1. Jósʼin ʼyañá nga kui xi ngisa koanndosinle Jesús nga kinchja̱ni tʼatsʼe Chjotaxále Niná.

JE Jesús nʼio tsjoake koan nga kitsoyason tʼatsʼe Chjotaxále Niná. Kui xi ngisa koanndosinle. Kʼianga tsakʼejna i̱ Sonʼnde, tsʼato jngo siento kʼa nga kui kinchja̱ni tʼatsʼe Chjotaxále Niná. Kui xi ngisa kinchja̱ni (tʼexkiai Mateo 12:34).

2. Jótjín chjota kinrʼoé je én xi kitso Jesús je xi faʼaitʼa ya Mateo 28:19, 20.

² Kʼianga jejaʼáyanile je Jesús, tsʼato aon siento chjota tsʼatsenle (1 Corintios 15:6). Tsakui nichxin je xokitsole je chjota jebi nga koaitsoyasonle “ngatsʼi naxinandá”. * Tonga likui choa ñʼai tíjna nga sa̱kóyason ngakjijnda naxinandá. Je Jesús kʼoakitso nga nʼio tse nichxin machjén. Tojo sa̱kóyason saʼnda nga kjoetʼa jmeni xi chon sonʼnde. Kʼianga ʼmiyasoán ndʼaibi, kui tinitjosoán jmeni xi kitso Jesús (Mateo 28:19, 20).

3. Jméni xi jan koya tíbasenkaoná nga tiʼmiyasoán.

 ³ Kʼianga kʼoakitsole Jesús je chjotale nga katatsoyason, i kitsole: “An tijnakaono nga jon” (Mateo 28:20). Nga kʼoakitso je Jesús, kui xi kitsonile nga je koandiaale kʼoa je koasenkao nga kuitsoyason jngo tjíjtsa Sonʼnde. Kʼoati tíbasenkaoná je Jeobá. Hebreos 13:20, 21 kʼoatso nga je tsjoáná “ngayije xi nda” nga kʼuínyasoán. Kjoaʼmiya jebi kui jchaa, jméni xi tinichjén nga tiʼmiyasoán, josʼin tiʼmiyasoán kʼoa josʼin tínichjinená. Kuila títjon kataʼya kʼaa jméni xi tinichjén xi jngo siento nó jetífaʼato.

4. Jósʼin tíbasenkaoná jmeni xi tinichjén nga tiʼmiyasoán.

⁴ Je Jesús kʼoakitso nga je Énle Niná yaa mangóson na̱xi̱n xi sʼentje (Mateo 13:18, 19). Je chjota xi tjín xi bʼéntje kjaʼaí kjaʼaí ki̱chaa síchjén nga síxá je nangi. Jebi yaa mangóson nga ʼmiyalee chjota je Énle Niná, kui nichjén jmeni xi tsjoáná je xi rey tíjnaná, je Jesucristo. Tjín jmeni xi tochoa nó koanchjén, kʼoa kʼoati tjín jmeni xi tojo tinichjén saʼnda ndʼaibi. Ngayeje xi tinichjén basenkaoná nga ngisa nda ʼmiyasoán je Énle Niná.

5. 1) Jméni xi tarjeta de testimonio tsakʼin. 2) Jósʼin koanchjén xo̱n jebi.

⁵ Kʼianga nó 1933, je xi nʼio tsakinyakao je ndsʼee nga tosʼa kitsoyason títjon kui je xi tarjeta de testimonio tsakʼin. Xo̱n jebi to ʼndí kjoan kʼoa kui faʼaitʼa choa jmeni xi tso je Biblia kʼoa nkjín koya kitjo. Jósʼin koanchjén xo̱n jebi. Jngo ndsʼee xi kui kisichjén nga tosʼa te nóle kʼoatso nga je chjota síkʼéxkia. Xijema, kʼiaa tsjoále chjota jngo xo̱n xi Énle Niná faʼaitʼa kʼoa jetofi xijema.

6. Ánni nga nʼio nda koanchjénsíni je xo̱n xi tarjeta de testimonio tsakʼin.

⁶ Je xi tarjeta de testimonio tsakʼin nʼio ndasʼin koanchjén. Jósʼin tsakinyakao je ndsʼee. Nga kjesa bitjojin xo̱n jebi, tjínkʼa je ndsʼee xi mele kuitsoyason, tonga soale kʼoa likui be jokuitso. Kʼoati tsakatio ndsʼee xi nʼiojin koan xi ngotjo kʼoakitsonile chjota jmeni xi tso je Énle Niná. Tonga sakʼoaa toxkia tsakjákao chjota. Tonga je tarjeta de testimonio nʼio nda tsakinyakao ngatsʼi, nga̱ choa ñʼai én faʼaitʼa kʼoa sasa majinniná.

7. Ánni nga sakʼoa ñʼai koannile ndsʼee nga kisichjén tarjeta de testimonio.

⁷ Kʼoati sakʼoa ñʼai koanle nga kui kisichjén xo̱n jebi. Jngo tichjaa xi i̱ tso: “Sakʼoaa i̱ kitsonajin chjota: Jméni xi tso xo̱n jebi. A tsí koa̱n ji kʼoakʼuínnái”. Tjínkʼa chjota xi tsín male bʼéxkia kʼoa tjínkʼa xi kiskoé kʼoa tsakʼéchjoa xo̱ntjoa. Kʼoa tjínkʼa xi tsakʼéjnda nga tsín koanndosinle je Énle Niná. Ninga kʼoalani, je tarjeta de testimonio kui xá koanchjénni nga kitsoyason je ndsʼee kʼoa nga tsabe je chjota nga Énle Niná tsoyason.

8. Jósʼin koanchjén je gramófono (chótsenlai sén xi fitsʼiani kjoaʼmiya jebi).

⁸ Kʼianga jejaʼato nó 1930 kui koanchjén je xi gramófono tsakʼin, xi ma sʼeyale disko xi kjoanokjoaya nroatʼa. Tjínkʼa xi Aarón sʼin kitsjoajaʼaínle je gramófono nga̱ tokui nrʼoéle chjota ʼndele nga je kuinchja̱ ndsʼee (tʼexkiai Éxodo 4:14-16). * Tsa koanmele chjota nga kjuinrʼoéle, kʼiaa bʼétʼaʼíle ndsʼee je gramófono nga katanrʼoéle je kjoanokjoaya kʼoa síkájna jngole  xo̱n xi Énle Niná nroatʼa. Sakʼoaa jngo familia mani xi nrʼoéle kjoanokjoaya. Tjen nó 1934 je naxinandále Niná jesoa kisinda je gramófono xi kisichjén nga kitsoyason. Nga jeki nichxin ñokan kao tejao kjoanokjoaya kisʼin grabar je ndsʼee.

9. Jósʼin kichomani nga gramófono kisichjén je ndsʼee nga kitsoyason.

⁹ Ñandia nga jngo chjota xi nʼio koantsjoake jotso je kjoanokjoaya xi kinrʼoéle. Kisijéle je ndsʼee nga jngo xomana katasíkinyale je gramófono nga kʼoati koa̱n kjuinrʼoéle je chjotandaindʼiale. Nga kui kisichjén ndsʼee, nʼio nkjín chjota kiskotʼaya je Biblia kʼoa kisʼenngindá. Chjota xi kanixkiaa kʼoati kisʼenngindá kʼoa jao xtiyánchjínle xi misionera koan. Joni je tarjeta de testimonio, je gramófono kʼoati nʼio ndasʼin tsakinyakao je ndsʼee xi kʼia kitsoyason títjon. Nga jeki nichxin, je Jesucristo kui kisichjén je Skuela xi síchjine choʼndale Niná nga kitsoyale je chjotatjenngile nga ngisa nda kuitsoyason.

10, 11. Jósʼin tsakasenkao je ndsʼee je periódiko kao radio nga kitsoyason je Énle Niná.

¹⁰ Je Jesús, xi rey sʼin tíjnaná, jé tíbasenkaoná nga nʼio nkjín chjota tiʼmiyasonlee. Nkjín koya josʼin tiʼmiyasoán kʼoa tsakasenkaoná nichxin kjoatse kʼianga sʼa tochoa mani xi tsoyason (tʼexkiai Mateo 9:37). Tobʼelañá, koanchjén periódiko nga tsakʼinyason je Énle Niná. Nga xki̱ xomana, je ndsʼee Russell jngo kjoanokjoaya síkasén jña sʼenda periódiko. Kʼoa xijema, je xi bʼénda periódiko yaa síkasén ijngokʼale xi bʼénda periódiko ya Canadá, Estados Unidos kao Europa. Kʼianga nó 1913 jejao jmi periódiko bitjotʼa je kjoanokjoayale ndsʼee Russell kʼoa xjaʼaonla miyón chjota bʼéxkia.

¹¹ Xi kʼoati nʼio ndasʼin koanchjén nga tsakʼinyason kui je radio. Kʼianga 16 sá abril nó 1922, kʼiaa kinchja̱ya títjon ya radio je ndsʼee Rutherford. Kʼoa ñachantela jmi chjota kinrʼoé kjoanokjoayale. Tochoa tsee jaʼato nga jesoa naxinandále Niná kisʼejnale jngo estación xi tsʼe radio. Kʼoa kʼiaa kinoʼya títjonle nga 24 sá febrero nó 1924. Kʼianga toje tífikjetʼa nó 1924, rebista jebi xi bitjo nga én inglés i kitso: “Je radio kui xi ngisa nda machjén kʼoa kui xi ngisa choa tao̱n sʼengi nga tífison je Énle Niná”. Je periódiko kao radio nʼio nda koanchjén nga tsakʼinyason je Énle Niná jñani tochoa mani xi tsoyason.

12. 1) Jñáni nga ngisa tsjoachai nga ʼmiyasuin jñani nʼio nkjín chjota tjín. 2) Tsa tsín tso tokuin nga ʼmiyai jñani nʼio nkjín chjota tjín, jméni xi koa̱n sʼiain.

¹² Ijngosa koya xi tíbasenkaoná nga nkjín chjota chjakaonajmíñá je Énle Niná, kuinga ya ʼmiyasoán ya jñani nʼio tjín chjota. ʼMiyañá ya jña bitjo karro, jña bitjo tren, jña fayo karro, jña saténa tsojmi kao ya jinndi̱tsi̱n. Tsa tsín tso tokuin nga ʼmiyai jñani nʼio nkjín chjota tjín, jméni xi koa̱n sʼiain. Tʼetsʼoalai Jeobá kʼoa tikjaʼaitsjain jokitso jngo xi superintendente sʼin tíjna. I kitso: “Nga jngó jngó koya josʼin ʼmiyasoán jé Jeobá nixálee kʼoa kʼoasʼin bakonilee nga tjínná kjoamakjain kʼoa nga kixi mangíntʼalee”. Kʼoatso ndsʼee jebi nga kʼoasʼin bakónile Jeobá nga tíjnanda nga sitjoson ngayeje xi kuitsole. Kʼianga nʼiojin maa kʼoa kjaʼaí kjaʼaísʼin ʼmiyaa, kui xi basenkaoná nga ngisa nda nixálee je Jeobá kʼoa ngisasa manʼiotʼaa (tʼexkiai 2 Corintios 12:9, 10).

13. 1) Ánni nga ndatjínsíni nga kui chja̱kaonajmíñá chjota tʼatsʼe je pájina xi tíjnaná ya Internet. 2) Jósʼin tinichjain ji je pájina jebi kʼianga ʼmiyasuin.

¹³ Nʼio nkjín ndsʼee xi nʼio tsjoake nga kui fákaoni chjota tʼatsʼe je pájina xi tíjnaná  ya Internet. Nga nyaon nyaon tsʼato jngo miyón kao jaon siento jmi chjota faʼasʼen ya jw.org. Ya pájina jebi koaan kʼoexkia kʼoa kʼoaje̱n xo̱n xi Énle Niná faʼaitʼa xi tsʼato ñato siento én faʼaitʼa. Nichxin kjoatse kui radio koanchjén nga kisakoyale Énle Niná je chjota xi kjintʼa tjío. Nichxin xi tiyoaa ndʼai kui Internet kjimachjén nga tíʼmiyale.

14. 1) Jmé kjoachjine xi koanchjénle je ndsʼee. 2) Jmé skuelani xi tíbasenkaoná nga nda maestro kjimaa.

¹⁴ Tojosʼin jetiʼyaa, je Jeobá títsjoána jmeni xi basenkaoná nga tiʼmiyasoán. Tonga kʼoati tísíchjinená. Ánni. Tobʼelañá, nga kui kisichjén ndsʼee je gramófono nga kitsoyason, tjínkʼa chjota xi tsín kisasenle jmeni xi kinrʼoéle. Kʼoa tjínkʼa xi nʼio koanndosinle kʼoa koanmesale nga skoe̱ jotso Biblia. Je ndsʼee tjínnele nga nda maestro koa̱n kʼoa skoe̱ jokuitsole chjota xi tsín sasénle je Énle Niná. Jé nganʼiotsjele Niná tsakasenkao je ndsʼee Knorr nga koanjinle nga tjínnele nda maestro koa̱n je ndsʼee nga kuitsoya je Biblia. Kuinga jngo skuela kisʼetsʼiakaosíni nga nó 1943, je xi Skuela xi síchjine choʼndale Niná ʼmi.

15. 1) Jóma kʼa xi faʼa ya Skuela xi síchjine choʼndale Niná. 2) Jósʼin tíbasenkaoli ji Jeobá tojo tso Salmo 32:8.

¹⁵ Nʼio nkjín ndsʼee xi ñʼai koanle nga jngo jtín chjota kinchja̱yajinle. Jngo ndsʼee xi bʼéyanajmí jokoanle nga tosʼa kitsjoa títjon je kjoanokjoayale nga nó 1944, xi kui kinchja̱ni tʼatsʼe jngo chjota xi ya Biblia faʼaitʼa xi Doeg tsakʼin. Je ndsʼee kʼoatso nga ñaki tsʼatsé xkóle, ntsja kao tsʼoa, tonga kisikjetʼaa kjoanokjoayale. Ya Skuela xi síchjine choʼndale Niná kʼoati faʼa xi sʼa xtiʼndí. Je superintendente xi kanikʼaxki̱ná ya párrafo 12 kʼoatso jokoan ñandia jngo tiʼndí nga tosʼa jaʼa títjon ya skuela.  Kʼoatso nga tome kiskiʼndá nga nʼio tíbʼatsé. Tonga tsakʼénele yaole kʼoa kisikjetʼaa kjoanokjoayale. Tjínkʼa ndsʼee xi soale kʼoa nʼio tsokjón, kʼoasʼin síkjaʼaitsjen nga ñʼai koa̱nle nga skómingʼa ntsja kʼoa tsa ya plataforma kjoaʼa. A kʼoamai ji. Kʼoatʼinlai Jeobá nga katabasenkaoli nga tsín kuikjuín. Kʼoatisʼin koasenkaoli josʼin tsakasenkao je ndsʼee xi jaʼa títjon je Skuela xi síchjine choʼndale Niná (tʼexkiai Salmo 32:8). *

16. Jmé xá tíjnani je Skuela xi tsʼe Galaad.

¹⁶ Kʼoati tíjna je Skuela xi tsʼe Galaad jñani tínichjine je choʼndale Niná. Skuela jebi kui xá tíjnani nga ngisasa nda kuitsoyason je ndsʼee xi ya fi. Kʼiaa kisʼejna títjon nga nó 1943. Saʼnda nga kʼia, jela jin jmi basen ndsʼee xi ya ki kʼoa jngo siento kao jankan kao te naxinandá tjínni jñani tjíotsoyason. Tjen nó 2011, kʼoati jekoan ki skuela jebi je precursor especial, superintendente, betelita kʼoa tsa je misionero xi kje fijin skuela jebi.

17. Jósʼin tíbichómani nga tíjna je Skuela xi tsʼe Galaad.

¹⁷ Jósʼin tíbichómani nga tíjna je Skuela xi tsʼe Galaad. Si̱kjaʼaitsjenla xi tʼatsʼe naxinandá Japón. Kʼianga sá agosto nó 1949 saʼnda tsínla te mani testigole Jeobá ya Japón. Tonga nga jetífe nó 1949, tejan misionero kicho xi tsakinyakao je ndsʼee nga kitsoyason. Kʼoa ndʼaibi, jao siento kao xjaʼaonjngola jmi mani je testigole Jeobá ya Japón. Kʼoa me basen mani xi precursor regular kʼoa tsa precursor auxiliar sʼin tjíosíxá.

18. Jñásanile skuela xi tjíole naxinandále Niná.

¹⁸ Nkjínsa skuela tjínle naxinandále Niná. Tobʼelañá, Skuela jña nichjine je ndsʼee xi xá kjinele, Skuela xi tsʼe Precursor, Skuela xi síchjine je xi bakóyason tʼatsʼe Chjotaxále Niná, Skuela jña nichjine Superintendente xi tsʼe Circuito kao Yánchjínle kʼoa kao Skuela xi fi Ndsʼee xi ya tjíojin Comité xi tsʼe Sucursal kao Yánchjínle. Skuela jebi nʼio nkjín ndsʼee kao tichjaa tjíosíchjine kʼoa nʼiosa kjimataja kjoamakjainle. Tojosʼin tiʼyaa, je Jesús tojo tísíchjinená nichxin xi tiyoaa ndʼaibi.

19. 1) Jókitso je ndsʼee Russell tʼatsʼe nga kʼuínyason je Énle Niná. 2) A kʼoakjima jokitso je ndsʼee Russell.

¹⁹ Jetsʼato jngo siento nó nga tíbatéxoma Chjotaxále Niná. Saʼnda nga kʼia, je Jesucristo, xi rey sʼin tíjnaná, jé tíbándiaaná nga tiʼmiyasoán. Kʼianga nó 1916, je ndsʼee Russell i kitso: “Je xá xi tinʼia nga tiʼmiyasoán sa tse sa tse kjima, kʼoa tosi tondajin kʼoakoa̱n, kʼoa kui xá kjinená nga kʼuínyasoán je énnda xi tsʼe Chjotaxále Niná ngakjijnda sonʼnde” (La fe en marcha, xi tsʼe A. H. Macmillan, pájina 69). Je ndsʼee Russell likui jao kisʼele nga sa̱kóyason je Énle Niná jngo tjíjtsa Sonʼnde. Kʼoa kʼoakjima kjoaixi, tiʼmiyasonñá ngakjijnda Sonʼnde. Nʼio bʼailee kjoanda Jeobá nga títsjoáná jmeni xi basenkaoná nga tíbitjosonná je xá xi títsjoáná.