Je Rosi itso: “Ñaki tokui kisikjaʼaitsjen je kjoa xi kisʼena, kʼoa ngotjo ngosá kui kisikjaʼaitsjenña xi tsín ndatjín”. Jngo testole Biblia xi tsakasenkao kui Mateo 6:34, jñani tso: “Ali bʼexkónjinlao yaono xi tʼatsʼe nyaon, nga̱ nyaonli sʼe̱no kjoa xi kʼoéxkónnilao yaono. Katamanile jngójngó nichxin kjoañʼaile”. Je Rosi kʼoatso nga kui én jebi xi tsakasenkao nga tsín tikui kisikjáojinni je kjoa xi sʼe̱ nga koa̱nnyaonni. Itsosa: “Jela nʼio tse kjoa tjínna, kʼoa ngisajin sikjáojinngáña tsakui sikjaʼaitsjen jmeni xi kje kʼoamajin kʼoa tsa tsínni kʼoakoa̱n”.

Je Yasmín kʼoati tso nga tse kjoanikjáojin kisʼele. Itso: “Tokiskiʼndáña ngantsjai kʼoa sakʼoaa tsín kisʼefe. Kui ngisa nʼio kisikjaʼaitsjen xi tsín kixi tíjna”. Je testole Biblia xi tsakasenkao kui 1 Pedro 5:7, jñani tso: “Je tikʼamio ngayije kjoanikjaojinno, nga̱ je tísíkuindano”. Je Yasmín itsosa: “Tosi tonda tsakʼetsʼoale je Jeobá, kʼoa xi jeki nichxin tsaʼbeña josʼin tsakasenkaona. Ñaki koantjaana. Sakʼoaa tojo kʼoasʼe tokoan, tonga jeʼbe jmeni xi sʼian kʼianga kʼoama”.

Jngo chjoón xi Isabella ʼmi, itso: “Nga skan nikatioá jmeni xi nʼia tojejin kʼoasʼin kichʼanijin nga̱ kʼoati sʼín je nʼaina. Sakʼoaa likui ndi̱to̱n kʼoasʼian jmeni xi nʼio chjíle, tosaa to telebisión kotsenle kʼoa tsa maije̱ tosikjáyaña. Alikui ndatjín nga kʼoanʼia nga̱ ngisaa tse estrés sʼená, kʼoa xijemani, alikui nda bitjosonná jmeni xi nʼia”. Je testole Biblia xi tsakasenkao kui 2 Timoteo 2:15, jñani tso: “Kjaínga nda tixítíyai, jméni nga kuisenjnabasensíni nga nda kuitjui tʼatsʼe Niná, joni jngo xi síxá xi tsín tsa jme xi koa̱nsoale”. Je Isabella itsosa: “Alikui kui xi koanmena nga chʼao sʼe̱ kon je Jeobá xi totʼatsʼe xána, nga skan sikʼéjna jmeni xi tjínnele kʼoasʼian”.

Kʼoa je Kelly itso: “Kʼianga jetjínnele koa̱njngona je xá xi tisʼian, kʼiaa bʼenda nga tochoasa chale. Kʼoa tokjiʼndáña, tochoasa ora bajnafe kʼoa nʼio sikjáojian. Alikui nda sʼe tokoan”. Xi nʼio tsakasenkao je Kelly kui Proverbios 13:16, jñani tso: “Je xi chjine títjonkjoanla kosonnile jmeni xi sʼín, tonga je chjotachini ñaki bakó nga tsín ndasʼin síkjaʼaitsjen”. Kʼianga kui kisikjaʼaitsjenjin jmeni xi tso je bersíkulo jebi, je Kelly kʼoatso nga koanjinle nga ndatjín nga títjonkjoanla chosonnilee jmeni xi nʼia kʼoa nga tongini bʼendajiaan. Kʼoa itsosa: “Ndʼaibi bʼetʼaxo̱nña jmeni xi sʼian, kui xi basenkaona nga nda bʼendajian je xá xi sʼian kʼoa nga tsín tokʼia bʼenda nga tojekjoan machjén nga tjínnele koa̱njngona”.

Je Cristina itso: “Je xʼinna kitsjionna kʼoa toʼan tisijchá je ʼndíxtina xi ño mani”. Je testole Biblia xi tsakasenkao kui Proverbios 17:17, jñani tso: “Jngo xi ñaki miyo tsjoakená tokʼiani, kʼoa jngoyale ndsʼeñá kʼianga kjoaba tijnajiaan”. Je Cristina jé choʼndale Niná kisimiyo. Kʼoa itsosa: “Je miyona nkjín koya josʼin kitsjoanganʼiona. Tjínkʼa xi kui tsojmi xi ma chine kao naxó kichokaonajin. Je xi jan kʼa kinikʼantjaiyaijin jñani tsakiyonijin, tsakinyakaonajin je miyonajin. Kʼoati tsakasenkaona nga kisokona jngo xá. Tsakinyakaona ngantsjai je miyona”.

Je Diana, xi jenása kabʼaxki̱, kʼoati ba kisʼe kon. Kʼoa jókisʼe kon kʼianga nʼio tse kjoa jejaʼatojin. Itso: “Kʼoakoanna joni tsa jngo pelíkula tikotsenle tʼatsʼe josʼin tífaʼato je nichxin, toʼan tijna koanna”. Je testole Biblia xi tsakasenkao kui Salmo 68:6, jñani tso: “Je Niná títsjoále jngo ʼnde jñani koatio je xi toje tjío”. Je Diana itsosa: “ʼBeña nga tsín ñaki jngo ndʼia jñani biyoʼyá tínchja̱ni je bersíkulo jebi. Koanjinna nga kui xi tsonile nga je Niná síkuindaná nga tsín kuinókjoaan, nga je sikuindaná kʼoa nga ya kuiyojinlee je xi tsjoake Jeobá. Tonga kʼoati koanjinna nga títjonkjoanla je Niná sichriantʼale tsa mena nga chrian koatejnale xi ngikʼa. Kui Salmo 37:4 tsakasenkaona, jñani tso: Nʼio nda katasʼe tokuin xi tʼatsʼe Jeobá, kʼoa jé tsjoáli jme xi mele ni̱ma̱li”.

Je Diana itso: “Koanjinna nga tjínnele je Jeobá sinʼiotʼa, tsínsa ʼyani xi tjín joni je. Tsakʼendajinña jmeni xi sʼian nga ngisa simiyoa je xi ngikʼa, xi kʼoati je Niná síxále. Kui ngisa kuenta kisʼian jñani nda sʼín, kʼoa alikui kui kiskotsenle jñani tsín nda sʼín”.

Je xi Niná síxále tojo chjotajéení. Jin xi testigole Jeobá maijin kʼoati tjínnajin kjoa. Tonga je xi kʼoasʼin fitjenngi jotso je Biblia, bʼénele yaole nga binyakao xi kjaʼaí. Kuinga nʼio ndasʼin bichómani kʼianga je nimiyoaa chjota xi kʼoasʼín. A koaanle koasenkaoná je kjoafaʼaitsjen xi tsjoá je Biblia kʼianga kʼoéndajiaan je kjoa xi sʼená, xi ñʼai maná nga bʼendajiaan nichxin xi tiyoaa ndʼaibi, jolani nga jngo chʼin xi nʼio táo katʼaná kʼoa tsa jngo xíngiaa biya.