Je Biblia jenʼio kjoatse kijna. Jela jan jmi basen nó tjínle nga kisʼetsʼiakaoni nga kichji. Nga kui nichxin, kʼiaa tjíobatéxoma ya China je ntje̱ xi Shang tsakʼin, xi ʼyale nga jesa xi nʼio kjoatse tsakatéxoma. Kʼoa jngo jmila nó nga koanskanni tsʼatsen ya India je relijión xi budismo ʼmi (chótsenlai je rekuadro xi tso: “ Kataʼyala je Biblia”).

Jngo libro xi nʼio nda basenkaoná jéní xi majinná jotso kʼoa xi nʼio nda tso je kjoafaʼaitsjen xi tsjoá. Kʼoa je Biblia kʼoasʼin tjínnda. Ñaki bʼéjngoo tokoán jotso tʼatsʼe xi nʼio chjonangilee yaoná.

Tobʼelañá, nkjín chjota xi tsín majinle jmé xá tiyoñá i̱ Sonʼnde. Kʼoa jebi yaa bakóyaná ya jña sʼa fitsʼiani je Biblia, ya kapítulo 1 kao 2 xi tsʼe Génesis. Kʼianga “sʼa kitsʼia” kʼiaa koannda ngayeje xi tjín ya ngʼajmi kao Sonʼnde kʼoa jela jmi miyón nó tjínle (Génesis 1:1). Kʼoati bʼéyanajmí nga choa choa koanndachon i̱ Sonʼnde, josʼin koannda jotjín koya cho̱ tjín kʼoa josʼin koannda je chjota. Kʼoati tsoya jmé xá koanndani ngayeje xi tjín.

Je kjoafaʼaitsjen xi tsjoá Biblia nʼio basenkaoná nga maná bʼendajiaan je kjoa xi bitjatojiaan nga nyaon nyaon. Kʼoa sasa majinniná je kjoafaʼaitsjen xi tsjoá. Jaola koya kataʼyaa anni.

Xi títjon, alikui ñʼai tjín kʼoa kʼoatsokixiná jmeni xi sʼiaan. Alikui kui síchjén je én xi ʼma tíjna, kui síchjén je én xi ngotjo majinniná kʼoa bʼéjnatseen jmeni xi tínchja̱ni. Kʼoa kʼianga kui tsoyaná jmeni xi ñʼai tjín kui síchjén je én xi nichjénntsjé.

Tobʼelañá je Jesús, kui choa̱ kisichjén xi be je chjota kʼianga kitsoyale jmeni xi ñaki kichotsaojin ya ni̱ma̱le. Nʼio nkjín choa̱ kisikʼaxki̱ kʼianga kinchja̱yajinle chjota ya jngo jko̱nindo, kʼoa jmeni xi kitsoya yaa faʼaitʼa ya Mateo kapítulo 5-7. Jngo chjota xi nʼio be tʼatsʼe Biblia kʼoakitso nga nʼio basenkaoná jmeni xi kitsoya, nga li tsa toxkia énjin xi kitso kʼoa nga bándiaaná josʼiaan kʼoa josʼin koanngínkoaa yaoná. Kʼiatsa kʼoéxkiaa Mateo kapítulo 5-7, to xjaʼaon to kanla minuto kʼoéxkiañá. Tonga jmeni xi tso nʼio basenkaoná ninga nʼio choa ñʼai je én xi faʼaitʼa.

 Xi majaoni koya anni nga sasa majinniná jotso je Biblia kui jmeni xi bʼéyanajmí. Ali tsa to kuentojin xi faʼaitʼa. Jngo libro kijna xi kʼoatso nga “kui bʼéyanajmí tʼatsʼe xi toxkia chjota kao chjota xi tse nganʼio kisʼele, je kjoa xi jaʼatojin, jmeni xi kiskoyale, jmeni xi kichotjenngi kʼoa jmeni xi mai” (The World Book Encyclopedia). Machoyaná jokoanle je chjota xi síkʼaxki̱ ya Biblia kao jmeni xi bʼéyanajmí. Alikui ñʼai tjín jmeni xi tso kʼoa nʼio chjíle jmeni xi bakóya (Romanos 15:4).

Kʼianga koa̱njinli jotso jngo libro, tjínnele kui én sʼe̱tʼa xi nokjoai. Alikui jao tjínná nga jekijna Biblia xi kui nroatʼa je én xi nokjoai, tojñani nga tijnai. Kataʼyala jómani nga kʼoasikji nkjín koya én tíbitjosíni je Biblia.

Én xi tífaʼatoya. Nga sʼa títjon kichji Biblia kui koanchjén je én hebreo, arameo kao griego. Tonga tochoa chjota xi koan tsakʼéxkia. Nga koa̱n sʼe̱yole je chjota xi kjaʼaísa én nchja̱, nʼio nkjín chjota tjíobatio jokji nga tínroa nichxin, nga tjíosíkʼatoya je Biblia. Nga kʼoatjíosʼín, ndʼaibi jela jao jmi kao ñato siento koya én jekijna je Biblia, tjín én jñani jekinikʼatoya ngakjijngo kʼoa tjín jñani tosʼa choa kinikʼatoya. Me ngatsʼi chjota xi tjín Sonʼnde nga koa̱n sʼe̱yole kʼoa nga koa̱n kʼoexkia je Biblia je én xi nchja̱.

Jókji tíbʼabíson. Je xi koanchjén kʼianga sʼa kichjitítjon je Biblia kui xi papiro ʼmi kʼoa kao xjoa̱le cho̱, tonga jebi likui tse male. Nga tsín kichangi je én xi ya kichjitʼa, tjínnele nga kjitʼa koanchjotseya je copia. Je copia jebi nʼio chjí koan kʼoa tojngo jao chjota xi koan tsakatse. Tonga sasa tsʼabísonni je Biblia kʼianga tsakʼénda jngo makina xi xo̱n bʼasje je chjota xi Gutenberg tsakʼin, xi jela aon siento basen nó tjínle nga tsakʼejna. Tjínkʼa chjota xi kʼoatso nga jelaxó aon jmi miyón Biblia jekitjo.

Tsínsa libro xi síchjén je relijión xi kʼoasikji nkjín koya én tífaʼatoya kʼoa xi kʼoasikji nkjín miyón tíbʼabíson joni tsa Biblia. Koaan sʼe̱yole ngatsʼi chjota. Kʼoa tsa ñʼai koa̱nli nga koa̱njinli, tjín jmeni xi koasenkaoli. Jméni kʼoa jñáni so̱koli. Yaa kuitsoyali je kjoaʼmiya xi fini.