XI NGISA TÍNCHJA̱NI REBISTA JEBI: A BASENKAONÁ NGA BʼETSʼOAA
Ánni nga menile Niná nga kʼoétsʼoalee
Niná mele nga si̱miyoaa
Kʼianga fáonajmí xi miyo fáo ngisasa mamiyole xínkjín. Je Niná kui xi mele nga chja̱kaonajmiá kʼoa nga miyole katamaa. Itso: “Jon kuinókjoanáo kʼoa kjoaʼaiño kʼoa kʼoétsʼoanáo, kʼoa an kjuinrʼoeno” (Jeremías 29:12). Kʼianga chja̱kaonajmiá Niná, koa̱nchriantʼalee kʼoa je kʼoati sichriantʼaná (Santiago 4:8). Je Biblia itso: “Je Jeobá chrian tíjnale ngatsʼi xi je básjai” (Salmo 145:18). Kʼiatsa kʼoétsʼoalee ngisa koa̱nmiyosaa.
“Je Jeobá chrian tíjnale ngatsʼi xi je básjai” (Salmo 145:18).
Je Niná mele koasenkaoná
Je Jesús i kitso: “ʼYá chjota xi tíjnajinjngono, tsa ʼndíle sijéle nioxtila, a la̱jao̱ tsjoále. Kʼoa tsa jti̱ sijéle, a ye̱ tsjoále. Tsa jon [...] mano nga nda bʼaikjoatjaolao xtino, je Nʼaino xi tíjna ngʼajmi, a tsí ngisasa tse tsjoále kjoatjaonda je xi síjéle” (Mateo 7:9-11). Je Niná mele nga kʼoétsʼoalee nga̱ mandosinle xi tʼatsaan kʼoa mele koasenkaoná (1 Pedro 5:7). Kʼoatsoná nga je si̱jélee nganʼio nga kjoa bitjatojiaan. Je Biblia itso: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo” (Filipenses 4:6).
Machjénná Niná
Je chjota xi kotʼayason jonʼia xi chjotaa, tjíobe nga siento miyón chjota xi bʼétsʼoa. Saʼnda bʼétsʼoaa chjota xi tsín makjainle nga tíjna Niná kʼoa kao xi tsínle relijión. * Jebi kui bakóná nga kʼoasʼin koanndaa nga si̱chriantʼalee Niná. Je Jesús i kitso: “Ali tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná” (Mateo 4:4). Nga koa̱nchriantʼalee Niná kʼiaa nga kjitʼa kʼoétsʼoalee.
Jókoa̱n tsa si̱chriantʼalee Niná.
^ párr. 8 Kʼianga nó 2012 je Centro de Investigación Pew kʼoatso nga jngo siento chjota, xi tsín makjainle nga tíjna Niná kʼoa kao xi tsínle relijión ya Estados Unidos, tejngo mani xi jngokʼa bʼétsʼoa nga jngo sá.
