“Ngayije xi kjoanda, ngayije kjoatjao xi ñaki nda, nroani jangʼá, nroajenni Nʼainá xi tsakʼénda tsʼuí kao sá kao niño” (Santiago 1:17). Jebi kui nchja̱ni je kjoanda xi bakóná je Jeobá, je Nʼainá xi tíjna ngʼajmi. Ngayeje kjoatjao xi títsjoále Niná je chjotasonʼnde, tíjna jngo kjoatjao xi tsín jme xi mangóson. Jñánile kjoatjao jebi. Je Jesús i kitso ya Juan 3:16: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai”.

Nga kitsjoa je ʼNdíle Niná kui je kjoatjao xi ngisasa nʼio chjíle xi kitsʼainá. Nga kʼoakisʼin, koaan ndái kuiyolee je jée, nga majchíngaa kʼoa nga biyaa (Salmo 51:5; Juan 8:34). Kʼiatsa toñá chja̱ʼaxinlee yaoná je jée xi kichʼaa, likuijin kʼia kʼoakoa̱nná. Tonga je Niná nʼio tsjoake koanná kʼoa kitsjoa jmeni xi ndái sikatíoniná xi tʼatsʼe je jée kao kjoabiya. Kʼianga kitsjoa je ʼNdíjngole Jeobá nga tsakʼéchjíntjainá, je chjota xi sitjosonle Niná koaan koatio ngantsjai nichxin. Tonga, jméni xi kjoabʼechjíntjai ʼmi. Ánni nga nʼio koanchjénni. Kʼoa jósʼin basenkaoná.

Je kjoabʼechjíntjai kui tsoyanile jotjín bʼéchjíntjai jngo chjota kʼianga kʼoainile je tsojmile kʼoa tsa katanikʼéjnandaí jngo chjota xi tíjnanʼio. Je Biblia kʼoatso nga tsín jme jée kisʼele Adán kao Eva kʼianga sʼa koannda kʼoa nga koan koatio ngantsjai kao xtile tsakai ya sonʼndenaxó (Génesis 1:26-28). Tonga kisicha ngayeje nga tsín tikisitjosonnile je Niná kʼoa chjotajée koan. Jósʼin kichomani jebi. Je Biblia itso: “Xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Romanos 5:12). ʼNdele nga nda koatio je ntje̱le Adán, tosaa kui jée kisikakinle xi kjoabiya kichomani.

Kʼianga tjín xi bʼechjíntje tjínnele kʼoati tjín koa̱nchjíni jotjín xi kacha. Kʼianga toxá kisʼinni je Adán nga tsín tikisitjosonnile Niná, kisichaa je kjoabijnachontsjele. Tojo tso je Biblia, je ntje̱le Adán kui jée kao kjoabiya tsakinle. Kʼianga koa̱n ndái kuiyo ijngokʼalee je jée kao kjoabiya, ijngo kjoabijnachon xi tsje koanchjén, kʼoa kui je kjoabijnachonle Jesús (Romanos 5:19; Efesios 1:7). Kʼiatsa tsínla kitsjoa Niná je kjoabʼechjíntjai, tsínjinná kjoachoya nga koa̱n kuiyoaa ngantsjai nichxin josʼin tsakatio tsakai je Adán kao Eva (Revelación [Apocalipsis] 21:3-5).

Ngayeje kjoanda xi sokóná xi tʼatsʼe kjoabʼechjíntjai nga koa̱n kuiyoaa ngantsjai nichxin kui je “kjoatjao xi ngisasa nʼio chjíle” xi tsakʼainá. Nga koa̱njinná ánni nga tsín jme xi mangósonsíni je kjoatjao jebi, kataʼyala josʼin basenkaoná nga majinná kao xi jesa kachotʼayajiaan ya kjoaʼmiya xi jaʼato, tʼatsʼe ánni nga ngisa chjí jchasíñá je kjoatjao xi tsakʼainá.

Tsjoáná jmeni xi mená. Ñá xi chjotaa toxá kʼoasʼin koanndañá nga mená kuiyoaa ngantsjai nichxin (Eclesiastés 3:11). Xi totsaan nganʼio alikui kʼoakoa̱nná, tonga je kjoabʼechjíntjai basenkaoná nga koa̱n kuiyoaa ngantsjai nichxin. Je Biblia itso: “Je chjíle jée kjoabiya ní, tonga je kjoatjaole  Niná kjoabijnachon ngantsjai ní, xi totʼatsʼe Cristo Jesús Nainá” (Romanos 6:23).

Tsjoáná jmeni xi machjénná. Nijngojinla chjota xi koa̱nle nga kʼoechjíntjainá. Je Biblia kʼoatso nga tsín ʼya xi koa̱nchjíle jokji chjíle je kjoabʼechjíntjai xi tsakʼainá (Salmo 49:8). Kuinga kjoanʼio machjénniná nga Niná koasenkaoná ánni nga koa̱n ndái kuiyonilee je jée kao kjoabiya. Je Niná kitsjoaná jmeni xi machjénná nga “Cristo tsakʼéchjíntjai” xi tʼatsʼe jéená (Romanos 3:23, 24).

Kʼiakjoán nga machjénná kitsjoa. Je Biblia itso: “Cristo kʼen xi tʼatsaan, kʼia nga tojo chjotajée nía” (Romanos 5:8). Je Niná tsakʼéchjíntjainá kʼianga chjotajée kʼoa jebi bʼéjngoo tokoán nga tsjoakená ninga tojo jée kichʼá. Ningalani kjoañʼai tichjaʼá tʼatsʼe je jée xi kichʼá, je kjoabʼechjíntjai tsjoa bʼé tokoán tʼatsʼe je kjoanda xi sʼa nroaján.

Ánni nga kitsjoani. Je Biblia kʼoatso anni nga kitsjoani je ʼNdíle Niná nga tsakʼéchjíntjainá. Itso: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá” (1 Juan 4:9, 10).

Jméni xi sʼiain nga chjí jchatokuin je kjoatjao xi kitsjoali Niná. Tikjaʼaitsjain nga kʼoakitso Jesús ya Juan 3:16 nga ngatsʼi xi koa̱nkjainle xi tʼatsʼe kuitjontjaile yaole. Je Biblia kʼoatso nga “kui xi makjainná, kui xi nda nʼiotʼatakoán, nga kjoakixi nga tjío je kjoa xi choyalee” (Hebreos 11:1). Kʼianga sʼe̱ná kjoamakjain machjén nga sʼe̱ná je kjoankjíntokon xi tsʼe Niná. Kuinga chʼa̱sjeʼani nichxin nga katamali xi tʼatsʼe Niná, je xi kitsjoaná je “kjoatjao xi ngisasa nʼio chjíle” kʼoa jmeni xi sʼiain nga koa̱n kuijnai ngantsjai nichxin xi totʼatsʼe je kjoabʼechjíntjai xi kitsjoa je Jesús.

Kʼianga jchasai xi tʼatsʼe jebi, titjásʼain je pájina xi tíjna ya Internet ya jw.org/mau. Je testigole Jeobá kao kjoatsjoa kuitsoyali jotso je Biblia. Ñaki kʼoatjín tokuinjin nga koasenkaoli kʼianga koa̱nsali xi tʼatsʼe je kjoatjao xi kitsjoaná Niná. Kʼoa i̱jin sí: “Tsjoale kjoanda Niná xi totʼatsʼe Jesucristo Nainá” (Romanos 7:25).