Kui jebi xi kitso jngo tsoti xi 13 nóle kʼianga jngo níaʼndí tsakʼaikjoatjaole. Jngo chjoón xi empresa síxá kʼoakitso nga ñaki kisikʼantjaiya josʼin tíjna kʼianga jngo computadora kitsjoale je nʼaile kʼianga sʼa xtisa. Jngo chjota xi chriansʼa kichonóle nga chixan kʼoakitso nga je tarjeta xi chjoónle kitsjoale xi jesoa kiskijon, nga kuisa kjoatjao xi nʼio chjíle xi tsakʼaile.

Nga xki̱ nó, nkjín chjota xi kui síkʼayale nichxinle kao nganʼiole nga kui básjai je kjoatjao xi ngisasa chjíle nga kui tsjoále je miyole kʼoa tsa xi xínkjín mani tsa jme xi tjíosʼín. Je chjota xi tjín xi tsjoákjoatjao kuijin xi mele nga nda katasatío kon je chjota xi tjín xi tsjoále tojo kisatio kon xi jekanikʼaxkiaa. A meli nga kʼoasʼin nda sʼe̱ tokuin kʼiatsa jngo kjoatjao kʼoai kʼoa tsa ji kʼoaili.

Kjoafaʼaitsjen jebi tsakui nichxin sasénná, nga̱ kui mangínñá jotjín kon je xi katsjoáná, ali tsa tokuijin josʼe tokoán nga tjín xi bʼainá. Je Biblia itso: “Tongisa ndaní nga kʼoee kaoni tsa nga chjoé” (Hechos 20:35). Tonga ngisaa tsjoa sʼe tokoán kʼianga tsjoáná kjoanda je xi tjín xi bʼaikjoatjaolee.

Jméni xi sʼiaan nga tsjoa katasatío tokoán kʼianga tjín xi bʼaikjoatjoá kʼoa nga tsjoa katasʼe kon xi bʼailee. Kʼoa tsa tsín kʼoakoa̱nná nga kui kʼoee je kjoatjao “xi ngisa chjíle”. Jókoa̱nni jchaa tsa skoe̱chjí kjoaixi je chjota kʼianga tjín xi kʼoailee.