Je Diana, xi jenása kabʼaxki̱, kʼoatso nga kui je kjoanikjáojin xokisikao nga sa tse sa tse tsakʼini. Je Biblia alikui bʼéchjoa nga xán ʼyoa, tonga itso: “Ali yajin bijnajinlai je xi síkʼatone choa̱le jokji ʼbi je xán” (Proverbios 23:20). Kʼianga xán ʼyoa, yaa nroani nga chʼin sʼená, alikui nda biyoaa ya yaniʼyaná, kʼoa miyón chjota síkʼien nga xki̱ nó. Tsa koaitjenngi chjota je kjoafaʼaitsjen xi tsjoá Biblia, alikuijin kui kjoa jebi jtsaojin.

Je Diana kʼoakisʼin kʼoa itso ndʼaibi: “Tsaʼbeña nga tsínni faʼáxinna kjoanikjaojin je xán. Kʼoakisʼian jotso Filipenses 4:6, 7, jñani tso: Ali kʼoajin mano. [...] Kʼoasʼin katasʼejinle Niná jme xi nijáo. Kʼianga jemanjio kʼianga nʼio kisikjaʼaitsjen, tsakʼetsʼoale je Jeobá kʼoa tsakʼeyanajmíle jokisʼe tokoán: nʼio jti koanna, likui titsaʼbeña jokisʼian... kʼoakixinle nga katabasenkaona nga tsjoa sʼe̱ tokoan. Kʼoa nga manyaonni, tsakʼenele yaoná nga tsín tikʼoasʼeni tokoan. Nga tsakʼetsʼoale je Jeobá kui xi tsakasenkaoná nga kui kisikjaʼaitsjen jmeni xi tjínná, kʼoa tsínkui kisikjaʼaitsjen jmeni xi tsínna. Ñaki kʼoatsakʼe tokoan nga tsín tixán skʼuiña, nga̱ tsaʼbechjíña je kjoanyʼán xi kisokona kʼoa alikui koanmena kisicha”.

Je kjoachajngi nʼio tse kjoaʼaon kao kjoachjaʼatokon síkatíojinná. Tonga je kjoafaʼaitsjen xi tsjoá Biblia basenkaoná nga tsín kjoa tsaojiaan, nga̱ tsoya jmeni xi kui kaníjinná, tobʼelañá, nga tjín xi si nikoaa kʼoa kao pornografía. Je Samuel, xi sʼa xti, itso: “Nʼio choa ñʼai tíjna nga ʼya xi si nikoaa... Sakʼoaa je xi si kisikoa saʼnda tsínni mandosinna, tonga nga tsaʼbe nga mandosinle xi tʼatsʼan, kui xokisikaona nga kʼoati joxi mandosinna kisikoa”. Kʼoa nga kʼoatsakʼinle nga tokʼoasʼín ngantsjai, je Samuel toxá kisʼinni, tonga chʼaoni kisʼe kon nga kʼoakisʼin. Kʼoa itso ndʼaibi: “Nga ʼya xi si nikoaa ninga tsínni mandosinná nʼio síkiʼaonná, nga̱ to yaoná mangínñá”.

Je Samuel jngo artículo xi tʼatsʼe xti nchja̱ni tsakʼéxkia ya jw.org. Kʼoati kisikjaʼaitsjenjin jmeni xi tso Proverbios 20:11, jñani tso: “Josʼín je ti kui bakóni tsa tsje kʼoa tsa kixi tífikao yaole”. Jósʼin tsakasenkao je kjoafaʼaitsjen jebi. Je Samuel koanjinle nga tsín kixi kʼoa tsín tsje tíjna nga ʼya xi si nikoaa. Itsosa: “Koanjinna nga ʼyani xi kʼoasʼín alikuijin ndasʼin kʼoéjnakao je chjoónle nga jekuixan. Kui kisikjaʼaitsjen jósʼe kon je xi chjoónna koa̱nni kʼiatsa skoe̱na nga kjaʼaí xi si tisikoa. Kui xi tsakasenkaona nga koanjinna nga tsín ndatjín nga kʼoanʼia. Nga choa ñʼai maná nga ʼya xi si nikoaa alikui kui xi tsonile nga ndatjín nga kʼoasʼiaan”. Je Samuel kisikʼantjaiya yaole kʼoa kui xi tsakasenkao nga tsín kjoachajngi kiskajin.

Je kjoa xi jaʼatojin je Antonio ngisaa tiñʼai tjínngáni: Kui nʼio kitsjentʼale je pornografía. Ningalani nʼio tsjoake je chjoónle, ngotjo ngosá pornografía kiskotsenle. Kʼoatso nga kui je kjoafaʼaitsjen xi tsjoá 1 Pedro 5:8 tsakasenkao, jñani tso: “Tojbi toʼinda tiyo, tiyochonʼndao, nga̱ je kontrano, je na̱i, joni tsa xa xi tíbaté, tísíkʼótjindaino, tíbásjai ʼya xi ski̱ne”. Je Antonio itsosa: “Ñaki tokui ʼyaa je sén xi kjoachajngi tjenkao, xi ñʼai maná nga chjaʼaxiaan ya jinkjoafaʼaitsjenná. Je bersíkulo jebi, kui xi tsakasenkaona nga kisikjaʼaitsjen jña faʼaini nga tjín xi sʼejnabasenná. Nga kui ʼbe je sén xi kjoajndí tjenkao kui kisikjaʼaitsjen ʼyá tʼatsʼe nroani. Kʼoa ndʼaibi, ʼbeña nga toje Jeobá xi koasenkaona nga chjine koa̱n kʼoa nga sikuinda je kjoafaʼaitsjenna, ni̱ma̱na kʼoa kao kjoabixanna”. Je Antonio kisokole je nganʼio xi machjénle kʼoa likui tikui pornografía kiskotsennile. Kui xi tsakasenkao nga tsín nʼio tse kjoa kiskajin.

Tojosʼin jekaʼyaa, je Biblia tsjoáná kjoafaʼaitsjen xi koa̱nle koasenkaoná nga tsínkui kjoa xi ñʼai tjín jtsaojiaan. Tonga jósʼiaan tsa sa tse sa tse kjoa sʼe̱ná. Kataʼyala jósʼin koasenkaoná je Énle Niná.