Nʼio nkjín chjota xi kʼoatso nga toxitsjoa nga bʼetsʼoaa, nga tsín ʼya xi nrʼoéná. Tjínkʼa xi bʼétsʼoa, tonga joxi liʼya xi nrʼoéle male. Tobʼelañá, jngo chjota xi tsín makjainle tsa tíjna Niná, kui kisikjaʼaitsjen jokji Niná kʼoa i kitso nga tsakʼétsʼoale: “Ninga to chéché tinókjoanái”. Tonga kʼoakitso nga “likui kinchja̱ Niná”.

Tonga je Biblia kʼoatso nga nrʼoéná Niná kʼianga bʼetsʼoaa. Je Niná i kitsole jngo naxinandá nichxin kjoatse: “Je Niná koakoli kjoanda nga sójétʼalai; kʼianga kjuinrʼoéli, tsjoáli jme xi tinijélai” (Isaías 30:19). Kʼoa ijngo testo xi i̱ tso: “Je kjoabʼetsʼoale chjotakixi nda sasénle [Niná]” (Proverbios 15:8).

Ya Biblia faʼaitʼa josʼin kinrʼoéle Niná je chjota kʼianga tsakʼétsʼoale. Jngo testole Biblia xi kʼoatso nga je Jesús “tsakʼétsʼoa, kʼoa kisijé[le] nganʼio [...] je xi koanle tsʼasjentjaini ya kjoabiya [...,] kui nga kinoʼyanile” (Hebreos 5:7). Kʼoa faʼaitʼasa choa̱ ya Daniel 9:20, 21 kao 2 Crónicas 7:1.

Ánni kʼoasʼin síkjaʼaitsjen kʼasíni chjota nga tsín ʼya xi nrʼoéle nga bʼétsʼoa. Tsa mená nga kjuinrʼoéná je Jeobá, * tojékjoan xi kʼoétsʼoalee. Alikui koa̱n nga kjaʼaí niná kʼoétsʼoalee kʼoa nijejinla chjotajchínganá. Je Niná kui xi mele nga kui si̱jélee “josʼin mele nga je”. Tsa kʼoasʼiaan kjuinrʼoéná (1 Juan 5:14). Tsa mená nga kjuinrʼoéná Niná, tjínnele nga jchaa kʼoa si̱tjosonlee.

Nʼio nkjín chjota xi kʼoatso nga tsín tsa tokui nga relijión tjínná nga bʼetsʼoañá, nga̱ Niná nrʼoé kjoaixiná kʼianga bʼetsʼoalee. Je Isaac, xi Kenia tsʼe itso: “Tsakʼetsʼoaña nga katamajinna jmeni xi tso je Biblia. Kʼoa tochoatse jaʼato, nga jngo chjota kichonrʼoena xi tsakasenkaona”. Je Hilda, xi ya Filipinas tsʼe, koanmele nga tsín tina̱jno̱ skiénni. Tsakásjaile jokisʼin nga mele sikʼéjna, tonga alikui kʼoakoanle. Je xʼinle kʼoakitsole nga je Niná katasíjéle nganʼio. Kʼoa nga jetsakʼétsʼoa itso: “Tokʼoakoanna josʼin tsakasenkaona. Tsín tikisijénina na̱jno̱. Koan kisikʼéjna”.

A kjuinrʼoéli Niná tsakui si̱jélai jmeni xi nda tíjna ngixko̱n.