JE Doreen ñaki tokʼoakoanle kʼianga kʼoatsakʼinle nga tumor kinroaya jko̱ Wesley, xi xʼinle mani kʼoa xi tosʼa 54 nóle. * Je chjinexki kʼoakitsole nga totjíchoa̱sa sá kʼoéjnakon. Je Doreen itso: “Ñaki tokʼoakoanna, nkjín xomana nga tsín titsaʼbeña jokisʼian. Alikui kui ʼbe tsa jin xi kui kjoa kuitjátojinjin”.

Tojo kisʼe kon je Doreen, kʼoasatío tokoán ngatsʼiaa kʼianga kui kjoa bitjatojiaan. Kʼianga sʼejinná nga kui chʼin xi tsín timandani kakatʼale jngo xíngiaa, nʼio nikjáojiaan. Tjínnele nga si̱kuindaa tonga kʼoati tsín choa ñʼai maná nga kʼoanʼia. Kuinga nʼio tse nganʼio machjénsíni. Jméni xi koa̱n sʼin je xi tjío ya yaniʼya nga tsjoánganʼio kʼoa nga sikuinda je xi tímʼe. Jméni xi koa̱n sʼin xi tjíosíkuinda kʼiatsa nʼio tjíosíkjáojin. Kʼianga sa táo sa táo jekjima xi tímʼe, jméni xi kuenta sʼin je xi tjíosíkuinda. Kuila títjon kataʼyaa ánni nga ñʼai masíniná nga nikuindaa je xi jenʼio táo.

Jela jngo siento nó tjínle, saʼnda ya naxinandá jñani tjín tao̱n, je chjota nʼio tochoatse tsakatiokon. Ngotjo kʼienni je chjota kʼianga chʼinʼbi kisʼe, kʼoa tjínkʼa xi kjaʼaísa sʼin kʼien. Nʼio tochoa koanni xi ya hospital ki nga koanxkile kʼoa ngisaa nkjín koanni xi toya niʼyale koankuinda kʼoa xi ya kʼien.

Nichxin xi tiyoaa ndʼaibi, nga ngisa tjín josʼin maxkile chjota, binyakao je chjinexki nga kui síchjén kʼoa ngisaa tsesa batiokon je chjota ninga jenʼio táo. Nichxin kjoatse, ngotjo kʼienni je chjota nga tsín kʼoasʼin koansinle, tonga ndʼaibi nkjínsa nó batiokon ninga tsín ñaki timandani. Kuinga sakʼoa nʼio faʼákonni kʼoa saʼnda tsín tima nga toje  síkuindani yaole. Kʼoa tse kjoama̱ sʼengile xi síkuinda kʼoa chaan chóbele.

Ngisaa nkjín chjota xi ya hospital mʼe tikʼoajinni xi ya niʼyale. Nichxin xi tiyoaa ndʼaibi, me ngatsʼi nga tsín be jósʼín jngo chjota kʼianga biya. Kʼianga nʼio tochoa mani xi be kuinga tsokjonnile kʼoa tsín tsoni kon nga síkuinda je xínkjín xi chʼin tjínle. Tonga jméni xi koasenkao nga koa̱n sikuinda.

Tojosʼin kaʼyaa je choa̱le Doreen, nʼio nkjín chjota xi nroajen kon kʼianga sʼejinle nga jetsín tikoa̱nndani je chʼin xi tjínle xínkjín. Kʼianga kʼoasʼin nʼio síkjáojin, jméni xi koa̱n sʼin nga tongini koationda. Jngo choʼndale Niná xi i̱ kitso nga tsakʼétsʼoa: “Tʼinyanáijin jósʼin kʼoéxki̱jin nichxinnajin nga katasʼenajin jngo ni̱ma̱ xi chjine” (Salmo 90:12). Koaan kʼoétsʼoalee je Niná nga katabasenkaoná josʼin nga nda si̱kʼayalee nichxin nga si̱kuindaa jokji tsesa kʼoéjnakon je xi tímʼe.

Kʼianga koa̱n kʼoasʼiaan jebi tjínnele tongini cho̱bayañá. Kʼiatsa je xi tímʼe nchja̱sa, koaan chjónangile ʼyáni xi koaanele nga kʼoakuitso jokoa̱ntʼain kʼianga jetsín tikoa̱n jme xi sʼinni. Kʼianga kʼoakuitso jmeni xi mele koa̱ntʼain kui xi kuinyakao je xi xínkjín mani nga skoe̱ josʼin, kʼoa nga tsín chʼaosʼin sikjaʼaitsjen kʼianga jme xi skoéjin. Tobʼelañá, koaan chjónangile tsa mele nga ya hospital koaimaxkile kʼoa tsa josasʼin mele nga koa̱nxkile. Kʼianga ñaki nda sʼe̱ndajin saʼnda nga títjon kui xi ngisa nda kuinyakao xi tjío ya yaniʼya nga ndasʼin tsjoánganʼio kʼianga jesa táo sa táo koa̱n je xi tímʼe. Je Biblia itso: “Alikui ndasʼin bichómani jngo kjoa jñani tsín nkjín ma xi fáoyani” (Proverbios 15:22).

Je xá xi kjinele xi síkuinda xi tímʼe kuinga sinʼio kon, nga kʼoakuitsole nga tjao ʼya kʼoa nga tsín tínjiotokon. Jméni xi koa̱n sʼiaan nga kʼoainganʼiolee je xi tímʼe. Koaan kʼoéxkialee kʼoa tsa kuijndálee jmeni xi sa̱sénle kʼoa xi sinʼio kon. Kʼoati tjínkʼa xi nda satío kon kʼianga ndoa ntsja kʼoa nga naskátso én xi nokjoakao.

Kʼoati machjén nga kʼoakatatso joʼmi je xi kuichosíxatʼa. Jngo xo̱n xi i̱ tso: “Je xo̱ñoaa alikui tokjoán sʼechjoa. Ninga kijnafe kji je chjota, tojo nda nrʼoe, kuinga tsín koa̱n jme xi kuixónsíñá, xi tsín kʼoakuixoán kʼianga tíjnakon”.

Koaan nga ñatjen kʼoétsʼoaa kao je xi tímʼe. Je  Biblia kʼoatso kʼianga ñandia je pastro Pablo kao xi ñatjen tsakʼetsoma, nʼio tse kjoa jaʼatojin kʼoa me kinikʼien. Je Pablo kisijéle nganʼio je miyole nga kʼoakitsole nga katabʼétsʼoantjai (2 Corintios 1:8-11). Kʼianga nʼio nikjáojiaan kʼoa nga nʼio táo chʼin xi katʼaná, nʼio basenkaoná kʼianga ñaki ni̱ma̱ná nroajinni nga bʼétsʼoaa.

Kʼianga ʼyaa nga jetíbiya jngo xíngiaa nʼio ba satío tokoán. Kuinga nʼio aon maniná nga tsín kʼoasʼin tjínndajin nga kuiyá. Alikui xá kisindaniná Niná nga kuiyá (Romanos 5:12). Je Énle kʼoatso nga je kjoabiya kontraná mani (1 Corintios 15:26). Kuinga tsín nda satíoni tokoán nga sʼejinná nga jngo xíngiaa kuiyá.

Kʼianga jeʼyale nga tojeme kuiyá je xi tímʼe, kui xi koasenkao xi xínkjín mani nga tsín nʼio tso̱kjon kʼoa nga chókjoajinle je kjoa xi kjoaʼatojin. Je rekuadro jñani: “ Josʼín kʼianga tojeme kuiyá” tso kui faʼaitʼa jmeni xi male je xi tímʼe kʼianga tojeme kuiyá. Alikui tongatsʼi nga ngóson sʼín kʼoa tsa ñaki kʼoamale jotso je rekuadro.

Kʼianga toje kasʼeñe xi kamʼe, koaan chja̱kaonajmí je xi kichotsjoánganʼio nga koa̱nkuinda. Je xi xínkjín mani xi kʼien kao xi kisikuinda machjén nga kʼoakʼuínle nga jejaʼatojin je kjoa xi ngisa ñʼai tjín kʼoa nga tsín tikjoañʼai tífaʼáni xi kʼien. Je Niná xi kisindaná kʼoatso nga “xi jekʼien nijmejin xi tibeni” (Eclesiastés 9:5).

Nʼio machjén nga je Niná si̱nʼiotʼaa yaoná ngantsjai, jolani kʼianga jngo chʼin xi tsín timandani kakatʼale je xíngiaa, kʼoa kʼianga kjoaba tiyojiaan tʼatsʼe nga kinichaa je xíngiaa. Je Niná sínʼio tokoán kʼoa jé síchjén chjota xi nda tso én xi fákaoná kʼoa xi binyakaoná. Je Doreen itso: “Alikui tsakʼasjengia josʼin kitsʼainganʼiona. Tsʼato kʼoakji nganʼio kitsʼainajin jokji koa̱nchjénnajin. Ñaki kʼoakisʼe tokuijin kao xʼinna nga joxi jeni Jeobá xi i̱ kitsonajin: An tijnakaono, koasenkaono nga chókjoajinno. Jebi alikui chajinna”.

Jé Jeobá xi ngisa nda síkuindaná. Nda majinle josatío tokoán kʼianga kjoañʼai bitjatojiaan nga̱ jé kisindaná. Koaanle koasenkaoná kʼoa tsjoánganʼioná nga tosi tonda chókjoajinná. Kʼoa kʼoatso je Niná nga kjoaʼaxin je kjoabiya ngantsjai kʼoa nga sikjaʼáyanile xi jekʼien je xi ya tjíojin ya jinkjoafaʼaitsjenle (Juan 5:28, 29; Apocalipsis 21:3, 4). Kʼianga jekuitjoson jebi, koaan kʼoakuixoán jokitso je pastro Pablo nga i̱ kitso: “Ji kjoabiya, jñá tíjna naʼyátsʼinli. Kʼoa ji tsjó, jñá tíjna xi kinjeli” (1 Corintios 15:55).