CHA̱NIYALAI JKUI kʼiatsa ya kabichui jña tíjna jngo museo xi nʼio nkjín xo̱njchá nya. Me ngayeje xo̱n xi ya nya nga tixʼa̱kjá kjoan, nga kixijnda kʼoa nga jetíbitson kʼoa tjínkʼa xi je to chxʼoátʼasa kjoan. Tonga tíkijna jngo xo̱n xi tsín jme xi kjimale. Nʼio ndasʼin matsen josʼin nga kisʼenda. Tonga ji chjonangilai je xi títsoyali tʼatsʼe je museo: “A ngisaa chjotse xo̱n jebi tikʼoajinni xi ngikʼa”. Kʼoa je itsoli: “Mai, kui xi ngisasa jekjoatse tíkijna kʼoa tsín tíbʼantjaiya”. Kʼoa ji i ʼmilai: “A toyaa tíkijnantsjai”. Kʼoa je itsoli: “Mai, xo̱n jebi nʼio tse kjoa tífaʼatojin kʼoa tjín chjota xi mele sikitsónjin”. Kʼoa tsakui nichxin i̱sí: “Tonga jmé xi koanndani xo̱n jebi”.

Xo̱n jebi mangósonní kao je Biblia. Nga̱ jenʼio kjoatse tíkijna tikʼoajinni xi kjaʼaí libro. Ninga tjínlani libro xi jekjoatse kjio, tonga yaa mangóson je libro xi jetíbitson xi kjio ya museo. Kʼiatsa kuila nchja̱ni xi tʼatsʼe ciencia jetsín timachjénni nga̱ tíbʼantjaiyaa jmeni xi tso je chjota científico. Kʼoa tsakuila nchja̱ni tʼatsʼe xki, tongisaa síkiʼaon chjota jmeni xi tso tikʼoajinni nga koasenkao. Kʼoa nʼio nkjín xo̱n jebi xi to chxʼoálesa tjío kʼoa xi jetsín tindakjoanni.

Tonga je Biblia alikui kʼoakjima. Jetsʼato 3,500 nó tjínle nga kichji kʼoa tsín jme xi kjimale. Je Biblia nʼio tse kjoa tífaʼatojin jokji siento nó tífaʼa, tísaká, likui títjoʼnde nga kjimachjén kʼoa tíchʼasjengi, tonga jmeni xi tso alikui tíbʼantjaiya. Jmeni xi sʼa tjíobe ndʼaibi je chjota, je Biblia nʼio tongini kʼoakitso kʼoa kui nga tsín tíchangini (chótsenlai je rekuadro “A tsín timachjénni axo nʼio tjentítjon jmeni xi tso”).

Tsakui nichxin tojo itso xi chjonangilai yaoli: “A tojo basenkaoná jmeni xi tso je Biblia”. Kʼianga koa̱njinná tʼatsʼe jebi, si̱kjaʼaitsjenjinla je kjoa xi tjínle je chjota. Tobʼelañá, je kjoajchán, nga tíbitson sonʼnde, kjoatsʼen kʼoa kao kjoaché. Ndʼaibi, kuila kataʼyaa jmeni xi tso je Biblia kʼoa chjónangilai yaoli jebi: “A ngisaa nda kuiyoaa tsa kʼoasʼiaan jotso je Biblia”.

KJOANYʼÁN

“Jó tondale je xi síkinjenyʼán, nga̱ je xi ʼndíle Niná kʼuínle” (Mateo 5:9). “Tojo kji ngayije xi koa̱nno, kʼoatʼiaon jméni nga nyʼán kuiyosínio kao ngatsʼi chjota” (Romanos 12:18).

KJOAMATOKON KAO KJOANICHATʼA

“Jó tondale je xi mamakon, nga̱ je xi sʼe̱le kjoamatakon” (Mateo 5:7). “Tosi tonda katakano xíngio kʼoa kao kjoatsjoa tichatʼalao xíngio kʼiatsa ʼya xi fajétʼale xínkjín. Jokisʼin Jeobá * nga kao kjoatsjoa kisichatʼano, kʼoati tʼiaon tsanda jon” (Colosenses 3:13, TNM).

NGA TSÍN CHʼASJENGIAA XÍNGIAA

Je Niná “tojngo njín kisindani ngatsʼi jko̱ya chjota nga koatio ngakijnda sonʼnde” (Hechos 17:26). “Niná tongóson fikao ngatsʼi. Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (Hechos 10:34, 35).

NGA NIKUINDAA JE SONʼNDE

“Je Jeobá Niná kiskoé je chjota kʼoa yaa kisikʼéjna ya ʼndenaxóle Edén kʼianga kʼoentje kʼoa sikuinda” (Génesis 2:15). Je Niná tsjoále kjoañʼai “je xi sikitsón sonʼnde” (Revelación [Apocalipsis] 11:18).

NGA JTICHA MAA JE KJOAXKAIʼA KAO KJOACHAJNGI

“Tikuindao yaono jatʼatsʼe ngayije kjoachi̱nga̱ [kjoaxkaiʼa], nga̱ je kjoabijnachonlebi chjota, alikuijin xi tsonile nga nkjín tsojmi xi tjínle” (Lucas 12:15). “Ali nikʼaxki̱jinjion xíngio niʼi̱tséjin kjoachajngi, ni ngayije xi nʼio chʼao tjín, ni kjoaxintakonjin. Je kjoabi likui ndiaa skénle chjotale Cristo” (Efesios 5:3).

NGA KIXI MAA KʼOA NGA NʼIO NIXÁ

“Nga̱ menajin nga nda koangínkoaijin yaonajin ngayije kjoa” (Hebreos 13:18). “Je xi kisiché, ali tisíchéjinni. Tosa katasíxá” (Efesios 4:28).

KUISENKOAA JE XI NGANʼIO MACHJÉNLE

“Tinʼiokon xi choa tjíokon, tinyakao xi tsínle nganʼiojin, tikjaínlao ngatsʼi” (1 Tesalonicenses 5:14). Tjínnele si̱kuindaa “xi jchʼa̱n xi kʼen xʼinle, nga kjoañʼai tjíofaʼa” (Santiago 1:27).

Je Biblia ali tsa to síkʼaxki̱jin jebi, kui bakóyaná nga chjí jchaa kʼoa nga koanngíntjenngiaa jmeni xi tso. Tsakuilani koaitjenngi jebi je chjota. A tsí ngisa choa kjoa sʼe̱ná. Jmeni xi tso je Biblia nʼio machjénná nichxin xi tiyoaa ndʼaibi. Tonga jósʼin koa̱n si̱chjén je Biblia.

Jngo chjota xi nʼio chjine i kitso: “Je kjoachjine kao xále ʼyanile nga ñaki kʼoatjín” (Mateo 11:19, TNM). A tsí kʼoatjín jebi. Kʼianga jchaa tsa kʼoatjín je kjoafaʼaitsjen xi kʼoainá, tjínnele si̱tjosoán kʼoa kʼoasʼin jchañá tsa ñaki kʼoatjín. Tsakui nichxin itso xi chjonangi: “Tsa ñaki kʼoatjín jmeni xi tso je Biblia, a tsí koasenkaona nga ndasʼin koatejna. A tsí koasenkaona nga kʼoendajian je kjoa xi tjínna”. Jngola choa̱ kataʼyaa.

Je Diana * nʼio síxá, tsjoa tjín kon kʼoa ndasʼin tíjna, tonga toʼi koan kisicha ngayeje xi tjínle. Kʼieen je tsotile, kitsjion xínkjín kʼoa nʼio ñʼai koanle tao̱n. Itso: “Alikui titsaʼbeña jmeni xi kisʼian, nga kisicha je ʼndítsotina, xʼinna kʼoa jmeni xi tjínna”.

Je Diana koanjinle nga ñaki kʼoatjín je én jebi: “Jotjín nó biyoaa, to 70 kʼoa tsa tjínná nganʼio 80 nó biyoaa. Tonga tsee kjoañʼai chjaʼá kʼoa tosasa faʼani nó xotjín” (Salmo 90:10).

Kʼianga koan jaʼatojin Diana je kjoa xi kisʼele, kui kitjenngi jmeni xi tso je Biblia kʼoa nʼio nda tsakasenkao. Tojosʼin jchaa nga jan kjoaʼmiya xi  fisani, nʼio nkjín chjota xi kjimale tjíobʼéndajin je kjoa xi tjínle kʼianga kui tjíofitjenngi jmeni xi tso je Biblia. Tjíobee nga mangóson je Biblia kao je xo̱n xi kanikʼaxki̱ná nga fitsʼiani i̱ kjoaʼmiya jebi. Je Biblia alikui mangóson je libro xi tofaʼato nga machjén. Ánni nga tsín mangósonni kao xi kjaʼaí libro. A kuinga tʼatsʼe Niná jaʼaini je Biblia (1 Tesalonicenses 2:13).

Tsakui nichxin kʼoatisʼin nikjaʼaitsjain nga tochoatse biyoaa kʼoa nga nʼio tse kjoa bitjatojiaan. ʼYáni xi tsjoáná je kjoanʼiotokon xi machjénná, xi koasenkaoná kʼoa xi tsjoáná kjoafaʼaitsjen josʼin kʼoéndajiaan je kjoa xi tjínná.

Janla koya kataʼyaa jósʼin basenkaoná je Biblia:

1. Nga tsín kjoa tsaojiaan.

2. Nga bʼendajiaan je kjoa xi sʼená.

3. Nga kaná je kjoa xi sʼená.

Nga jan kjoaʼmiya xi fisani kui koakoyaná tʼatsʼe jebi.