Jmeni xi chjonangiaa xi tʼatsʼe Biblia
A kjoaʼáyanile chjota xi jekʼien
Koaan tsjoá ijngokʼaniná kjoabijnachon je xi kisindaná
Tʼatsʼe Jeobá “tínroani je kjoabijnachon” (Salmo 36:9). Kuinga koa̱nsínile tsjoá ijngokʼale kjoabijnachon chjota xi jekʼien. Je Biblia kʼoatso nga kʼoasʼin Niná nichxin xi nroaján (tʼexkiai Hechos 24:15). Ánni mesínile Niná nga sikjaʼáyale chjota xi jekʼien.
Je Niná kʼoasʼin koanmele nga kuiyoaa ngantsjai nichxin (Génesis 1:31; 2:15-17). Kʼoa tojo kʼoatjín kon. Nʼio aon male nga tíbe nga nʼio tse kjoa bitjatojiaan kʼoa nga tochoa nichxin biyoaa (tʼexkiai Job 14:1, 14, 15).
Jñáni koatio je chjota xi kjoaʼáyale
A kui xá kisindani Niná je chjota nga ya ngʼajmi koatio. Mai. Je Niná ánkje kisinda xi ya ngʼajmi tjío. Kʼoa ñá xi chjotaa kui xá kisindaniná nga i̱ Sonʼnde kuiyoaa (Génesis 1:28; Job 38:4, 7). Tikjaʼaitsjenlai jebi. Jñáni tsakatio je chjota xi kisikjaʼáyale Jesús nichxin kjoatse. I Sonʼnde. Kʼoati koa̱n nichxin xi nroaján, me ngatsʼi chjota xi kjoaʼáyale nga i̱ Sonʼnde koatio (tʼexkiai Juan 5:28, 29; 11:44).
Tochoa mani chjota xi kiskoejin Niná xi ya kjoaʼáyale ya ngʼajmi kʼoa kui yao xi tsín matsen sʼe̱le (Lucas 12:32; 1 Corintios 15:49, 50). Chjota jebi yaa koatexomakao Cristo nga koatexomason sonʼnde (tʼexkiai Apocalipsis 5:9, 10).