1, 2. 1) Jméni xi kisʼin Jeobá nichxin kjoatse. 2) Jótso kʼa chjota nichxin xi tiyoaa ndʼaibi.

NGATSʼIÑÁ nga tsín mená nga chʼin sʼe̱ná. Kʼiatsa chʼin tjínli, tsa jngo miyoli tímʼe kʼoa tsa xíngi tímʼe, tsakui nichxin kui nikjaʼaitsjain tsa koa̱nndani. Ya Biblia bʼéyanajmí tʼatsʼe je chjota xi nʼio koankjáojinle nga tjíomʼe. Tobʼelañá, je Ocozías xi tile koan Acab kao Jezabel, kʼianga kiska kitsiʼaon kʼoa kui kisikjaʼaitsjen tsa koa̱nndani. Kʼoa kʼianga chʼin kiskatʼale je Ben-hadad reyle Siria, kʼoati kui kisikjaʼaitsjen tsa koa̱nndani (2 Reyes 1:2; 8:7, 8).

² Nichxin kjoatse, je Jeobá kisindayaa sakʼoa je chjota xi chʼin kisʼele. Kʼoa saʼnda kitsjoa kʼale nganʼio je profeta nga kisikjaʼáyale chjota (1 Reyes 17:17-24; 2 Reyes 4:17-20, 32-35). Kuinga tjínkʼasíni je chjota xi tjíomʼe xi kʼoatso tsa sindaya Niná nichxin xi tiyoaa ndʼaibi.

3-5. 1) Jméni xi male sʼín je Jeobá kao Jesús. 2) Jméni xi chótʼayá i̱ kjoaʼmiya jebi.

³ Je Jeobá koaanle sichjén nganʼiole nga tsjoáchʼinle chjota. Tobʼelañá, kitsjoachʼinle je reyle Egipto kʼoa kao ndichja Moisés (Génesis 12:17; Números 12:9, 10; 2 Samuel 24:15).  Kʼoa kʼianga tsín kisitjoson je chjota israelita, kisikasénne chʼin kao kjoañʼai (Deuteronomio 28:58-61). Tonga kʼoati male síchjén nganʼiole nga síkuinda je choʼndale kʼoa nga tsín chʼin katatsaotʼale (Éxodo 23:25; Deuteronomio 7:15). Nichxin kjoatse, je Jeobá kisindaya kʼa choʼndale. Tobʼelañá, kʼianga nʼio táo chʼin kiskatʼale je Job kʼoa nga saʼnda koanmele kuiyá, je Jeobá kisindayaa (Job 2:7; 3:11-13; 42:10, 16).

⁴ Kʼoati male je Jesús nga síndaya je chjota xi chʼin tjínle tojo sʼín je Jeobá. Kʼianga tsakʼejna i̱ Sonʼnde, kisindayaa je xi tjíofiʼndojon yaole, xi chʼinxínle, xi xka̱, xi to kjioyá yaole kʼoa xi kjaʼaísa chʼin kisʼele (tʼexkiai Mateo 4:23, 24; Juan 9:1-7). Nga kʼoakisʼin je Jesús kui xi basenkaoná nga majinná jmeni xi sʼin nga jesʼe̱jna ʼNdenaxó. Nga kʼia alikui tiʼya xi “timʼeña” kuitsoni (Isaías 33:24).

⁵ Nichxin xi tiyoaa ndʼaibi, kʼiatsa nʼio timʼee, a kui xi tsonile nga sindayaná je Jeobá kʼoa tsa je Jesús. Jméni xi kuenta sʼiaan josʼin si̱xkilee yaoná. Kui chótʼayá i̱ kjoaʼmiya jebi.

6. Jotso je Biblia tʼatsʼe kjoaxkón xi tsakatío je chjotale Cristo.

⁶ Je Jeobá kitsjoale nganʼiotsjele je chjotale Cristo xi títjon tsakatio, kʼoa tjínkʼa xi koanle tsakatío kjoaxkón (Hechos 3:2-7; 9:36-42). Tobʼelañá, tjínkʼa xi koanle kisindaya xi chʼin kisʼele kʼoa tjínkʼa xi koanle nga kjaʼaí én kinchja̱ (1 Corintios 12:4-11). Tonga xijekoan alikui tikʼoakoanni, tojo kitso je Biblia (1 Corintios 13:8). Kuinga tsín koa̱n kʼoasʼin si̱kjaʼaitsjensíñá nga sindayaná Niná nichxin xi tiyoaa ndʼaibi, ñá kʼoa kao xíngiaa.

7. Jósʼin tsjoánganʼioná Salmo 41:3.

⁷ Tonga tsa nʼio timʼee, jé Jeobá tsjoánganʼioná kʼoa koasenkaoná. Tsakasenkao je choʼndale nichxin kjoatse. Je rey David i kitso: “Tsjoa tjínle je xi bakóle kjoamatokon je xi ma̱ tjío; jé Jeobá kʼoasjentjai kʼianga kjoañʼai kjoaʼatojin. Jé Jeobá sikuinda kʼoa sikʼéjnakon” (Salmos 41:1, 2). A kui xi kitsonile nga tsínkʼia kuiyá jngo chjota xi tsakakóle kjoanda jngo xi ma̱ tíjna. Mai. Kui xi kitsonile, tsa kʼia nga je xi chʼin ska̱tʼale, jé Niná koasenkao kʼoa jé sikuinda (Salmo 41:3). Nʼio tsjoánganʼioná nga be Jeobá kʼianga kjoañʼai chjaʼá kʼoa nga tsín síchajinná. Jé Jeobá tsjoáná kjoanʼiojin kao kjoachjine nga maná jonʼia kʼianga chʼin katʼaná. Xi ijngosani, kʼoasʼin tsakʼénda yaoná nga male tije síndaya sakʼoani yaole.

8. Tojo tso Salmo 41:4, jméni xi kitsole Jeobá je David.

⁸ Ya Salmo 41 kui bʼéyanajmí tʼatsʼe rey David kʼianga nʼio tímʼe. Tsakui nichxin kui nʼio kisikjáojin tʼatsʼe Absalón nga je koanmele koatexomangajaole. Tonga je David nʼio tímʼe kʼoa tsín koan jokisʼin. Je David bení nga kuinga kjoa kisʼenile nga tsakajngijée kao Bat-seba (2 Samuel 12:7-14). Jméni xi kisʼin. I kitsole je Jeobá: “Takonái kjoanda. Tindayanái, nga̱ tsakajngijéeña ngixkuin” (Salmos 41:4). Je David be nga jekisichatʼale je Jeobá kʼoa jé kisijéle nganʼio kʼianga tímʼe. Tonga a kui xi koanmele David nga sindaya je Jeobá.

9. 1) Jósʼin tsakasenkao Jeobá je rey Ezequías. 2) Jósʼin koanmele David nga koasenkao je Jeobá.

⁹ Nichxin kjoatse je Jeobá kisindaya kʼa chjota. Tobʼelañá, kʼianga kitjochʼinle je rey Ezequías nga tojeme kuiyá tsakai, je Jeobá kisindayaa kʼoa ngi xjaʼaon nó tsakʼejnasa  (2 Reyes 20:1-6). A kui xi koanmele David nga sindaya je Jeobá. Mai. Kui xi koanmele nga koasenkao josʼin basenkao jngo chjota “xi bakóle kjoamatokon je xi ma̱ tjío”. Je David miyo koanle je Jeobá, kuinga kisijénile nganʼio kʼoa nga katasíkuinda kʼianga tímʼe. Kʼoati kui kisijéle nga katabasenkao. Kʼoati koa̱n kʼoakʼuínlee je Jeobá jokitso je David (Salmo 103:3).

10. Jmé xi bakóyaná tʼatsʼe Trófimo kao Epafrodito.

¹⁰ Je pastro Pablo kʼoa kao chjotale Cristo xi ngikʼa koanle kisindaya chjota xi tjíomʼe (tʼexkiai Hechos 14:8-10). Tobʼelañá, je Pablo kisindaya jngo chjota xi nʼio chʼinndʼaile. Hechos 28:8 kʼoatso nga tsakʼétsʼoa, tsakájnasonle ntsja kʼoa ñaki koannda. Tonga je Pablo alikui kisindaya ngatsʼi chjota xi tsabexkon. Tobʼelañá, jngo miyole xi Trófimo tsakʼin, jngokʼa kikao kʼianga kjin kikakóyason (Hechos 20:3-5, 22; 21:29). Nga jetjenyandiaa, je Trófimo kitjochʼinle. Tonga alikui kisindaya je Pablo, kʼoa je Trófimo alikui tikoan kikaoni Pablo (2 Timoteo 4:20). Je Pablo kʼoati jngo miyo kisʼele xi Epafrodito tsakʼin. Je Biblia kʼoatso nga kitjochʼinle kʼoa nga me kʼien, tonga alikui kʼoatso tsa kisindaya je Pablo (Filipenses 2:25-27, 30).

11, 12. 1) Jósʼin tsakasenkao Lucas je Pablo. 2) Jméni xi ʼyaa tʼatsʼe Lucas.

¹¹ Je Lucas chjinexki koan kʼoa kikao sakʼoa je Pablo nga kjin kikakóyason (Hechos 16:10-12; 20:5, 6; Colosenses 4:14). Tsakui nichxin je kisixkile Pablo kʼoa kao chjotale Cristo xi ngikʼa kʼianga kitjochʼinle (Gálatas 4:13). Tojo kitso je Jesús, je xi tjíomʼe machjénle nga chjinexki sixkile (Lucas 5:31).

¹² Je Lucas ali tsa tokjoafaʼaitsjenjin xi kitsjoa josʼin sixkile yaole chjota nga̱ ñaki chjinexki koan. Kuinga kui kisikʼaxki̱ kʼani én xi síchjén chjinexki kʼoa kisikʼaxki̱ kʼani josʼin kisindaya chjota je Jesús kʼianga kiski libro xi tsʼe Lucas kʼoa kao Hechos. Alikui jotso Biblia tʼatsʼe jñani kiskotʼaya kʼoa kʼiani kiskotʼaya nga chjinexki koanni. Tsakui nichxin ya Laodicea kiskotʼaya ya chrianle naxinandá Colosas. Tsakui nichxin kuinga kisikʼaxki̱ni Pablo je Lucas kʼianga kiskile karta je chjotale Cristo xi tjío ya Colosas kʼoa nga kʼoakitsonile nga kjoatiʼnda kisikasénle.

13. Jméni xi tjínnele si̱kjaʼaitsjeen kʼianga ʼya xi kʼoatsoná josʼin si̱xkiaa.

¹³ Nichxin xi tiyoaa ndʼaibi, nijngojin ndsʼee xi koa̱nle sindayaná. Tonga tjínkʼa xi mele kuinyakaoná kʼoa tsakui nichxin tsjoáná kjoafaʼaitsjen tʼatsʼe josʼin si̱xkiaa. Tjínkʼa kjoafaʼaitsjen xi basenkaoná. Tobʼelañá, je Pablo bení nga sakʼoa makjine tsʼoa̱ je Timoteo, tsakui nichxin likui tsje nandá xi tsakʼi. Kuinga kʼoakitsonile nga tosa bino kataʼbikao choa (tʼexkiai 1 Timoteo 5:23). * Tonga kʼoati machjén nga chósonnile tsa kjuintjenngiaa kjoafaʼaitsjen xi tsjoáná xíngiaa. Tsakui nichxin jngo ndsʼee kʼoakuitsoná jñanile xki xi chi̱nee kʼoa tsa jme ndáxka̱ sʼioa. Kʼoa tsakui kʼoakuitsonáje̱ tʼatsʼe jokjoan tsojmi xi koa̱n chi̱nee kʼoa jokjoan xi mai. Tsa kʼoakuitsoná nga kui tsakasenkao je xínkjín xi kʼoati kui chʼin kisʼele xi tjínná. Ninga tsakasenkao je, alikui kui xi tsonile tsa kʼoati koasenkaoná tsanda ñá. Alikui  tongóson kjoan xki̱ xi binyakaoná ngatsʼiaa. Tjín xki xi binyakao xi kjaʼaí tonga síkiʼaon xi ngikʼa (tʼexkiai Proverbios 27:12). *

14, 15. 1) Ánni nga chósonsínilee josʼiaan. 2) Jméni xi bakóyaná Proverbios 14:15.

¹⁴ Ngatsʼiñá nga mená nga tsín chʼin sʼe̱ná, nga nda kuiyoaa kʼoa nga si̱xálee je Jeobá. Tonga nga chjotajée maa tjochʼinná ngatsʼiaa. Tsakui nichxin nkjín koya tjín josʼin si̱xkiaa, kʼoa tiʼndená nga chjoéjiaan jñanile xi mená. Tonga machjén nga chósonnilee josʼiaan. Tsakui nichxin tjínkʼa chjota kʼoa tsa jñani saténa xki xi kʼoakuitsoná jñanile je xki xi koasenkaoná. Tsakui nichxin tokui xi mele nga tse tao̱n kuinje̱le. Tsa kʼoakuitsoná nga nʼio nkjín chjota xi kui xki tjíosíchjén kʼoa nga jekjimandaya. Tonga alikui koa̱n nga tojme xi chi̱nee tojoni nga nda sʼe̱ tokoán kʼoa tsakuije̱ nga ngisasa tse kuiyoaa. Proverbios 14:15 itso: “Toʼyani xi tsín nkjín kon tomakjainyejele tojme énni, tonga je xi sínkjínle kon kosonnile josʼin binyá ndso̱ko̱”.

¹⁵ Kʼiatsa chjinee, chósonjinnilee josʼiaan tʼatsʼe je kjoafaʼaitsjen xi bʼainá tʼatsʼe josʼin si̱xkiaa, kʼoa ngisa tsa je xotítsoná jngo chjota xi tsín be tʼatsʼe xki. Chjónangilee yaoná: “A ñaki ʼbe kjoaixiña nga saje tsakasenkao xi kjaʼaí vitamina jebi, tsojmi jebi kʼoa tsa ndáxka̱ jebi. Ningalani tsakasenkao xi kjaʼaí, a koasenkaona an.  A tjínnele nga koatejnatsʼinyasa xi tʼatsʼe jebi kʼoa tsa jngo especialista kjuíkonle” (Deuteronomio 17:6).

16. Jméni xi kuenta sʼiaan kʼianga si̱xkiaa.

¹⁶ Kʼoati tjínnele nga chósonnilee jósʼin chótʼaa yaoná kʼoa jósʼin si̱xkiaa (Tito 2:12). Kʼoa ngisa tsa tsín ñaki tjínjngo tokoán tʼatsʼe xki xi tíʼminá kʼoa tsakuije̱ josʼin si̱xkiaa. Je xi kui títsjoáná. A koaanle nga nda kʼoeyanajmíná josʼin machjén xki jebi. A ñaki tísʼejngo tokoán jotítsoná. A nkjín chjinexki xi kʼoatso nga basenkaoná xki jebi (Proverbios 22:29). Tsakui nichxin tjín xi kʼoakuitsoná nga nʼio kjin jñani koansjai jngo xki kʼoa nga kjesa nkjín chjinexki bejin. Tonga a ñaki ʼyale nga tjín kjoaixi xki jebi. Kʼoa tsakui kʼoaitʼanáje̱ je xki xi kjaʼaí nganʼio tjínle kuitsoná chjota. Nʼio xkón tíjna tsakui chjoé. Je Jeobá alikui mele nga majia si̱chjén (Deuteronomio 18:10-12; Isaías 1:13).

17. Jméni xi mená ngatsʼiaa.

¹⁷ Kʼianga tsakatio je xi títjon chjotale Cristo koan, je cuerpo gobernante, jngo karta kisikasénle je ndsʼe̱ nga kʼoakitsole jmeni xi kʼoechjoale yaole. Je karta xi kisikasén itso én xi kisikjetʼani: “Nda katjino nichxin” (Hechos 15:29). Tjín én xi i̱sʼin kisikʼatoya én jebi: “Tsín jme chʼin katasʼeno”. Én jebi kʼoati “katasʼeno nganʼio” sʼin tsoyanile. Kʼoa kui xi mená nga “tsín chʼin sʼe̱ná” kʼoa nga sʼe̱ná nganʼio.

18, 19. Jméni xi choyalee ya ʼNdenaxó.

¹⁸ Nga chjotajée maa, toxá tjóchʼinniná. Alikui kʼoasʼin si̱kjaʼaitsjeen nga sindayaná je Jeobá ndʼaibi. Tonga ʼyañá nga sindayaná nichxin xi nroaján nga nijmejin chʼin tisʼe̱niná. Je pastro Juan kui kisikʼaxki̱ jngo “ndáje xi tsje xi tsʼe kjoabijnachon” kʼoa kao “yále kjoabijnachon” xi sindaya ngatsʼi chjota (Apocalipsis 22:1, 2). Alikuijin xi tsonile tsa ndáxka̱ sʼioa nga koa̱nndayaa ndʼaibi kʼoa tsa ya ʼNdenaxó. Kui xi tsonile ngayeje jmeni xi sʼin je Jeobá kao Jesús nga koa̱n kuiyoaa ngantsjai nichxin (Isaías 35:5, 6).

¹⁹ Ñaki kao kjoatsjoa tichoyalee je ʼNdenaxó. Nga kjesa faʼaijin je ʼNdenaxó, tsjoánganʼioná nga ʼyaa nga tsjoakená je Jeobá kʼoa nga be jokji kjoañʼai chjaʼá nga chʼin tjínná. Tojo kisʼin je David, ñaki kʼoatjín tokoán nga tsín tsjiónkonná je Jeobá. Tsa kixi kjuintʼalee sikuindaná ngantsjai (Salmo 41:12).