Je kjoaʼmiya xi jaʼato kui tsaʼyaa nga je Creso tokichʼanachale jmeni xi tsakʼinle ya ʼnde xi Delfos tsakʼin, nga koankjainle jme xi tsakʼinle kiskaan kao je rey xi tsʼe Persia kʼoa kisichaa. Tonga ya Biblia tongini kʼoakitso jmeni sʼin je rey xi tsʼe Persia kʼoa kitjoson chʼin chʼin je én xi tongini kinokjoa.

Je Isaías, 200 nó tongini kʼoakitso nga Ciro kʼuín je xi rey koa̱n, kʼoa kʼoati kitso josʼin tjoéle je naxinandá Babilonia.

Isaías 44:24, 27, 28: “Kui jebi xi títso je Jeobá, [...]. Je xi i̱ tsole jñani nʼio nya nandá: Katafaʼajen kʼoa kataxíya ngayeje xo̱ngáli. Je xi i̱ tso xi tʼatsʼe Ciro: Jéní choʼndana, kʼoa jé kʼoasʼin ngayeje jmeni xi mena; je xi i̱ tso tʼatsʼe Jerusalén: Sʼe̱ndayani, kʼoa xi tʼatsʼe yo̱ngo̱: Sʼe̱jnani je xjáoja̱ma̱li”.

Tojo kitso jngo chjotachjine xi Heródoto tsakʼin, je chjotakjoajchánle Ciro xin tsakándiaale je xo̱ngá Éufrates xi faʼajin ya Babilonia. Nga kʼoakisʼin, koan jaʼatojinndá je chjotakjoajchánle nga jaʼasʼen ya naxinandá. Nga jekitjoéle naxinandá, je Ciro kisikatíondái je chjota judío xi tjíonʼio ya Babilonia kʼoa kitsjoaʼndele nga ki ngindiani kʼoa nga katabʼéndayani Jerusalén, xi 70 nó jetjínle nga kinikje.

Isaías 45:1: “Kui jebi xi títsole Jeobá je xi kiskoejin, je Ciro, je xi ntsja ngakixi titsoa, nga koanentsja naxinandá, nga kjoaʼaxin nganʼio xi tjínle xi rey tjío, nga skóʼai xo̱ntjoa xi jao xjoa̱ tjínle, ánni nga tokatasʼetixʼasíni je xo̱ntjoa”.

Kʼianga kicho je chjota xi Persia tsʼe, totixʼaa je xo̱ntjoale naxinandá. Kʼiatsa kisʼejinlanile je chjota babilonio jmeni xi tíbʼéndajin Ciro, tsakʼéchjoajin je xo̱ntjoa jña faʼa nandá kʼoa tsínjin jme xi koanle.

Nʼio nkjín én xi tongini kinokjoa xi faʼaitʼa Biblia xi tíbitjoson. a Jebi alikui mangóson jmeni xi tongini tso je chjota, nga̱ tojé niná ndisole bitjongʼa jme xi tso. Tonga je én xi tongini kinokjoa xi faʼaitʼa Biblia yaa nroani tʼatsʼe Niná xi kixi, itso: “Anña xi kʼoaxian saʼnda nga fitsʼiani josʼin kuichotsjoá jmeni xi koa̱n, anña xi nʼio tongini kʼoakixian jmeni xi kjesa kʼoamajin” (Isaías 46:10).

Tojé Jeobá xi koa̱nle kʼoasʼin jebi. Nga̱ je jaʼaínle isʼin tsoyanile “An koa̱n jmeni xi mena koa̱n”. Jebi kui bakóná nga be jmeni xi koa̱n nichxin xi nroaján  kʼoa nga sitjoson josʼin mele. Jebi bʼéjngoo tokoán nga sitjoson Niná jmeni xi tso.

A meli jchai jotso je Biblia tʼatsʼe nichxin xi tiyoaa ndʼaibi. Jela 2,000 nó tjínle nga kʼoakitso Biblia nga “je nichxin xi kjoetʼa” nʼio ñʼai koa̱nchon. Jméni xi nichxin fetʼa tsole Biblia. Kʼianga kʼoatso je Biblia ali tsakuijin nga je Sonʼnde kjoe kʼoa nijejinla chjota xi kjoeson. Kuiní je kjoabixkan xi tjín, nga totaon be xínkjín chjota kʼoa kao kjoachjaʼatokon xi tjín jokji jmi nó tífaʼato. Kuila kataʼyaa jmeni xi chon nga nichxin fetʼa tiyoaa ndʼaibi.

2 Timoteo 3:1-5: “Je nichxin xi kjoetʼa [...]. Sʼee chjota xi toyaole tsjoake koa̱n, xi chʼaondai, xi nchja̱tʼa yaole, xi ngʼakon, xi chʼao tsole xínkjín, xi tsʼantjaikjoake xijchále, xi niʼi̱tséjin tsjoá kjoanda, xi tsín tsje tjín, xi tsínle kjoatjaochajin, xi síkitsón énle, xi bángi kao kjoandiso, xi tokjaʼaíngá sʼín, xi toán, xi taon be xi nda, xi jao nkjaín, xi toxkia sʼín, xi tosíxkón male, xi ngisa matsjoake kjoaská kaoni tsa Niná, xi matsen joxi bexkón Niná, tonga tjíotʼaxinle nganʼiole Niná”.

A tsí kʼoakjoan chjota nichxin xi tiyoaa ndʼaibi. Je chjota to yaole tsjoake, chʼaondai, ngʼakon, to yaole fini, tsín kuenta sʼín xi ngikʼa, je xti tsʼantjaikjoake xijchále kʼoa je chjota tongisaa tsjoake kjoaská tikʼoajinni Niná. Kʼoa sa kjaʼaí sa kjaʼaí kjimachon ndʼaibi.

Mateo 24:6, 7: “Kuinóʼyalao tʼatsʼe kjoajchán, kʼoa én xi kʼoámje tʼatsʼe kjoajchán [...]. Kuisótje̱nne naxinandá kontrale xi kjaʼaí naxinandá, kʼoa kjoatéxoma kuisótje̱nne xi kjaʼaí kjoatéxoma”.

Saʼnda tjen nó 1914, jetsʼato 100 miyón chjota tjíomʼe xi totʼatsʼe kjoajchán xi tísʼe kao tʼatsʼe kjoabixkan xi tjín jngo tjíjtsa Sonʼnde, tjínkʼa naxinandáyʼai xi saʼnda tsín kʼoatjín mani je chjotale. Tikjaʼaitsjenlai jokji kjoañʼai kao kjoachjaʼatokon tjíofaʼá je chjota xi totʼatsʼe jebi. Nga kʼoakjima, a tjíobinyakao je naxinandáyʼai nga tsín tikjoajchán katasʼeni.

Mateo 24:7: “Sʼe̱ kjinrá”.

Je Programa Mundial de Alimento, i kitso: “I̱ Sonʼnde nʼio tse tsojmi xi ma chine tjín tonga 815 miyón mani chjota xi fayonchjan. Xi ijngosani, kʼianga jan xti, jngo xi tsín nda sokóʼa”. Nga xki̱ nó, tsʼato jan miyón xti mʼe xi totʼatsʼe kjinrá.

Lucas 21:11: “Kjoaʼa cháonxkón”.

Nga xki̱ nó, 50,000 cháon faʼa. Kʼoa 100 cháonnʼio faʼa xi niʼya síkixojen kʼoa nga jngo nó jngo cháon xi nʼio faʼa. Je chjota xi kotʼayason kʼoatso kʼianga tjen nó 1975 saʼnda nó 2000, nga 471,000 chjota xi cháon kʼienjin.

Mateo 24:14: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa”.

Je testigole Jeobá tsʼato jin miyón mani xi tjíotsoyason je énnda chjotse xi tʼatsʼe Chjotaxále Niná xi 240 naxinandáyʼai. Tísakóyason ngakjijnda naxinandáyʼai, naxinandáʼndí, jña tjín jñájchá kʼoa ya jña nindo tjín. Je én xi tongini kinokjoa kʼoati tso jokji tjen sa̱kóyason kʼoa nga “kʼia kjoaʼaí xi kjoetʼa”. Kui xi tsonile nga tjóxin je chjotaxá sonʼnde kʼoa nga je Chjotaxále Niná koatexoma. Jméni xi sʼin je Chjotaxále Niná. Kataʼyalasaa.