XI NGISA TÍNCHJA̱NI REBISTA JEBI:
Jósʼin síkjaʼaitsjen Niná xi tʼatsʼe kjoajchán
Nʼio nkjín chjota xi kʼoasʼin síkjaʼaitsjen kʼianga sasénle Niná nga kjoajchán satío, nga̱ nichxin kjoatse kʼoasʼin tsakʼénele je choʼndale nga sakʼoa kijin kjoajchán tojo tso ya Biblia. Tonga kʼoati tjínkʼa je chjota xi be nga je Jesucristo, je ʼNdíle Niná, kʼoakitsole chjotale nga tsjoake katama je chjotakontrale (Mateo 5:43, 44). Je chjota kʼoasʼin síkjaʼaitsjen nga kisikʼantjaiya Niná je kjoafaʼaitsjenle kʼoa nga jtike ndʼaibi je kjoajchán xi satío.
Jósingái ji, a sasénle Niná je kjoajchán axo mai. Kʼiatsa sasénle ʼyáni xi basenkao kʼianga batío kjoajchán chjota. Kʼianga jchaa xi tʼatsʼe jebi koasenkaoná josʼin tjínnele si̱kjaʼaitsjeen xi tʼatsʼe kjoajchán. Tobʼelañá, kʼiatsa jngola kjoajchán tísʼejna kʼoa Niná tíbasenkao je chjotakjoajchán xi tiʼmitʼalai kʼoajinsʼin si̱kjaʼaitsjain nga ndatjín kjoajchán jebi kʼoa nga je kuinje̱le. Tonga tsa je títsjoánganʼiole Niná chjotakjoajchán xi ngikʼa xi kontrali mani, jósʼiain. A si̱kʼantjaiyaní kjoafaʼaitsjenli xi tʼatsʼe kjoajchán.
Kʼiatsa jchai josʼin síkjaʼaitsjen Niná xi tʼatsʼe kjoajchán kʼoajinti kjaʼaísʼin si̱kjaʼaitsjain xi tʼatsʼe Niná. Ánni kʼoabixónsíñá. Tojo kjimatʼain je chjota, tsakui nichxin kʼoati tse kjoañʼai tichjaʼai xi totʼatsʼe kjoajchán. Mejinli jchai tsa Niná títsjoánganʼiole je kjoajchán xi tjíosatío kʼoa ánni nga títsjoáʼndesíni nga kʼoasikji kjoañʼai faʼá chjota nga kui satío. Kʼoa tsakui nichxin kʼoasʼin nikjaʼaitsjain nga saʼnda tsín mandosinle je chjota xi ya mʼejin kʼoa xi kjoañʼai faʼá.
Tokʼoajin koa̱nli nga tsín mangóson josʼin síkjaʼaitsjen je chjota kao jmeni xi tso je Biblia xi tʼatsʼe kjoajchán. Je Biblia kʼoatso nga tsínkʼia síkʼantjaiya kjoafaʼaitsjenle Niná. Kuila kataʼyaa josʼin kisikjaʼaitsjen Niná nichxin kjoatse xi tʼatsʼe kjoajchán kʼoa josʼin kisikjaʼaitsjen kʼianga tsakʼejna Jesucristo i̱ Sonʼnde. Nga chótʼayajiaan xi tʼatsʼe jebi, kui xi koasenkaoná nga jchaa josʼin síkjaʼaitsjen Niná tʼatsʼe kjoajchán xi sʼe ndʼaibi kʼoa nga jchaa tsa tosi tonda sa̱tío kjoajchán nichxin xi nroaján.