NʼIO nkjín chjota xi kjaʼaí kjaʼaísʼin síkjaʼaitsjen jotjínni xi tʼatsʼe kjoabiya kao kjoabijnachon. Tjínkʼa xi kʼoatso nga xin ʼnde mangínkiyoaa kʼianga jebiyaa, xi kʼoasʼin makjainle nga kjaʼaí xi mʼónyaa. Kʼoa kʼoati tjín chjota xi kʼoatso nga toya fetʼa kʼianga jebiyaa.

Tsakui nichxin kʼianga sʼa koanjchíngai kʼoati tsakʼinyali jotjínni xi tʼatsʼe kjoabiya kʼoa tsakuije̱ josʼin makjainle je chjota jñani tsi. Ninga kjaʼaí kjaʼaílani sʼin makjainle je chjota, a koaan jchaa jméni xi maná kʼianga jebiyaa.

Siento nó tjínle nga kʼoasʼin tjíobakóya xi nyatítjonle relijión nga tojo biyochoaan kʼianga jebiyaa. Tobʼelañá, je xi chjotale Cristo tsole yaole, je hinduismo, judaísmo kʼoa kao islam, kʼoatso nga tjínná jngo ni̱ma̱ xi bʼejnakon kʼianga jebiyaa kʼoa nga ya fi ya jña tjío je ánkje. Tonga je relijión xi budista ʼmi, kʼoatso nga kʼianga jemʼe jngo chjota, títjonkjoanla kjaʼaí kjaʼaí xi mʼónya, kʼoa chaan bichó nichxin nga tsín tikjoañʼai faʼáni kʼoa ñaki to tsjoasa sʼe kon, kʼoa jebi kui xi nirvana ʼmile.

Nga kui kjoamakjain tjínle je chjota yaa nroani nga nkjín xi kʼoasʼin síkjaʼaitsjen nga xin mangínkiyoaa kʼianga jebiyaa. Kʼoa kʼoati ya nroani nga kʼoatso je chjota nga jetokʼoasʼin kichʼañá kʼoa nga kʼoasʼin tjínndajinle je Niná. Tonga, jótso Biblia xi tʼatsʼe jebi. Kataʼyala jmeni xi bakóya ya kjoaʼmiya xi fisani. Tsakui nichxin tokʼoakoa̱nli nga jchai jotjínni xi tʼatsʼe kjoabiya.