Je Don kao Margaret * nʼio tsjoa tjíole nga je tsotile kao xínkjín kichosíxatʼa. Je Margaret nʼio nda male bʼénda tsojmi xi ma chine. Kʼianga tojeme koai je xtile, kui koanmele tsakʼénda je sopa xi keso xinyájin, xi ngisasa nʼio tsjoake je xtindaile.

Je Margaret kichosíkʼéjnason je tsojmi xi tsakʼénda ya sonyámixa̱ jñani tjío ngatsʼi. Kʼianga kiskoxʼángi, ñaki tokʼoakoanle nga tsínni tsakinyájin sopa * je keso xi tsakʼénda.

Ninga sʼa xtiaa kʼoa ninga jekoanjchíngaa ngatsʼiñá nga saténgiaa. Tsakui nichxin tsín chosonnilee josʼin nokjoaa kʼoa tsakui kʼoanʼiaje̱ jmeni xi tsín ndatjín. Ánni nga saténgisíñá. Jókoa̱n sʼiaan. A koa̱n nga tsín kʼoakatama. Kʼianga chósonnilee josʼiaan koasenkaoná kjoachjonangi jebi nga tsín nanda sa̱téngiaa.

Kʼianga nda bitjo jmeni xi nʼia nda sʼe tokoán kʼianga ʼya xi kʼoatsoná nga ndatjín jmeni xi tinʼia. Tonga kʼianga saténgiaa ninga tsín toxá nʼiañá kʼoa ninga tsín ʼya xi skoe̱, a kʼoabixoán nga ñá kasʼená jée. Kʼianga kʼoasʼiaan kjoanangitokon machjénná.

Kʼianga ngʼakon maa tsakui nichxin tsín kuenta sʼiaan nga sa̱téngiaa, tsa kʼoéʼmaa kʼoa tsa kjaʼaí xi kjoáne. Nga kʼoanʼia likui nda bichótsjoá, tsín sʼendajin je kjoa kʼoa tokjaʼaí xi sʼene ninga tsínni je tjínle jée. Tsakui nichxin tsín jme xi koa̱nná ninga kʼoasʼiaan tonga si̱kjaʼaitsjeen nga kuenta kʼoailee je Niná nga jngó jngoá (Romanos 14:12).

Niná alikui nʼio bʼéjinkon kʼianga saténgiaa. Je libro xi tsʼe Salmo kʼoatso nga “tjínle kjoamatokon kʼoa mamake chjota”. Kʼoa itsosa: “Alikui to jée koanená ngantsjai, kʼoa alikui tondiaa kʼoengijti kon”. Je Niná bení nga chjotajée maa kʼoa tjín jmeni xi ñʼai maná kʼoa “faʼaitsjenle nga to chaoñá” (Salmo 103:8, 9, 14).

Tojo sʼín jngo nʼai nga bakóle kjoamatokon xtile, je Niná kui xi mele nga kʼoati sʼiaan tsanda ñá (Salmo 130:3). Jé Biblia síchjén nga tsjoáná kjoafaʼaitsjen kʼoa nga bándiaaná ánni nga tsín nʼio si̱kjáojinsíñá kʼianga saténgiaa kʼoa tsín tokui kuenta sʼiaan nga saténgi xi ngikʼa.

Kʼiatsa tsín nda bitjo jmeni xi kasʼín jngo chjota, tjínkʼa xi tokui síkʼayale nichxinle nga kjaʼaí xi báne kʼoa nga tokui basenngini yaole tsa jme xi katso kʼoa tsa jme xi kasʼín xi ngikʼa. ʼNdele nga kʼoasʼiaan, tsa kasíkiʼaon xi kjaʼaí jme xi kabixoán tongisa nda nga si̱jélee kjoanichatʼa kʼoa kʼoéndajiaan kjoa. Kʼoa tsa jmeni xi nʼia xi tsín nda kuichotsjoá tochale tiñá sikiʼaonniná kʼoa tsa kjaʼaí xi sikiʼaon kʼoa ʼndele nga si̱jtilee yaoná tosa kʼoéndajiaan nga kjoa sʼená. Tsa kʼoasʼin si̱kjaʼaitsjeen  nga tsín ñá kasʼená jée tosa tokoantsesa je kjoa. Je xi ngisa ndatjín xi sʼiaan kuinga kʼoéndajiaan jmeni xi koan kʼoa si̱chajiaan.

Kʼianga kjaʼaí xi sʼele jée ngotjo nijtinilee yaoná. Tonga xi ngisa nda kuinga kjuintjenngiaa je kjoafaʼaitsjen xi kitsjoa Jesús: “Ngayije kjoa xi meno nga síkaono chjota, kʼoatisʼin tikaonio nga je” (Mateo 7:12). Kʼianga kui kʼoanʼia xi tsín ndatjín ninga tsín nʼio tjínle kjoandosin, bʼailee kjoanda xíngiaa kʼianga bakóná kjoamatokon kʼoa nga tsín kuenta sʼín jmeni xi kanʼia. A tsín koa̱n nga kʼoati sʼin koakolee kjoanda je xi kjaʼaí (Efesios 4:32).

Tojo tso jngo diccionario kui saténgiñá nga tsín nda nikjaʼaitsjeen, tsa tsínni kʼoatjín jmeni xi kʼuínná kʼoa tsa tsín nda kuinóʼyá jmeni xi kʼuínná. Tjínnele si̱kjaʼaitsjeen nga kʼoamaa ngatsʼiaa. Tonga nga tsín tontsjai kʼoakatamaa, si̱tjosoán jotso kjoafaʼaitsjen xi tsjoá je Biblia.

Jngo koya xi koasenkaoná kui jmeni xi tso Proverbios 18:13: “Kʼianga jngo chjota xi tokjoan nchja̱ nga tikje nrʼoéjinni jotjínni kjoa, to chjotachininí kʼoa nangi síkʼéjna yaole”. Kʼianga ndakjoanla kuinóʼyá kʼoa nga nda si̱kjaʼaitsjeen jmeni xi kuixoán kui xi koasenkaoná nga tsín toxkia kuinókjoaa kʼoa nga tsín toxkia sʼiaan. Kʼianga nda kuinóʼyá jmeni xi ʼminá kui koasenkaoná nga tsín toxkia kjoáne jée xíngiaa.

Ijngo kjoafaʼaitsjen xi koasenkaoná kui jebi: “Tojo kji ngayije xi koa̱nno, kʼoatʼiaon jméni nga nyʼán kuiyosínio kao ngatsʼi chjota” (Romanos 12:18). Kʼoénelee yaoná nga nyʼán sʼin kuiyokoaa xíngiaa kʼoa jtín sʼin kuiyoaa. Kʼiatsa ʼya xi ñatjen nixá jchaxkoán kʼoa nda si̱koaa. Kʼoakʼuínlee jñani nda sʼin kʼoa si̱nʼioá kon. Kʼianga kʼoanʼia ngisaa choa ñʼai maná nga nichatʼalee xíngiaa kʼoa nga tsín kuenta nʼia jmeni xi katsoná kʼoa saʼnda je kjoa xi ñʼai tjín choa ñʼai koa̱nná nga kʼoéndajiaan.

Jmeni xi tsín nda nʼia tikui basenkaoniná nga nindayaa yaoná. Alikui tokui chʼa̱ngiñá tsa jme xi tsakixoán kʼoa tsa jme xi kinʼia, tosa si̱ndayaa yaoná. Jebi koasenkaoná nga tsejtaa koaan, nga koakoá kjoanda kʼoa nga koa̱nná chjoéxkoá yaoná kʼoa nga koakosaa kjoaʼindajintakon, kjoanyʼán kao kjoatsjoacha (Gálatas 5:22, 23). Jebi koasenkaoná nga tsín tikʼoasʼianñá xi ngindia. Ali tokuijin si̱banilee yaoná, tonga kʼoati likui to kʼoéjngoñá tokoán. Jmeni xi kʼoati koasenkaoná kuinga tsjoa kʼoé tokoán.

Ndajin sʼin kuichomani kʼiatsa tsínkui nʼio kʼoéjintokoán nga saténgiaa. Nyʼánjin sʼin kuiyoaa kao xi ngikʼa kʼoa ndajin sʼe̱ tokoán. Kʼiatsa si̱jinlee yaoná jñani tsín nda nʼia, ndajin sʼe̱ tokoán kʼoa chjinejin koaan. Xi ijngosani, tsínjin kjoaʼajen tokoán kʼoa tsínjin kʼoasʼin si̱kjaʼaitsjeen nga ñá tjínná jée. Kʼianga koa̱njinná nga kʼoati kui xi ñʼai male xi ngikʼa koasenkaoná nga si̱miyosaa. Kʼoa xi ngisa nʼio chjíle kuinga koa̱nná chjénngilee je kjoatsjoachale Niná kʼoa koa̱nná si̱chatʼaa (Colosenses 3:13).

Jósʼin kichotsjoáni jmeni xi koanle Margaret, xi kanikʼaxki̱ná jña fitsʼiani kjoaʼmiya jebi. A koanjtile. Mai. Tosaa to tsakijno ngatsʼi kʼoa tsakjenní ninga tsínle sopa je keso xi tsakʼénda. Ninga jenkjín nó jaʼato, je xtindaile tojo kʼoasʼin tsakʼéyanajmíle xtile jmeni xi kisʼin Margaret kʼoa kao kjoatsjoa síkjaʼaitsjenjin.