Tojo kitso Jesús, je énnda chjotse xi tʼatsʼe Chjotaxále Niná tíʼmiyason jngo tjíjtsa Sonʼnde (Mateo 24:14). Je librole Daniel kʼoatso nga je chjotaxá jebi tʼatsʼe Niná tínroani. Ya kapítulo 2 xi tsʼe Daniel kui tsoya tʼatsʼe chjotaxá xi tjíobatio, fitsʼiakjoanni Babilonia saʼnda chjotaxá xi tjío ndʼaibi, kʼoa ya bersíkulo 44 kui tsoya jmeni xi sʼa̱ koa̱n:

“Je Niná xi tíjna ngʼajmi jngo chjotaxá koasennda xi nikʼiajin tjóxin. Chjotaxá jebi ali tsa tikjaʼaíjin naxinandá koa̱nntsjani. Ñaki sichaoní kʼoa kjoaʼaxinní ngatsʼi chjotaxá xokjoan, kʼoa jé kʼoéjna ngantsjai nichxin”.

Je én jebi xi tongini kinokjoa kʼoatso nga je Chjotaxále Niná jé kʼoéjnayangajaonile je chjotaxá sonʼnde, kʼoa jé xosʼin nga nda sʼin kuiyoaa. Jmé kjoanichikontʼain xi sʼe̱ná nga koatexoma. Kataʼyala kʼaa je én xi tongini kinokjoa xi jeme kuitjoson.

• ALIKUI TISʼE̱NI KJOAJCHÁN

  Salmo 46:9: “[Niná] kjoaʼaxin kjoajchán ngakjijnda sonʼnde. Sixkoaa je arco kʼoa ñaki nkjínya sʼin je lanza; kʼoa jinlʼí koakajin je karretale chjotakjoajchán”.

  Cha̱niyalai jkui, jókoa̱nchon je Sonʼnde tsa jelani chjota kʼoasʼin sichjén je tao̱nle kao kjoachjinele nga chjota kuinyakao ʼndele nga ki̱cha̱ kjoajchán sinda. Kʼianga jekoatexoma je Chjotaxále Niná kjoaʼaxin je kjoajchán.

• ALIKUI TISʼE̱NI CHʼIN

  Isaías 33:24: “Nijngojin xi ya kʼoéjna kʼoakuitso: Timʼeña”.

  Cha̱niyalai jkui, jósʼin kuiyoaa tsa tsín tisʼe̱ni chʼin xi tsoale ni̱ma̱ná, cáncer, chʼinxi kʼoa xi kjaʼaísanile. Kʼianga tsín tisʼe̱ni chʼin alikui tisʼe̱ni hospital kao xki. Kuichoka nichxin nga kʼoakoa̱n.

• ALIKUI TISʼE̱NI KJINRÁ

  Salmo 72:16: “Nʼio sʼe̱ tsojmintje i̱ sonʼnde; toxkia sʼee ya jko̱nindo”.

  Toxkia sʼee je tsojmintje i̱ Sonʼnde. Alikui tiʼya xi kjinrá kjoaʼani.

• ALIKUI TISʼE̱NI KJOAʼAON KAO KJOABIYA

  Revelación (Apocalipsis) 21:4: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato”.

   Alikui tijée sʼe̱nile je chjota kʼianga ʼndenaxó koa̱n je Sonʼnde kʼoa koaan koatio ngantsjai nichxin. Kui jebi kjoachoya xi tsjoáná je Jeobá nga̱ nʼio tsjoakená.

Jósʼin nikjaʼaitsjain ji, a kuitjosonní ngayeje jmeni xi jekanikʼaxkiaa. Ninga nkjín chjota xi sasénle jmeni xi tso je Biblia, tonga likui makjainle tsa koa̱n koatio ngantsjai nichxin nga̱ kjesa ʼyajin xi kui kjoabijnachon sʼele.

Jenʼio nkjín nó nga choʼndale jée kao kjoabiya ma je chjota, saʼnda tjínkʼa xi kʼoasʼin síkjaʼaitsjen nga toxá kʼoasʼin koanndañá nga kjoañʼai chjaʼá. Tonga ali tsakuijin xi tsakʼéndajin Niná xi kao je chjotasonʼnde.

Je Niná kui xi mele nga ñaki kʼoakʼoé tokoán nga kuitjoson je én xi tongini kinchja̱, kuinga i̱ tsoniná: “Alikui tokjitia nga kjoaʼaínrʼoenina, ñaki kʼoakoa̱n jmeni xi mena, kʼoa ñaki kʼoasʼin kuichotsjoá jme xá tisikasénña” (Isaías 55:11).

Je Biblia kʼoatso nga Niná “likui bʼanacha” (Tito 1:2). Makjoanni nga je Niná xi títsjoáná kjoachoya jebi, ndatjín nga si̱kjaʼaitsjenjiaan kjoachjonangi jebi: A kjoaixi nga koa̱n kuiyoaa ngantsjai nichxin i̱ Sonʼnde. Jméni xi tjínnená sʼiaan nga sʼe̱ná kjoanichikontʼain jebi. Je kjoachjonangi jebi yaa chótʼayá ya kjoaʼmiya xi fisani.