XI NGISA TÍNCHJA̱NI REBISTA JEBI: JÓSʼIN SÍKJAʼAITSJEN NINÁ XI TʼATSʼE KJOAJCHÁN
Jósʼin síkjaʼaitsjen Niná xi tʼatsʼe kjoajchán nichxin xi tiyoaa ndʼaibi
Nichxin xi tiyoaa ndʼaibi, nʼio nkjín chjota xi totaon tjíoʼya. Kʼoa tjíosíjéle Niná nga katabinyakao, kʼoa kui síkjaʼaitsjen tsa kuichoka nichxin nga kjuinrʼoéle je Niná. Kʼoa tjínkʼa xi kjoajchán batío nga tsín mele nga totaon jcha. A tísasénle Niná nga kʼoatjíosʼín kʼoa a tjíobinyakao.
Je kjoajchán xi tsʼe Armagedón kjoaʼaxin ngayeje kjoajchán xi tjíosatío
Je Niná bení kjoañʼai xi tjín i̱ Sonʼnde kʼoa alikui tojyó kʼoéjna (Salmo 72:13, 14). Ya Biblia kʼoatso kʼianga je Niná tsjoále kjoanyʼántokon je xi kjoañʼai tjíofaʼá. Kʼoa kʼiáni kʼoasʼin. Kʼiaa “nga koa̱ntsen Nainá Jesús, nga kjuinroani ngʼajmi kao ánkje xi bakó nganʼiole. [...] Tsjoále kjoañʼai je xi tsín tsabe Niná, kʼoa xi tsín sítjosonle je énnda xi tʼatsʼe Nainá Jesucristo” (2 Tesalonicenses 1:7, 8). Jebi kʼiaa kʼoakoa̱n nichxin xi nroaján kʼianga sʼe̱jna Armagedón, je kjoajchán “xi tsʼe Niná xi batéxoma ngayije” (Apocalipsis 16:14, 16).
Kʼianga kuichoka nichxin jebi, je Niná jé Jesucristo kʼoa kao je xi tjío ngʼajmi sikasén kʼianga sikjeson chjotatsʼen, ali tsa jejin chjotasonʼnde sikasén. Je ʼNdíle Niná kʼoa kao je xi tjío ngʼajmi ñaki kjoaʼaxin xi chʼaotjín kʼoa tsín tiʼya xi taon jchani (Isaías 11:4; Apocalipsis 19:11-16).
Je Niná alikui tísíkʼantjaiya kjoafaʼaitsjenle xi tʼatsʼe kjoajchán. Tojo kʼoasʼin síkjaʼaitsjen Niná nga kui xá kʼoejnani kjoajchán nga kjoaʼaxin je kjoatsʼen kʼoa nga tsín titotaon jchani je chjota. Tojo kisʼin nichxin kjoatse, toje Niná xi tiʼndele nga kʼoakuitso kʼiáni sʼe̱jna je kjoajchán kʼoa ʼyáni xi koaijin. ʼYañá nga kʼoatso je Niná nga kjoaʼaxin kjoatsʼen nichxin xi nroaján kʼianga kʼoasjentjai je xi kjoañʼai tjíofaʼá kʼoa nga je Jesucristo koasentítjonle kjoajchán xi sʼe̱jna. Én jebi kui xi tsonile nga tsín sasénle Niná je kjoajchán xi satío ndʼaibi ninga kui kʼoasʼínni je chjota nga mele nda koatio.
Cha̱niyalai jkui choa̱ jebi. Jao mani xti xi kján nga tsín je pale. Jyó batio ngotjo kʼoa nchjaale teléfono je pale kʼoa jngo xi kʼoatso nga je xi ijngo kabʼétsʼiakao, kʼoa je xotíʼmile kʼoatso nga je ndsʼe̱ kabʼéle. Nga jao xti jebi, kui xi mele nga jngó jngó nga je pale tsjoánganʼiole. Kʼianga jenrʼoéle nga jao xtile kʼoatsole nga tsín tikatakjánni kʼoa nga kʼia kjoakao nga jekuicho. Nga jao makjain choatsele, tonga tikjánngáni xijemani. Kʼianga jefaʼai pale, kjánkao nga jao nga tsín kasítjosonle.
Nichxin xi tiyoaa ndʼaibi, je naxinandá xi kjoajchán tjíosʼín kjitʼaa síjéle nganʼio je Niná. Tonga je Niná alikui ya fajin. Je Biblia itso: “Ali chʼaojin nikao je xi chʼao síkaono”, kʼoa xijema itso: “Ali nijndajinnio” (Romanos 12:17, 19). Je Niná jetongini tíbájinkon je chjota nga tsejta katama saʼnda nga kjoaʼaíkao kjoajchán xi Armagedón ʼmi (Salmo 37:7). Je Niná alikui sasénle nga tije kjánni je naxinandá, nga̱ tsín tiʼndele nga kʼoasʼin. Je Niná kʼiaa koako kjoajtile kʼianga kjoaʼaí Armagedón kʼoa alikui tisʼe̱ni kjoajchán jngo tjíjtsa Sonʼnde (Salmo 46:9; Isaías 34:2). Je Armagedón kui xi kjoaʼaxin kjoajchán xi tjíosatío ngakjijnda sonʼnde.
Je kjoanichikontʼain xi kjoaʼaíkao je Chjotaxále Niná kuinga kjoaʼaxin je kjoajchán. Je Jesús i kitso kʼianga tsakʼéjna je kjoabʼetsʼoa: “Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:10). Ali tsa tokjoajchánjin xi kjoaʼaxin je Niná kʼoati kjoaʼaxin je kjoatsʼen nga̱ yaa nroani nga kjoajchán sʼe (Salmo 37:9, 10, 14, 15). * Ñá xi chjotale Cristo maa, kʼoati jemená nga katabitjoson jmeni xi sʼin je Chjotaxále Niná (2 Pedro 3:13).
A tsesa chale nga kjoaʼaxin Chjotaxále Niná je kjoañʼai, kjoatsʼen kʼoa nga totaon tjíoʼya je chjota. Kʼianga jetíbitjoson jmeni xi tongini kitso je Biblia kui xi bakóná nga jenichxin fetʼa tiyoaa ndʼaibi (2 Timoteo 3:1-5). * Jetochoatsesa chale nga je Chjotaxále Niná koatexoma i̱ Sonʼnde kʼianga jekjoaʼato Armagedón.
Tojo sʼin jekaʼyaa, je chjota xi ya kuiyájin Armagedón jéní chjota xi tsín sitjoson “je énnda xi tʼatsʼe Nainá Jesucristo” (2 Tesalonicenses 1:8). Tonga tikjaʼaitsjain kʼianga tsín sasénle Niná nga ʼya xi biya, nijejinla chjota xi tsʼen (Ezequiel 33:11). Je Niná “kaile nga jngo xi cha̱” kʼianga sʼe̱jna kjoajchán jebi, kui xi mele kʼianga kataʼmiyason énnda chjotse “ngakijnda sonʼnde, nga si̱kixiyandale ngatsʼi naxinandá” kʼianga kjesa faʼaijin je kjoafetʼa (2 Pedro 3:8, 9; Mateo 24:14; 1 Timoteo 2:3, 4). Kʼianga kʼoasʼin tjíotsoyason je testigole Jeobá jngo tjíjtsa Sonʼnde, tiʼndesale je chjota nga katabe je Niná, nga katasítjoson je énnda chjotse xi tʼatsʼe Nainá Jesús kʼoa nga koa̱n ya koatio jngo sonʼnde chjotse jñani tsín tikjoajchán sʼe̱ni.
^ párr. 9 Je Chjotaxále Niná kʼoati kjoaʼaxin je kjoabiya. Tojosʼin faʼaitʼa ya kjoaʼmiya jñani “Jmeni xi chjonangiaa xi tʼatsʼe Biblia” tso. Je Niná miyón chjota sikjaʼáyale, saʼnda je chjota xi kjoajchán kʼienjin.
^ párr. 10 Kʼiatsa mesali jchai xi tʼatsʼe nichxin fikjetʼa, chótʼajin ya kjoaʼmiya 9 xi tsʼe libro xi Jmé kjoanni xi bakóya je Biblia ʼmi. Libro jebi jé testigole Jeobá bʼasje.