XI NGISA TÍNCHJA̱NI REBISTA JEBI: A BASENKAONÁ NGA BʼETSʼOAA
Ánni bʼétsʼoani je chjota
“Nʼio kitsjentʼale je kjoaniská. Nga mena nʼio tse tao̱n kuinje̱na tsakʼetsʼoaña. Tonga likuikʼia kinjena.” (Samuel, * Kenia)
“Ya ndʼiaskuela to kjoachikon tsakʼinyanajin kʼoa jetojkuijin binyaijin.” (Teresa, Filipinas)
“Bʼetsʼoaña nga kjoa tjínna. Kʼoati bʼetsʼoa nga sijé kjoanichatʼa kʼoa nga katabasenkaona Niná nga nda sʼian.” (Magdalene, Ghana)
Tojo tso je Samuel, Teresa kao Magdalene kui tsoyaná nga nkjín koya anni nga bʼétsʼoani je chjota. Tjínkʼa xi ndatjín jmeni xi síjé kʼoa tjínkʼa xi mai. Tjínkʼa xi ñaki ni̱ma̱le nroajinni nga bʼétsʼoa kʼoa tjínkʼa xi mai. Ninga nkjín koya anni nga bʼétsʼoani je chjota, miyón mani xi kʼoasʼín nga̱ be nga machjénle kʼoetsʼoa. Tobʼelañá, tjínkʼa xi kui síjé nga kjoaʼato tsa xo̱nle, nga kuinje̱le je equipo xi finile, nga nda koatio familiale kʼoa tsa kjaʼaísanile xi síjé. Kʼoa ʼyale nga bʼétsʼoa je chjota ninga je xi tsín relijión tjíojin.
Kʼoa ji, jméni xi nijái nga bʼetsʼoai. Tsa ngali nga bʼetsʼoai kʼoa ninga mai, tsakui nichxin chjonangilai yaoli tsa basenkaoná kʼianga bʼetsʼoaa kʼoa tsa tíjna ʼyani xi nrʼoéná. Jngo chjota xi xo̱n kji kʼoatso nga kuinga bʼetsʼoañá “nga nda sʼe tokoán [...;] joni tsa jngo jti̱ tíjnaná xi chja̱koaa” tojoni nga nda sʼe̱ tokoán. Tjínkʼa chjinexki xi kʼoatisʼin síkjaʼaitsjen, kʼoatso “nga basenkaoná nga mandayaa tsa chʼin tjínná”. Jósʼin nikjaʼaitsjain ji. A kuinga toje kʼoasʼin ngale chjota nga bʼétsʼoani, axo kuinga mele nga nda sa̱tío kon.
Je Biblia kʼoatso nga tsín tsa tokʼoasʼin machjén je kjoabʼetsʼoa. Kʼoatso nga tíjna je xi nrʼoéna kʼiatsa kʼoasʼin kʼoétsʼoalee josʼin mele kʼoa tsakui si̱jélee jmeni xi ndatjín. Kataʼyala kʼaa choa̱ xi bakó nga nrʼoéle kjoabʼetsʼoaná.
^ párr. 3 Alikui tsa ñaki kʼoaʼmi kʼa chjota xi bʼaxki̱ ibi.
