XI NGISA TÍNCHJA̱NI REBISTA JEBI: ALIKUI ÑʼAI TJÍN JMENI XI TSO JE BIBLIA
Jósʼin koasenkaoli tsa kʼoéxkiai je Biblia
“Je Biblia nʼio ʼyale kʼoa kui libro xi nʼio síchjén je relijión. Tonga i̱ naxinandá China alikui ʼyale libro jebi” (LIN, XI CHINA TSʼE).
“Kʼiatsa tsín majinna je xo̱ntsje xi síchjén je relijión Hindú jña sisian, a tokui koa̱njinna jmeni xi tso je Biblia” (AMIT, XI INDIA TSʼE).
“ʼBexkónña je Biblia nga̱ jenʼio kjoatse kijna kʼoa ʼbeña nga kui xi ngisa nʼio batse chjota jngo tjíjtsa Sonʼnde. Tonga nisañandiajinla ʼbe jngoa” (YUMIKO, XI JAPÓN TSʼE).
Nʼio nkjín chjota tjín i̱ Sonʼnde xi bexkón je Biblia ninga likui nanda be jmeni xi faʼaitʼa. Ya jñani tochoa be chjota xi tʼatsʼe Biblia yaní Asia, tonga kʼoati ma ninga ya naxinandá jñani nʼio tíbʼabíson je Biblia.
Tsakui nichxin i̱sí: “Jmé xá kui kʼoexkiaña”. Kʼiatsa jchai jmeni xi bakóya je Biblia nʼio koasenkaoli, jolani:
-
Nga ñaki tsjoa sʼe̱ tokuin
-
Nga koa̱nli kʼoéndajin je kjoa xi sʼe ya yaniʼya
-
Nga tsín nʼio si̱kjáojin
-
Nga nda kʼuínkoai je xi ngikʼa
-
Nga koa̱nli josʼin si̱chjain je tao̱nli
Tobʼelañá, jngo chjoón xi Japón tsʼe, xi Yoshiko ʼmi, mele skoe̱ jmé xi tínchja̱ni je Biblia kʼoa jesoa tsakʼéxkia. Jósʼin kichotsjoá nga kʼoakisʼin. Itso: “Je Biblia kitsoyana jme xá tijnaña kʼoa jme kjoachoya xi tjínna nichxin xi nroaján. Jeñaki tjínjngo tokoan ndʼaibi”. Kʼoa je Amit, xi jesa kanikʼaxkiaa, kʼoati kiskotʼayajin je Biblia. Kʼoa itso: “Ñaki tokʼoakoanna jmeni xi tsakʼexkia. Je én xi nya basenkao toʼya chjotani”.
Nʼio nkjín miyón chjota xi tjíobinyakao je Biblia nga ngisasa nda tjíobatio. Ánni nga tsín jisoa bʼexkiasíni je Biblia kʼoa kataʼyai josʼin koasenkaoli.
