1. 1) Jméni xi ngisa bakó Niná. 2) Jósʼe tokoán nga ʼyaa nga kjoatsjoacha je Niná.

JE Biblia kʼoatso nga “kjoatjaocha” je Niná (1 Juan 4:8). Kui xi tsonile nga kui kjoatsjoacha xi ngisa bakó. Ali tsa to tjínjinle kjoatsjoacha, ñaki kjoatsjoachaní. Ngayeje jmeni xi sʼín, kui kʼoasʼínni nga tjínle kjoatsjoacha. Nʼio bʼailee kjoanda Niná nga kui kjoatsjoachale xokisikao nga kisinda ngʼajmi kao Sonʼnde kʼoa nga tjín kjoabijnachon.

2. Nga ʼyaa nga tsjoakená je Jeobá, jméni xi tsín jao sʼe tokoán (chótsenlai sén xi faʼaitʼa ibi).

² Je Jeobá nʼio tsjoake ngayeje jmeni xi kisinda. Kuinga tjínjngoni tokoán nga sitjoson jmeni xi tso. Tobʼelañá, nga tsjoakená Niná, “tsakʼéjna jngo nichxin kʼia nga kʼoendajin[le] sonʼnde kao xi kjoakixi”, kʼoa jé Jesucristo kitsjoale xá nga kʼoasʼin (Hechos 17:31). Alikui jao sʼe tokoán nga kao kjoatéxomakixi kʼoendajinle chjota je Jesucristo. Ngatsʼi je chjota xi sitjosonle Niná koatio ngantsjai nichxin, tsjoa satío kon kʼoa nʼio ndasʼin koatio.

3. Jmé xi choyalee nichxin xi nroaján tsa tsínlani tsjoakená je Jeobá.

³ Jmé xi choyalee nichxin xi nroaján tsa tsínlani tsjoakená je Jeobá. Tojo jejin chjota koatexomale xínkjín kʼoa tojo jejin Na̱i koanentsja (2 Corintios 4:4; 1 Juan 5:19; tʼexkiai Apocalipsis 12:9, 12). Likuijin nda kuiyoaa.

4. Ánni kitsjoaʼndeni je Jeobá nga yátsʼi̱n tsakasénle je Na̱i.

⁴ Je Na̱i yátsʼi̱n tsakasénle Jeobá kʼoa kʼoati je xokisikao Adán kao Eva nga yátsʼi̱n tsakinyále Jeobá. Kʼoakitso nga tsínle ʼnde nga je Niná koatexoma. Kʼoa kʼoakitso nga ngisa nda batéxoma je tikʼoajinni Niná (Génesis 3:1-5). Nga nʼio chjine je Jeobá, kitsjoaʼndele je Na̱i nga katabakó tsa kʼoatjín jmeni xi kitso. Tonga jokji tínroa nichxin tíʼyale nga tsín nda batexoma je Na̱i kao chjotasonʼnde.

5. Jméni xi tíʼyale jokji tífaʼato nichxin.

⁵ Nichxin xi tiyoaa ndʼaibi, sa chʼao sa chʼao kjimachon. Je xi jngo siento nó tífaʼato, tsʼato jngo siento miyón chjota xi kjoajchán kʼienjin. Je Biblia kʼoatso nga “je nichxin xi kjoetʼa” je chjota sa chʼao sa chʼao koa̱nkjoan (2 Timoteo 3:1, 13). Je Biblia kʼoati tso “nga je chjota likui koa̱n nga toje skién ndiaale. Saʼnda likui bakinle je chjota xi tsoʼba nga je koandiaale yaole” (Jeremías 10:23). Ñaki kʼoatjín jotso én jebi. Jokji tífaʼato nichxin tíʼyale nga tsínkui xá kisindaniná je Jeobá nga ñá koatexomalee yaoná.

6. Ánni nga títsjoáʼndeni Niná nga tojo tjín chjotatsʼen.

⁶ Ánni nga títsjoáʼndeni Niná nga tojo tjín chjotatsʼen. Kuinga kʼoasʼin tíʼyanile nga toje Niná xi male nda batéxoma. Nichxin xi nroaján je Niná kjoaʼaxin ngatsʼi chjotatsʼen. Tonga nga kʼia, tsa ʼyani xi ijngokʼa kʼoakuitso nga tsín nda batéxoma je Niná, kjitʼanangi tjóxin. Nga̱ jetíʼyale ndʼaibi nga tsín ndasʼin bichótsjoá nga yátsʼi̱n binyále Niná je chjota. Je Niná likui titsjoáʼndeni nga chʼaosʼin ijngokʼa je chjota.

7, 8. Jósʼin bakó je Jeobá nga tsjoakená.

⁷ Nʼio nkjín koya josʼin bakóná Niná nga tsjoakená. Tosi̱kjaʼaitsjenla jonaskánachon je Sonʼnde kʼoa jokji ngʼajmi. Ya ngʼá nʼio nkjín jmi miyón planeta kao niño tjín. Tobʼelañá, je tsʼuí kʼoati niño. Tsa tsín je tsʼuí alikui sʼe̱ kjoabijnachon i̱ Sonʼnde. Tojo tso Romanos 1:20, ngayeje tsojmi xi koannda kui bakóná nga je kisindaná Jeobá kʼoa nga tjínle nganʼio, kjoachjine kao kjoatsjoacha.

⁸ Je Jeobá kʼoasʼin tsakʼénda Sonʼnde nga koa̱n kuiyosoán. Jngo ʼndenaxó tsakʼéjna jñani koatio chjota kʼoa kʼoasʼin tsakʼénda je xokoajko̱ kao yao xi kitsjoale nga koa̱n koatio ngantsjai nichxin (tʼexkiai Apocalipsis 4:11). Kʼoa Salmo 136:25 kʼoatso nga je Jeobá títsjoále ngatsʼi xi tjíokon jmeni xi machjénle nga̱ tsínkʼia fetʼa kjoatsjoachale.

9. Jmé xi jtike je Jeobá.

⁹ Ninga kjoatsjoacha je Jeobá jtike xi chʼaotjín. Salmo 5:4-6 kʼoatso nga tsín tsjoake xi chʼaotjín kʼoa nga jtike kjoatsʼen kao énndiso.

10, 11. 1) Jméni xi jeme koa̱nle je chjotatsʼen. 2) Jmé kjoanda xi tsjoále Jeobá je xi sitjosonle.

¹⁰ Tojosʼin tiʼyaa, je Jeobá kjoatsjoachaní kʼoa jtike ngayeje xi chʼaotjín. Kuinga kjoaʼaxinni ngayeje xi chʼaotjín kʼianga kuichoka choa̱le. Je Biblia kʼoatso nga “je chjota xi tsʼen ni̱kjesonní, tonga je xi je  Jeobá koyale tsʼee koan i̱ sonʼnde”. Kʼoati tso nga jeme tjóxin je xi jtike Jeobá (Salmo 37:9, 10, 20).

¹¹ Jmé kjoanda xi tsjoále Jeobá je xi sitjosonle. Nʼio tse kjoanda tsjoále. Je Biblia itso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Salmos 37:29). Je chjota xi kixi kʼoaitʼale Niná nʼio tsjoa satío kon kʼoa nyʼán koatio (Salmo 37:11). Ánni. Nga̱ je Jeobá kui xi mele nga nda koatio je choʼndale xi kixi fitʼale. Je Biblia kʼoatso nga “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male”. Tokjoaʼato ngayeje xi chʼaotjín (Apocalipsis 21:4).

12. Tsa mená ndasʼin skoe̱konná je Jeobá, jméni xi sʼiaan.

¹² Salmo 37:37, 38 kʼoatso nga “je xi tsín jée tíbajngi” nyʼán kʼoéjna nichxin xi nroaján. Kʼoati tso nga je Niná sikjeson je chjotatsʼen kao xi tsín sítjoson. Tsa mená nga ndasʼin skoe̱konná je Jeobá, tjínnele nga jchaa xi tʼatsʼe kʼoa tʼatsʼe ʼNdíle, kʼoa si̱tjosonlee ngayeje jmeni xi tsoná je Jeobá (tʼexkiai Juan 17:3). Ñaki kʼoakʼoé tokoán nga jeme tjóxin jmeni xi chon sonʼnde, “tonga je xi sítjoson jo tso Niná ñaki kʼoasʼin bʼejna ngantsjai” (1 Juan 2:17). Nga jeme kjoetʼa jmeni xi chon sonʼnde, nʼio machjén nga kjuintjenngiaa kjoafaʼaitsjen xi tsjoá je Biblia, itso: “Tinʼiotʼai je Jeobá kʼoa tʼintjenngi je ndiaale” (Salmos 37:34).

13. Jméni xi ngisasa bakó nga tsjoakená je Niná.

¹³ Ninga chjotajée maa, koaan si̱tjosonlee je Jeobá. Kʼoati koa̱n miyoná koa̱nni xi totʼatsʼe nga tsakʼéchjíntjainá je Jesús. Kʼoa kui xi ngisasa bakóná nga tsjoakená je Niná. Kui xá kisikasénni Niná je ʼNdíle nga kʼienntjainá nga koa̱n ndaí sʼin kuiyolee je jée kao kjoabiya tsa si̱tjosonlee (tʼexkiai Romanos 5:12; 6:23). Je Jeobá be nga kixi koaitʼale je Jesús i̱ Sonʼnde, nga̱ kixi koan ya ngʼajmi. Je Jeobá nʼio aon koanle nga totaon tsaʼya je ʼNdíle nga jaʼai i̱ Sonʼnde. Tonga je Jesús kisitoánntjai ngantsjai nga je Niná bakinle koatexomaná. Kʼoati tsakakó nga koa̱n kixi koaitʼale Niná jngo chjota xi tsje ninga nʼio ñʼai kjoa kjoaʼatojin.

14, 15. Jósʼin basenkaoná ngatsʼiaa nga kʼienntjainá je Jesús.

¹⁴ Je Jesús tse kjoañʼai tsakjaʼá, kixi koan saʼnda nga kinikʼien kʼoa kisitoánntjai nga toje Nʼaile xi tiʼndele nga koatexoma. Jósʼin basenkaoná ngatsʼiaa nga kʼienntjainá je Jesús. Koaan kuiyoaa ngantsjai nichxin ya sonʼndenaxó. Je pastro Pablo kʼoakitso nga je kjoabʼechjíntjai kui bakóná nga nʼio tsjoakená je Jeobá kao Jesús. I kitso: “Xi kjoakixi likuila kuiyántjai jngo chjota xi tʼatsʼe chjotakjoakixi, tonga tsa kui nichxin nga jngo xi koa̱nnʼiokon nga kuiyántjai xi tʼatsʼe jngo chjotanda. Tonga Niná bakókixi kjoatjaochale xi tʼatsaan nga Cristo kʼen xi tʼatsaan, kʼia nga tojo chjotajée nía” (Romanos 5:6-8). Kʼoa je pastro Juan i kitso: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá. Kisikasén ʼndíle xi jéentjainá koanle” (1 Juan 4:9, 10).

¹⁵ Je Jesús kʼoakitso nga “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi  makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Ningalani nʼio aon koanle je Jeobá, kitsjoaʼnde nga kʼienntjainá je ʼNdíle. Jebi kui xi bakóná nga nʼio tsjoakená, kʼoa tsjoake koa̱nná ngantsjai. Kuinga i̱ kitsosíni je Pablo: “Ñaki tjíjngole koan, nga nikjoabiyajin, nikjoabijnachonjin, niʼánkjejin, ni xi ngʼajko̱lejin, nijejin xi tjínle nganʼio, ni xi ndʼaibijin, nije xi sʼa nroajin, ni xi ngʼajin, ni xi nangijin, nitojngojinsa xi xá kisʼendani xi koa̱n kjoaʼaxinná je kjoatjaochale Niná nga tiyokoaa Cristo Jesús Nainá” (Romanos 8:38, 39).

16. 1) Jméni je xi Chjotaxále Niná ʼmi. 2) ʼYáni xi tsakʼaile xá nga koatexoma.

¹⁶ Ijngosa koya josʼin bakóná je Jeobá nga tsjoakená kuinga jngo chjotaxá tsakasénnda. Kʼoa je xi kitsjoale xá nga koatexoma jé xi tsjoake je chjotasonʼnde kʼoa xi nda koatexomale (Proverbios 8:31). Je xi koatexoma jé Jesucristo. Je Niná, jngo siento kao ñachanño jmi chjota kiskoejin nga koatexomakao Jesús ya ngʼajmi. Kʼianga faʼáyale ya ngʼajmi chjota jebi, jetjínle kjoafaʼaitsjen josʼin tsakatio i̱ Sonʼnde (Apocalipsis 14:1). Kʼianga tsakʼejna i̱ Sonʼnde je Jesús, je xi nʼio kinchja̱ni nga kitsoyason kui tʼatsʼe Chjotaxále Niná. I kitsole je chjotale: “Jon kʼuisʼin tʼetsʼoao: Nʼainajin xi tijnai ngʼajmi, kataʼyaxkón jaʼaínli. Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:9, 10). Ñaki jetichoyalee nga kuitjoson kjoabʼetsʼoa jebi kʼoa nga kjoaʼaíkao kjoanichikontʼain je Chjotaxále Niná.

17. Jméni xi tsín mangóson josʼin batéxoma je Jesús kʼoa kao josʼin batéxoma je chjotasonʼnde.

¹⁷ Alikui mangóson josʼin batéxoma je Jesús kʼoa kao josʼin batéxoma je chjotasonʼnde. Je chjotasonʼnde tjíobatío kjoajchán kʼoa miyón chjota tjíobiya. Tonga je Jesús tsjoakená kʼoa kʼoati kjoan jokjoan je Jeobá, jolani nga tjínle kjoatsjoacha (Apocalipsis 7:10, 16, 17). Je Jesús i kitso: “Nroachonnáo ngatsʼio xi nʼio tinixáo kʼoa xi tse chʼá tichʼao, nga an xi sikʼéyokjáyano. Tjayasonlao yaono yugo xi tsʼan, chótʼayao xi tsʼan, nga ndʼénía, kʼoa yo̱ma̱ kjiakoan. Kʼoa sa̱kono kjoanikjáya xi tʼatsʼe ni̱ma̱no. Nga̱ yugona ali ñʼaijin, kʼoa tja̱ní chʼána” (Mateo 11:28-30). Je én jebi kui bakóná nga nʼio tsjoakená je Jesús.

18. 1) Jméni xi kjima tjen nó 1914. 2) Jméni xi kuitsoyaná kjoaʼmiya xi ijngo.

¹⁸ Je Biblia kʼoatso nga kʼia nó 1914 tsakʼétsʼiakaoni je Chjotaxále Niná nga tsakatéxoma ya ngʼajmi. Saʼnda kʼiaa tísʼexkóni je xi chasa xi jngo siento kao ñachanño jmi mani xi koatexomakao Jesús ya ngʼajmi. Kʼoati tísʼexkó je chjota xi kjoaʼatojin tjínkon nga kjoetʼa jme xi chon sonʼnde nga ya koatio ya Sonʼndenaxó. Je chjota jebi chjotankjín ʼmile (Apocalipsis 7:9, 13, 14). Jótjín mani. Jmé xi mele Niná nga sʼin. Yaa kuitsoyaná kjoaʼmiya xi ijngo.