Ñʼai masjainá jokjoan kjoatjao xi bʼailee xíngiaa xi sasénle. Tonga je xi ngisa tjínle kjoandosin kuijin jokji chjí skoe̱kon je xi kʼoaile. Je kjoatjao xi chjí bekon jngo chjota tsakui nichxin alikui kʼoakji chjí skoe̱kon je xi kjaʼaí chjota.

Tobʼelañá, jngo xi sʼa xti tsakui nichxin kui xi ngisa chjí skoe̱kon tsa jngo celular kʼoa tsa jngo tableta kʼoaile. Tonga je xi jejchínga tsakui nichxin kui xi ngisa chjí skoe̱kon kʼiatsa jme xi tsjoále je xi chjotajchíngale mani. Kʼoa tjín ʼnde jñani kʼoasʼin ngale je xi sʼa xti kao xi jejchínga nga tao̱n bʼaile ánni nga kʼoasʼin sichjénni josʼin mele.

Ninga kʼoalani, nkjín chjota xi nʼio bʼénele yaole nga kui kjoatjao xi ngisasa nʼio chjíle tsjoále je chjota xi chjí bekon. Ño koya jchaa xi koasenkaoná nga katasasénle je chjota xi tjín xi kʼoaikjoatjaolee, tsa kuenta sʼiaan jebi ngisajin chjí skoe̱kon jmeni xi kʼoaikjoatjaolee.

Kʼianga kui bʼaile jmeni xi mele. Jngo chjota xi Belfast (Irlanda del Norte) tsʼe, xi jngo bicicleta tsakʼaile kʼianga te kʼoa tsa tejngo nóle, kʼoakitso nga kui je kjoatjao xi nʼio chjíle xi tsakʼaile, i kitso: “Jngokjoan bicicleta koanmena nga sʼe̱na”. Jebi kui bakó nga chjí bekon je chjota nga kui bʼaile jmeni xi mele. Tikjaʼaitsjenlai tsa ʼyani xi meli nga tjín xi kʼoailai. Tikjaʼaitsjain jméni xi chjí bekon, nga̱ jmeni xi chjí ʼyatokoán kui xi mená sʼe̱ná. Tobʼelañá, je xi pajchá ma kui xi chjí be nga ya batiokao je xtile. Tsakui nichxin kui xi mele nga kjitʼa skoe̱ je xtile kao xtindaile. Kʼiatsa je xtile kuinchja̱le nga ya katakjenkao, kuijin xi ngisa chjí skoe̱kon tikʼoajin tojmesani xi kʼoaile.

Kʼianga jchaa jmeni xi tsjoake tsa ʼyani, tjínnele nda kuinóʼyá kʼianga nchja̱najmí. Je Biblia kʼoatso nga je chjota katamale nda katanrʼoé kʼoa nga katanchja̱ (Santiago 1:19). Kʼianga chobanajmiá kao miyoná kʼoa kao xi xíngiaa mani, nda kuinóʼyá  jmeni xi tso ánni nga jchasíñá jmeni xi tsjoake. Tsa kʼoasʼiaan, ngisaa choa ñʼai koa̱nná nga kui kʼoailee jmeni xi tsjoa kʼoe kon.

Kʼianga kuikjoan machjénle je kjoatjao xi bʼaile. Kʼianga kuikjoan machjénná jmeni xi bʼaikjoatjaoná ngisaa chjí ʼyatokoán, ninga tsínkjoan nʼio tse tao̱n kasʼengi. Jókoa̱nni jchaa jméni xi machjénle je xi tjín xi kʼoaikjoatjaolee.

Xi koa̱n sʼiaan kuinga jesoa chjónangilee jméni xi mele je xi tjín xi kʼoaikjoatjoalee. Tonga tjínkʼa xi kʼoasʼin síkjaʼaitsjen nga ngisa nda nga tokʼiakjoan sʼe̱jinle je chjota xi tjín xi kʼoaile. Xi ijngosani, saʼnda tjínkʼa xi kʼoatsokixi jmeni xi tsjoake kʼoa jmeni xi mai tonga likui kʼoatso jmekjoanni xi machjénle.

Kuinga ndatjínni nga nda chótseen kʼoa kuenta sʼiaan josʼin tjío je chjota. Tobʼelañá, a sʼa xti, a jejchínga, a kje bixanjin, a jechixan, a kitsjion xínkjín axo kʼieen chjoónle axo xʼinle. A síxá axo jekoan jubilar. Kʼoa si̱kjaʼaitsjeen jmeni xi koa̱nchjénle je chjota kʼoa kui kʼoailee.

Kʼianga jchaa jmekjoanni xi ñaki machjénle je chjota xi jngo kjoatjao kʼoailee, koaan je chjónangilee tsaʼyani xi jekui kjoa jaʼatojin. Tsakui nichxin kʼoakuitsoná jmeni xi ñʼai maná kʼianga kjoa tiyojiaan. Kʼianga sʼe̱jinná jebi, kuijin kʼoailee je kjoatjao xi ñaki machjén kjoaixile je chjota.

Nga kʼiakjoan bʼaile nga machjénle. Je Biblia itso: “Jngo én xi kʼiakjoan nokjoaa nga machjén, ¡kjaínga nda síkao je xi nrʼoé!” (Proverbios 15:23). Jebi kui xi bakó nga machjén nga si̱kjaʼaitsjeen kʼiáni nga koa̱n kuinókjoaa ánni nga nda sʼe̱ni kon je xi kjuinrʼoéná. Kʼoati ma kao jmeni xi nʼia. Kʼiatsa kʼiakjoan kʼoailee jngo kjoatjao jngo chjota nga machjénle, kui xi nʼio tsjoa kʼoe kon.

Kʼianga ma bʼailee kjoatjao xíngiaa kʼiaa nga tjín xi bixan, tsa jngo ti xi jeme kjoele xo̱nle, tsa jngo xi jechixán xi ʼndílee tjíokoyale kʼoa tsa jmesani xi kjaʼaí. Tjínkʼa chjota xi bʼétʼaxo̱n kʼiáni nga koa̱n tsjoá jngo kjoatjao. Kʼianga kʼoasʼin bʼendajin, kui xi binyakao nga tongini kosonle jméni xi koa̱n tsjoákjoatjao. *

Koaan kʼoailee kjoatjao xíngiaa tojme nichxinni, alikui tokʼia nga tjínkjoan xi kjima nga kʼoasʼiaan. Tonga tjínnele nda chósonnilee. Tobʼelañá, tsa jngo chjota xi tjín xi tsjoákjoatjaole jngo chjoón, tsakui nichxin kʼoasʼin sikjaʼaitsjen je chjoón nga kui kʼoatísʼínni chjota jebi nga mesale skoe̱xkon. Tonga tsa tsínni kʼoatjín kon, likuijin ndasʼin kuichomani kʼoa kjoajin sʼe̱le. Kuinga kuenta sʼiansíñá ánni nga jngo kjoatjao tibʼaiñá.

Jotjín kon je xi kjoatjao tsjoá. Tojosʼin tiʼyaa, tjínnele si̱kjaʼaitsjeen tsa to kjaʼaísʼin koa̱njinle je xi tjín xi kʼoaikjoatjaolee. Xi ijngosani, tjínnele si̱kjaʼaitsjeen ánni nga tjín xi kʼoaikjoatjaoñá. Me ngatsʼiaa nga kui kʼoanʼiañá nga ndatjín tokoán, tonga nʼio nkjín chjota xi to bʼénele yaole nga tjín xi tsjoá. Kʼoa tjínkʼa xi kui kʼoasʼínni nga tjín xi kʼoaingajaonile kʼoa tsakuije̱ nga nda jchatokon.

Jméni xi sʼiaan nga ñaki kʼoatjín tokoán nga tjín xi kʼoee. Je Biblia itso: “Ngayije kjoa xi tsaon kʼoa katama kao kjoatjaocha” (1 Corintios 16:14). Kʼiatsa ñaki kʼoatjín tokoán nga tjín xi kʼoee, ndajin sʼe̱ kon je xi kʼoailee kʼoa jchañá nga nda sʼe tokoán nga tjotʼaa. Nga kʼoanʼia tsjoa sʼe kon je Jeobá, nʼainá xi tíjna ngʼajmi. Je pastro Pablo kʼoakitsole je chjotale Cristo xi ya Corinto tsʼe nga nda kisʼin nga kisikasénle tsojmi xi koanchjénle ndsʼe̱ xi Judea tsakatio. I kitsole: “Niná  tsjoake je xi kao kjoatsjoa tsjoá” (2 Corintios 9:7).

Tsa kuenta sʼiaan jmeni xi jekachotʼayajiaan ibi, koa̱njin kui kʼoee jmeni xi tsjoa kʼoe kon xi ngikʼa. Je Niná kuenta kisʼin jebi kao xi kjaʼaísanile kʼianga jngo kjoatjao kitsjoale je chjotasonʼnde. Je kjoaʼmiya xi ijngo kui jchaa, jósʼin tsoyanile én xi kjoabʼechjíntjai tso.