TIKJAʼAITSJENLAI tsa yalani tjenyai jngo ndiaa nga toje koannjio, tosʼaa ngotjo nga kakantjai je tsʼuí kʼoa lijme xi tinikjáojin nga̱ kichʼa jngui lámpara xi nʼio nda síʼisen. Kʼianga bakajinʼndai nda síʼisenli kʼoa ʼyaní jmeni xi tjío, kʼoa kʼianga bakatítjonlai yaoli ñaki tsee síʼisen je ndiaa.

Kʼoatisʼinni je Biblia, yaa mangóson lámpara jebi. Tojosʼin saje tsaʼyaa ya kjoaʼmiya xi jejaʼato, je Énle Niná basenkaoná nga ʼyaa jonʼia nga kjoa bitjatojiaan: jolani je kjoa xi nyaon nyaon bitjatojiaan ngatsʼiaa. Tonga tsesa josʼin basenkaoná. Kʼoati basenkaoná nga ʼyaa josʼin kuiyoaa nichxin xi nroaján, nga̱ ʼyañá nga koa̱n tsjoa sa̱tío tokoán ngantsjai nichxin, kʼoa basenkaoná nga koa̱n tjoéná kjoanda jebi (Salmo 119:105). Ánni kʼoabixónñá.

Jaola koya kataʼyaa josʼin basenkaoná je Biblia nga nda kuiyoaa nichxin xi nroaján: 1 Nga ʼyaa jmé xá tiyoñá kʼoa 2 tsoyaná josʼin nga miyoná koa̱nni je Niná tokʼia saʼndani.

Je Biblia tsjoáná kjoafaʼaitsjen josʼin kuitjátojiaan je kjoa xi sʼe, tonga ali tsa tojngojin libro xi basenkaoná. Bakóyaná nga tsín toñá kuenta sʼiaan yaoná, nga kʼoati kuenta sʼiaan xi ngikʼa, tsa kʼoasʼiaan jchañá jmé xá tiyoñá.

Tikjaʼaitsjenlai jotso testo jebi: “Tongisa ndaní nga kʼoee kaoni tsa nga chjoé” (Hechos 20:35). A tsakisenkao ñandiai jngo chjota xi ñʼai koanle tʼatsʼe tao̱n. Axo saje kinoʼyalai jngo miyoli xi tsakʼéyanajmíli jotjín kon. A tsí tsjoa kisʼe tokuin nga koan tsakisenkao jngui chjota.

Kʼianga tsín jme xi choyangajaonilee nga tjín xi bʼe, ngisaa tsjoa sʼe tokoán. Jngo chjotachjine xi i̱ kitso: “Nʼio ñʼai tjín sakʼoa kʼianga tjín xi bʼailee xi ngikʼa kʼoa nga tsín kui choyalee nga ngisa tse kʼoaingajaoniná, tonga chʼa̱sjee nganʼio nga tsín jme xi chóyangajaonilee”. Tonga bʼaingajaoniná kʼianga  je binyakoaa chjota xi tsín koa̱nle josʼin sijndaniná. Tjínná je kjoanda nga ma bisenkoaa je Niná, joxi tjín xi kitjenle tʼatsaan male nga bakolee kjoanda je xíngiaa (Proverbios 19:17). Je Niná nʼio bechjí jmeni xi nʼia tʼatsʼe xi ngikʼa kʼoa kʼoatso nga kao kui kjoabijnachon xi tsínkʼia fetʼa tsjoángajaoniná kʼianga ʼndenaxó koa̱n i̱ Sonʼnde. Nʼio naskánatjín kjoachoya jebi (Salmo 37:29; Lucas 14:12-14). *

Tonga je Biblia kʼoatso nga machjén nga jchaxkoán je Jeobá tsa mená nga jchaa jme xá tiyoñá. Je Énle kʼoatsoná nga chʼa̱sjengʼaa, jchaxkoán kʼoa nga chʼa̱ʼénlee (Eclesiastés 12:13; Apocalipsis 4:11). Kʼianga kʼoanʼia jebi tsjoa sʼe kon je Niná. Saʼnda itsoná: “Chjine katamai, ’ndí xi tsʼan, kʼoa tjayatsjoai ni̱ma̱na” (Proverbios 27:11). A saje kinikjaʼaitsjain xi tʼatsʼe jebi. Kʼianga nda chjoéjiaan jmeni xi nʼia kʼoa nga kui kjoafaʼaitsjen xi tsjoá Biblia mangíntjenngiaa tsjoa sʼe kon je Nʼainá xi tíjna ngʼajmi xi tsjoakená. Ánni. Kuinga makjáojinle xi tʼatsaan kʼoa kui xi mele nga ndasʼin kuiyoaa, kuinga tsjoániná kjoafaʼaitsjen (Isaías 48:17, 18). A tjínsa jmeni xi ngisa tsjoa kʼoe je tokoán nga tiyochoán tikʼoajinni nga jchaxkoán je Niná xi batéxomale ngayeje kʼoa nga kjoáyatsjoaa je ni̱ma̱le.

Je Biblia kʼoati bakóyaná jmeni xi sʼiaan nga miyole Niná koaan. Tobʼelañá, itso: “Tichriantʼalao Niná, kʼia kʼoati je sichriantʼano nga jon” (Santiago 4:8). Tsakui nichxin ñʼai maná nga makjainná nga koa̱n miyole koaan je Niná xi kisinda ngayeje tsojmi xi tjín. Tonga je Biblia kʼoatsoná tsa ñá xi kuijnyísjee je Niná koa̱nsjainá, nga̱ “tsín tsa kjin tíjnaná nga jngójngoá” (Hechos 17:27). Nga mangíntjenngiaa je kjoafaʼaitsjen xi tsjoá je Biblia nga koa̱n miyole Niná koaan joxi tongini tibiyondalee nichxin xi nroaján. Ánni nga kʼoabixónñá.

Tikjaʼaitsjenlai jebi: Ningalani mená nga kuiyochonsaa, alikui koa̱n nga ndái kuiyolee je kjoabiya, xi kontraná mani (1 Corintios 15:26). Tonga je Niná tíjna ngantsjai nichxin. Je alikuikʼia kuiyá kʼoa kui xi mele nga je miyole kʼoati katabatio ngantsjai nichxin. Je Jeobá bakó jotjín kon kao je én jebi: “Tsjoa katasʼe tokon ngantsjai nga kuiyochon” (Salmo 22:26).

Jmé xi machjén nga sʼiain nga miyole Niná koai̱n tokʼia saʼndani. Chótʼayai je Biblia, kʼoa tosi tonda kataʼyasai xi tʼatsʼe Niná (Juan 17:3; 2 Timoteo 3:16). Tijélai nganʼio nga katamajinli jmeni xi tso. Je Biblia kʼoatsoná kʼiatsa ñá xi ñaki kʼoatjín tokoán nga si̱jélee kjoachjine, je Niná tsjoáná * (Santiago 1:5). Tosi tonda chʼasjai nganʼio nga titjosuin jmeni xi koa̱njinli, tsa kʼoasʼiain je Énle Niná jngoo “lámpara” xi siʼisenle ndso̱kui ndʼaibi kʼoa jngoo lʼí xi siʼisenli je ndiaali ngantsjai nichxin.