Yaa kitsian ʼnde xi tíjna ya naxinandá Sajonia, ya jñani República Democrática Alemana tsakʼin (RDA). Kʼianga sʼa koanjchínga nʼio tjao tsabena je xijchána kʼoa kʼoati kitsoyana josʼin tjínnele kjuíkoa yaona. Makjoanni nga nʼio sinle kjoa política je chjota xi ya tsʼe naxinandá República Democrática Alemana je chjota xi ya tsʼe Sajonia alikui chjí tsabekon je religión. Kʼoa an, alikui koankjainna tsa tíjna Niná. Jao koya tjínni xi kisʼian nga sʼa xtia. Xi títjon, kuinga tsín koankjainna tsa tíjna je Niná kʼoa xi majaoni kuinga kjoa política nʼio kisisian.

Kuinga nʼio kjoa política kisisinña nga̱ kui xi koanmena nga tongóson sʼin kataʼyakon je chjota. Kʼoa saʼnda kʼoasʼin kisikjaʼaitsjen nga tjínnele tongóson kji tao̱n katasʼele je chjota ánni nga tsín tokʼa xi nyiná koa̱nni. Chaan ya tsakatejnajinle je xti xi kui jtín tsakatiojin tʼatsʼe kjoa política. Kʼianga 14 nóna yaa kisixá jñani manda ijngokʼa xo̱n xi tsín timachjénni. Je chjotaxá xi ya tsʼe naxinandá Aue nda kisasenle je xána kʼoa saʼnda jngo premio kitsjoana. Ningalani sʼa xtia nga kʼia, tsaʼbexkon kʼa je chjota político xi nʼio ʼyale xi ya tsʼe naxinandá jebi. Kʼoasʼin kisikjaʼaitsjen nga nʼio nda tisʼian kʼoa nga nda koatejna nga jekoa̱njchínga.

Tonga kʼianga nó 1989 kʼiaa kiska je xjáo xi tsʼe Berlín kʼoa kʼoati kʼia kichangi je kjoa política xi kisʼe ya Europa del Este, nga kʼoakoan sa chʼao sa chʼao kisʼe tokoan nga̱ koanjinna nga to kjoachʼanachani jmeni xi tso chjota político. Tobʼelañá, ʼyani xi tsín kitsjoanganʼiole kjoa política, alikui kuenta koan. Kui kisikjaʼaitsjenjian ánni nga kʼoakisʼinni nga̱ kui tsakakóya nga tongósoán ngatsʼiaa. A tokjoatjaoni jmeni xi kitso. Kui jebi xi nʼio kisikinroajen tokoan.

Alikui ti kjoa política kisisinña, tosa kui xi koanmena nga kise kʼoa nga dibujo kisinda. Yaa kia skuela jñani tsakʼinyana josʼin jnda nga̱ kui xi koanmena nga universidad kjuía nga koa̱nna se kʼoa nga koa̱nna sinda dibujo. Alikui tikʼoasʼin kikaoña yaona josʼin kitsoyana je xijchána ngasʼa ʼndía. Tokui xi koanmena nga kʼoetsaojian, saʼnda nkjín xtiyánchjín tsakʼamjekoa. Ningalani koanna kise, ningalani koanna kisinda dibujo kʼoa ningalani nda tsakʼetsaojian alikuini tsjoa kisʼe tokoan kʼoa yaa tsaʼyanile jmeni xi kisinda. Alikui tsaʼbe jméni xi sʼian nga jekoaini nichxin. Alikui koanjinna jmé xá tijnaña.

Kʼianga jekoanjinna jmeni xi koanmena tsaʼbe ñaki tokʼoakoanna. Ñandia nga koanxon ya ndʼiaskuela yaa kichokatejnajinle je xti xi kui tjíofáoyani jmeni xi koa̱n nichxin xi nroa. Nga kʼia kʼoati ya tíjna Mandy, * xi testigole Jeobá ma kʼoa nʼio nda kjoafaʼaitsjen kitsjoana. I kitsona: “Andreas tsa meli nga koanjinli jme xá tiyoñá kʼoa jmeni xi koa̱n nichxin xi sʼa nroa, chótʼayai jmeni xi tso Biblia”.

Nga títjon to jao kisʼe tokoan, tonga koanmesana tsaʼbe jmeni xi tso Biblia. Je Mandy tsakakóna jmeni xi tso Daniel capítulo 2, ñaki tokʼoakoanna jmeni xi tso. Kui nchja̱ni tʼatsʼe chjotaxá xi tjíobatéxoma ndʼaibi xi tse nganʼio tjíosʼele. Xijekoan, je Mandy tsakakósana jmeni xi tso Biblia tʼatsʼe jmeni xi koa̱n nichxin xi sʼa nroa. Kʼiaani koanjinna jmeni xi tsín majinna tsakai. Tonga kui kisikjaʼaitsjen ʼyáni xi kiski én jebi, ʼyáni xi tongini kʼoakitso jmekjoanni xi koa̱n nichxin xi sʼa nroa kʼoa a kui bakó jebi nga tíjna jngo Niná.

Je Mandy kʼoakitsona nga je Horst kao Angelika kuitsoyana Biblia. Kʼiaa koanjinna nga toje testigole Jeobá xi síchjénntsjai je jaʼaínle Niná kʼoa xi kʼoati tsoyale je chjota (Salmo 83:18; Mateo 6:⁠9). Koanjinna nga kui xi mele Jeobá nga tondiaa kuiyoaa i Sonʼnde kʼianga jeʼndenaxó koa̱n. Ya Salmo 37:⁠9 itso: “Je xi je Jeobá koyale tsʼee koa̱n i̱ sonʼnde”. Nʼio tsjoa kisʼe tokoan nga tsaʼbe nga koa̱n koatio i̱ Sonʼnde ngatsʼi je chjota xi je Jeobá sitjosonle.

Ñʼai koanna nga kisikʼantjaiya yaona kʼoa nga kui kʼoakisʼian jmeni xi tso Biblia. Nga nʼio nda koanna kise kʼoa nga koanna kisinda dibujo ngʼakon koan kʼoa ñʼai koanna nga nangitokon koan tonga tsakʼenele yaona. Kʼoa kʼoati ñʼai koanna nga kisikʼéjna kjoachajngi. Tsjoale kjoanda Jeobá nga tsejta kjima xi kao an, nga majinle jotjín tokoan kʼoa nga tíbakóna kjoatsjoacha nga kʼoasʼin tibʼenele yaona nga tisitjosoan jmeni xi tso Biblia.

Saʼnda nga sʼa ʼndía kʼoa saʼnda nga kichona 18 nó kui kjoa política nʼio kitʼale kʼoa kʼoasʼin koankjainna nga tsín Niná. Tonga saʼnda nga kʼia je Biblia tíbasenkaona nga tisikʼantjaiya yaona. Jmeni xi koanjinna nʼio tsakasenkaona nga̱ likui tinʼio kisikjáojinña jmeni xi koa̱n nichxin xi sʼa nroa. Kʼiaa kisʼe̱nngindá nga nó 1993, kʼoa kʼianga nó 2000 kʼiaa chixankoa Tabitha xi kʼoati nʼio nda tísíxále Niná. Nga joaijin chʼasjeʼaníjin nichxin jokji tjen kʼoamanajin nga ʼmiyalaijin chjota jmeni xi tso Biblia. Nkjín chjota xi ʼmiyalaijin xi kʼoati kjoa política nʼio fijin kʼoa xi tsín makjainle nga tíjna Niná. Nʼio tsjoa sʼe tokoan nga tibasenkoa chjota nga tíbe je Jeobá.

Nga tokʼia kiskotʼaya Biblia kao testigole Jeobá, je xijchána tokʼoakoanle. Tonga tjíobe nga nda tifikoa yaona nga Biblia tikotʼaya. Nʼio tsjoa mana nga kʼoati jetjíokotʼaya Biblia je xijchána kʼoa nga kʼoati jefi kjoajtín xi satíoná.

Tabitha kao an tibʼenelaijin yaonajin nga timangíntjenngijin je kjoafaʼaitsjen xi tsjoá Biblia tʼatsʼe xi jechixan kʼoa tsjoa tjíosatío tokuinjin nga kʼoatinʼiaijin. Tobʼelañá, nga tinitjosuinjin je kjoafaʼaitsjen xi tso nga tsín koa̱n chʼanachalee xíngiaa, kui xi tíbasenkaonajin (Hebreos 13:4).

Likui tikui nʼio sikjáojinña tʼatsʼe kjoa xi tjín ndʼaibi kao jmeni xi koa̱n nichxin xi sʼa nroa. Yaa tijnajinle jtín xi tsʼe testigole Jeobá xi tojngo familia mani, xi nyʼán, xi jtín tjío kʼoa xi tongóson sʼin bekon xínkjín. Kui jebi xi nʼio tsakasje kʼoa xi koanmena ngantsjai.