole nga kichonikje Jerusalén.

¹⁷ Kʼiatsa je si̱miyoaa je chjota xi chʼao sʼín tochale kʼoati tsín tisi̱tjosonnilee tsanda ñá je Jeobá. Tonga tsa je si̱miyoaa je xi nda sʼín koasenkaoná nga kixi kjuintʼalee je Niná. Si̱kjaʼaitsjenla je choa̱le Noé. Kʼianga tsakʼejna Noé, je chjota ñaki tokui kisikjaʼaitsjen nga kui kʼoasʼin xi chʼaotjín (Génesis 6:5). Je chjota nʼio tsʼen koan kʼoa je Jeobá kisikjeson ngatsʼi. Tonga ya Biblia kʼoatso nga ñaki kixi koan je Noé kʼoa nga je kisitjosonle ngantsjai je Jeobá (Génesis 6:7-9). Jméni xi tsakasenkao nga ñaki kixi koanni.

¹⁸ Je Noé alikui je kisimiyo je chjota xi tsín tsjoake je Jeobá. Tosa je chjoónle nʼio kisimiyo, kao xtile kʼoa kao yánchjínle xtile. Kʼoa tosa kui xá kisʼin ngatsʼi nga tsakʼénda je arca kʼoa nga kitsoyason (2 Pedro 2:5). Kui xi tsakinyakao nga kitjontjaile yaole kʼianga jaʼai Jtsínʼio. Kʼoa ngatsʼiaa xi tiyoaa ndʼaibi, yaa jaʼaiñá je ntje̱le Noé kao familiale. Bʼailee kjoanda kʼianga kisitjosonle Niná kʼoa nga tsín je kisimiyo chjota xi chʼao kisʼin. Kʼoa je chjotale Cristo xi títjon tsakatio kʼoati kisitjosonle Niná, alikui je kisimiyo je chjota xi tsín tsjoake je Jeobá. Kui xi tsakinyakao nga kitjontjaile yaole nga kichonikje Jerusalén kʼianga nó 70 (Lucas 21:20-22).

19. Jméni xi sʼiaan kʼiatsa mená nga tosi tonda kixi kjuintʼalee je Jeobá.

¹⁹ Kʼiatsa mená nga tosi tonda kixi kjuintʼalee je Jeobá nichxin fetʼa xi tiyoaa ndʼaibi, jméni xi sʼiaan (1 Corintios 16:13; Proverbios 13:20). Koanngíntjenngiaa choa̱le Noé kao familiale kʼoa kao chjotale Cristo xi títjon tsakatio. Ninroajinla nichxin nga je si̱miyoaa je chjota xi tsín tsjoake je Jeobá. Si̱kjaʼaitsjeen nga miyón mani je ndsʼee xi kixi tjíofitʼale Niná xi koa̱n miyoná koa̱n. Je kuinyakaoná nga kixi kjuintʼalee Niná kʼoa kuinje̱ngilee yaoná nga sikjeson Niná je sonʼnde kʼoa koaan kuiyoaa ya ʼNdenaxó. Kuinga nda chjoéjinsíñá miyoná nichxin fetʼa xi tiyoaa ndʼaibi.