A KOAAN JI KʼOASÍ JOSʼIN KUIJNAI NICHXIN XI NROAJÁN. Tjínkʼa chjota xi kʼoasʼin makjainle nga to jetjínndajin jmeni xi koa̱nle kʼoa tjíokʼa xi kʼoasʼin síkjaʼaitsjen nga je Niná xi kʼoatso josʼin kʼoéjna. Kʼoa kʼianga tsín kʼoasʼin bichótsjoá jmeni xi bʼéndajin, itso: “To jetjítʼaxo̱n nga kʼoakoa̱n”.

Kʼoa tjínkʼa xi síkʼajenle kon kʼianga tsín kixi jmeni xi ma kʼoa nga totaon be xínkjín je chjota. Tsakui nichxin bʼénele yaole nga nda koatio, tonga alikuikʼia nda batio xi totʼatsʼe kjoajchán, nga tsín kixi jmeni xi sʼín je chjota, chʼin kʼoa tsakuije̱ nga kjoaxkón sʼe. Chaan kʼoasʼin síkjaʼaitsjen nga tsínni jme chjíle ninga bʼenelee yaoná nga ndasʼin kuiyoaa.

Kjoaixi nga sakʼoa bʼetʼaná je kjoa xi sʼe (Eclesiastés 9:11). Tonga koaan ñá chjoéjiaan jmeni xi sʼiaan. Je Biblia kʼoatso nga ñá xi kuixónñá josʼin kuiyoaa nichxin xi nroaján. Kataʼyala jmeni xi tso.

Kʼianga jeme kjoaʼasʼen ya ʼNde jña tsakʼinle nga kʼoaile je naxinandá Israel, je Niná kʼoakitsole je Moisés nga i̱ katatsole je naxinandá: “Tisikatíobasenno kjoabijnachon kao kjoabiya, kjoanichikontʼain kao kjoañʼai; kʼoa tjínneno kui chjoéjion je kjoabijnachon ánni nga kuiyochonsíño, jon kʼoa kao ntje̱no, nga tsjoacha koa̱on je Jeobá Nináno, nga kuinóʼyao énle kʼoa nga ñaki je koanngíntʼalao” (Deuteronomio 30:15, 19, 20).

“Tisikatíobasenno kjoabijnachon kao kjoabiya, kjoanichikontʼain kao kjoañʼai; kʼoa tjínneno kui chjoéjion je kjoabijnachon” (Deuteronomio 30:19).

Je Niná kisikatíondái je chjota israelita nga ya Egipto tjíonʼio. Kʼoa kui xi koanmele Niná nga ndái sʼin koatio kʼoa nga tsjoa sa̱tío kon nga jeya tjío ʼNde jña tsakʼinle nga kʼoaile. Tonga tjínnele kui “kjoabijnachon” skoéjin nga koa̱n sʼe̱le kjoanichikontʼain jebi. Kʼoa tjínnele nga tsjoake koa̱n je Niná, nga kjuinrʼoéle kʼoa nga ñaki je koaitʼale.

Nichxin xi tiyoaa ndʼaibi kʼoati machjén nga chjoéjiaan jmeni xi mená sʼiaan, nga̱ kui xi kuitsoni josʼin kuiyoaa nichxin xi nroaján. Tsakui chjoéjin nga tsjoacha koai̱n je Niná, nga kuinóʼyalai kʼoa nga ñaki je kʼuíntʼalai, tsoyanile nga kjoabijnachon tichjoejin, jngo kjoabijnachon xi tsínkʼia fetʼa i̱ Sonʼnde. Tonga jmé xi tsoyanile jebi.

Je pastro Juan i kitso: “Jé Niná xi kjoatjaocha”. Kui je kjoatsjoacha xi ngisa bakó je Niná (1 Juan 4:8). Je Jesús be nga kʼoatjín jebi, kuinga i̱ kitsoni kʼianga kichjonangile jñánile je kjoatéxoma xi ngisa títjon tíjna: “Katamatsjoachai Naili Nináli. Katamatsjoachani ngayije ni̱ma̱li, kao ngayije kjoatsjoali, kʼoa kao ngayije kjoafaʼaitsjenli” (Mateo 22:37). Kʼianga miyoná mani je Niná yaa nroani nga tsjoachaa, ali tsakuijin nga nokjonlee kʼoa tsa tokui nga tjínnele si̱tjosonlee. Tonga ánni nga tjínnenile nga tsjoacha koaan je Niná.

Je kjoatsjoacha xi bakóná je Niná yaa mangóson josʼin tsjoake ma je ʼndíle jngo nʼai. Ningalani chjotajée ma, je xi xijchá ma bʼénele yaole nga tsoyale, nga sínʼiojin, nga binyakao kʼoa nga batekjáyale je ʼndíxtile, nga̱ kui xi mele nga tsjoa katasatío kon kʼoa nga nda sʼin koatio. Kʼoa jméni xi koyale je xi xijchá ma nga sʼin je xtile. Kui koyale nga tsjoake katama, nga sitjosonle kʼoa nga katamajinle nga kjoanda tsʼeni jmeni xi tsole. A tsí kʼoati bakinle je  Nʼainá xi tíjna ngʼajmi nga tsjoacha koaan kʼoa nga kʼoailee kjoanda nga̱ nʼio tse jmeni xi tsjoáná.

Kʼianga kui én machjén ya Biblia je xi kuinóʼya tso sakʼoaa kui tsoyanile nga “nitjosoán”. Kʼoa nga “tinóʼyanái” tsole je tile jngo nʼai, a tsíkui xi tsonile nga sitjosonle. Kʼianga noʼyalee je Niná, kui xi tsonile nga ʼyaa jmeni xi síjéná kʼoa kʼoanʼia. Nichxin xi tiyoaa ndʼaibi alikui ñaki fákaoná je Niná. Kʼiatsa mená kuinóʼyalee jmeni xi tso, machjén nga kʼoéxkiaa je Biblia kʼoa kʼoasʼiaan jmeni xi tso (1 Juan 5:3).

Je Jesús kʼoakitso nga nʼio chjíle nga kuinóʼyalee Niná kʼianga i̱ kitso: “Ali tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná” (Mateo 4:4). Nʼio chjíle kʼianga kuichaa, tonga kʼianga kui kʼoéyaa je kjoafaʼaitsjenná xi tʼatsʼe Niná ngisaa tichjíngánile. Ánni. Je rey Salomón i kitso: “Nga̱ je kjoachjine basenkaoná joni tsa je tao̱n nga basenkaoná, tonga je kjoanda xi tjenkao je kjoankjíntokon kui jebi: je kjoachjine koaanle kʼoasjentjai je xi kui tjínle” (Eclesiastés 7:12). Je kjoachjine kao je kjoankjíntokon basenkaoná ndʼaibi, kʼoa kʼoati koasenkaoná nga kui kjuinyaa je ndiaa xi kixi, je xi ya kuichokaoná kjoabijnachon xi tsínkʼia fetʼa.

Je kjoaʼmiya xi jejaʼato, kui tsaʼyaa nga i̱ kitso Jesús: “Nga̱ nrʼoeya je xo̱ntjoa, kʼoa xkóya je ndiaa xi fini kjoabijnachon, kʼoa choa mani xi ya masjaile” (Mateo 7:13, 14). Kʼianga koa̱n kjuinyaa je ndiaa jebi, machjénná nga je koandiaaná xi nʼio nda be ndiaa jebi, xi koasenkaoná nga tjoéna je kjoabijnachon xi tsínkʼia fetʼa. Kuinga machjénsíni nga je Niná kjuintʼalee (Salmo 16:8). Jméni xi tjínnele sʼiaan.

Nga nyaon nyaon nʼio tse jmeni xi nʼia kʼoa saʼnda tsín tsjoáná nichxin nga kʼoanʼia ngayeje jmeni xi mená. Saʼnda tsín maʼaná nga kui nikjaʼaitsjenjiaan jméni xi mele Niná xi tʼatsaan. Kuinga i̱ tsoniná je Biblia: “Chótsaon, tsokʼoa, nga kixi timao, ali joni chjota xi tsínle kjoafaʼaitsjenjin, tonga joni chjota xi tjínle kjoafaʼaitsjen. Ali nichxinjin nichalao yaono, nga̱ je nichxin kjaínga tochʼao chon” (Efesios 5:15, 16). Kʼianga je Niná kjuintʼalee kui xi tsonile nga kui títjon si̱kʼéjnaa je kjoamiyo xi tjínná kao je (Mateo 6:33).

Ningalani tsín koa̱nli si̱kʼantjaiyai jmeni xi kinʼiai nichxin xi jejaʼato, koaan nga nda sʼin kuiyo kao familiali nichxin xi nroaján. Je Biblia kʼoatso nga je Jeobá, je Nʼainá xi tíjna ngʼajmi, nʼio tsjoakená kʼoa kʼoatsoná jmeni xi mele nga sʼiaan. Je profeta Miqueas i kitso:

“Je kʼoatítsoli je xi ndatjín. Kʼoa jméni xi tísíjéli je Jeobá. Tokuiní nga kixi koai̱n, nga jchachjí je kjoakixi kʼoa nga nangitokon koai̱n nga kuitómjekoai je Nináli” (Miqueas 6:8).

Kʼiatsa Niná kuitómjekoai, tsjoáli je kjoanichikontʼain xi tsjoále ngantsjai nichxin je miyole. Ji xi síni jmeni xi chjoéjin.