Tsín jme fotografíale Jesús tjín. Alikui kʼia sénle tsakʼasje kʼoa ni xkósonlejin koannda. Tonga jokji siento nó tífaʼato, nʼio nkjín chjota xi sénle Jesús sínda.

Chjota jebi alikui ñaki tsabe jokjoanni kisʼe je Jesús. Tonga je xi kitjenngi nga kisinda je sénle Jesús kui kostumbre xi kisʼe nga kʼia, je relijión kʼoa tsakuije̱ josʼin kisasenle je chjota. Nga kʼoakjoan sén kisinda kuinga tsín beni je chjota jokjoanni kisʼe Jesús kʼoa jmeni xi tsakakóya.

Kʼianga kisinda chjota je sénle Jesús kʼoakisika joni jngo xi tsínle nganʼio, xi ndo tjín ntsja̱jko̱ kʼoa xi tochoa ntsja̱ʼa tjínle kʼoa xi ba kji nkjaín. Tjínkʼa chjota xi jo ánkje sʼin kisiká kʼoa tsa joni jngo chjota xi tsín mandosinle xi kjaʼaí. A mangóson je sén xi kisinda chjota jokjoanni kji je Jesús. Jósʼin jchañá. Jngo koya josʼin nga jchaa kuinga chótʼayajiaan jmeni xi tso je Biblia xi tʼatsʼe Jesús, ánni nga jchasíñá jokjoanni kisʼe.

Én jebi jé Jesús xokitso, tsakui nichxin kʼia kʼoakitso nga jekisʼenngindá (Hebreos 10:5; Mateo 3:13-17, TNM). Jókisʼe je Jesús. Tongini 30 nó nga kjesa tsínjin i̱ Sonʼnde, je ánkje Gabriel i kitsole María: “Koa̱njcháyali jngo ʼndíxʼin xi kʼoaí, [...] ñaki tsje xi jtsín, ʼndíle Niná kʼuín” (Lucas 1:31, 35). Je Jesús chjotatsje koan joni je Adán kʼianga sʼa koannda (Lucas 3:38; 1 Corintios 15:45). Nchjájin kisʼe Jesús kʼoa tajajin koan kʼoa tsakui nichxin je María kitjojin, xi chjota judío kitjenni.

Je Jesús ntsja̱nkjaín tsakja, kʼoatsakja jotsakjayo je chjota judío nga kui nichxin. Nga kʼia, je chjota xi ntsja̱nkjaín fayo kui xi kitsoyanile nga tjínle kjoaxkóntokon kʼoa nda kisisinle yaole. Je Jesús ndajin kisisinle je ntsja̱nkjaín, tsakʼéjonjin je ntsja̱jko̱. Tojé chjota nazareo xi tsín koan tsakate ntsja̱le joni tsa je Sansón (Números 6:5; Jueces 13:5).

Je Jesús tajaa koan, mejin toxá chjineyá kisʼin je xi 33 nó, nga kʼia tsín kʼoakjoan ki̱cha̱ kisichjén jokjoan xi síchjén ndʼaibi je xi chjineyá (Marcos 6:3). Kʼianga sʼa tsakʼétsʼiakao nga kitsoyason, aliʼya xi tsakasenkao nga “tsakʼaonsje ngatsʼi [chjota ya] yo̱ngo̱ kao barrébe kao nra̱ja̱be. Tsakʼétsaoba taonle xi taon síkʼantjai. Ñaki kisinyangajten yámixa̱le” (Juan 2:14-17). Kʼianga koan kʼoakisʼin jebi nʼiojin kisʼele nganʼio. Je Jesús kʼoasʼin kisichjén kjoabijnachonle nga kisitjoson jmeni xi mele Nʼaile. I kitso: “Kʼoati xi xinsa naxinandá machjén nga kuinchjaya je énnda xi tʼatsʼe kjoatéxomale Niná nga̱ kui xá jinroania” (Lucas 4:43). Kʼoati nganʼio koanchjénle nga kichokjoale nga tsakʼamje ngakjijnda Palestina nga kitsoyason.

Kʼianga nda chjota koan je Jesús, kui xi tsakinyakao je chjota nga tja̱ koannile je kjoañʼai xi tjíofaʼá (Mateo 11:28-30). Nga tjao koanle je chjota kʼoa nga tsakakóle kjoanda kui xi tsakinyakao nga koanndosinnile jmeni xi tsakakóya. Saʼnda je xi sʼa xti koanmele ya tsakatiokao, je Biblia itso: “Jesús tsakʼangʼa ʼndíxtibe” (Marcos 10:13-16).

 Kʼianga jeme kuiyá Jesús tsee kjoañʼai tsakjaʼá kʼoa aon koanle tonga likui tongantsjai nga ba kise kon. Tobʼelañá, kʼianga tjín xi chixan ya Caná, kitsjoanganʼio nga nda kitjo je sʼuí, bino kisikʼóya je nandá (Juan 2:1-11). Kʼianga kisʼejna ijngo kjoajtín, je Jesús kui kitsoyale chjota jmeni xi tsínkʼia kichajinle (Mateo 9:9-13; Juan 12:1-8).

Kʼianga kitsoyason, je Jesús kʼoakitsole je chjota xi kinrʼoéle jméni xi koa̱n sʼin nga koa̱n koatio ngantsjai nichxin (Juan 11:25, 26; 17:3). Kʼianga tsakʼéyanajmíle je xi 70 chjotatjenngile jokoan kʼianga kikakóyason, je Jesús “nʼio koantsjoale” kʼoa i kitso: “Katatsjoano nga je jaʼaínno jetjítʼa ya ngʼajmi” (Lucas 10:20, 21).

Je chjotatítjonle relijión xi tsakatio nga nichxinle Jesús, nʼio tsakásjaile jokisʼin nga nda katabʼasje je chjota kʼoa nga nʼio kataʼyale (Números 15:38-40; Mateo 23:5-7). Tonga je Jesús kʼoakitsole je chjotatjenngile nga tsín ngʼa katabʼasje yaole kʼoa nga tsín je katabánentsja je xi ngikʼa (Lucas 22:25, 26). Kʼoa i kitsosale: “Tikuindalao yaono chjota skribano xi tsjoale bʼamje kao najñojnro, kʼoa tsjoale nga chjota sitiʼndale ya ndi̱tsi̱nbe” (Marcos 12:38).

Kʼianga ya tsakʼejnajinle Jesús je chjotankjín saʼnda tsín tsaʼyale tsa yani tíjna (Juan 7:10, 11). Kʼianga ya tsakʼejnajinle je xi 11 chjotatjenngile, alikui tsaʼyale jokji xi je. Je Judas xi tsakʼanachale, jngoo choa̱ kitsjoale je chjotankjín nga katabe ʼyáni xi je Jesús, i kitsole: “Je xi an kʼoendsoʼa, jé níbe” (Marcos 14:44, 45).

Ninga nkjínla koya jmeni xi tsín ʼyaa xi tʼatsʼe Jesús, tonga alikui kʼoakisʼe josíkjoan je chjota xi sénle sínda. Je xi ngisa chjíle kui josʼin jchatokoán ndʼaibi je Jesús tikʼoajinni jokisʼe.

Kʼianga jekʼoakitso Jesús je én jebi, tongi choatsesa tsakʼejnakon (Juan 14:19). Kitsjoaa kjoabijnachonle nga tsakʼéchjíntjai “nkjín chjota” (Mateo 20:28, TNM). Nga koanjanni nichxin, je Niná jo espíritu sʼin kisikjaʼáyale je Jesús kʼoa kʼiaa tsakakó kʼale yaole je chjotatjenngile (1 Pedro 3:18; Hechos 10:40). Jókji Jesús nga jejaʼáyanile. Tsʼantjaiyajin jokisʼe, saʼnda je chjotale xi nʼio miyole koanni alikui ti tsabexkonni kʼianga kiskajin. Je María Magdalena kʼianga tsabe je Jesús jé chjota xi naxó síkuinda koanle. Kʼoa jao chjotatjenngile xi ya Emaús tjíofi nga kitsaojin, jngo chjota xi xin naxinandále koanle (Lucas 24:13-18; Juan 20:1, 14, 15).

Jókji tsokʼoa ndʼaibi je Jesús. Tsʼato 60 nó jaʼato nga jejaʼáyanile Jesús, je pastro Juan nkjín kʼa kisakole sén nga tsabe je Jesús. Ali tsa kʼoajinsʼin tsabe nga kjoañʼai tífaʼá nga kro kjitʼa. Tsabee nga je Jesús “naitítjonle xi nai ma, kʼoa ngʼajko̱le je xi chjotatítjon” ma. Jeme sikjeson je chjota xi kontra batiole Niná kʼoa kao ánkjele Na̱i kʼoa nʼio tse kjoanichikontʼain kjoaʼaíkao i̱ Sonʼnde (Revelación [Apocalipsis] 19:16; 21:3, 4).