Je astrología kui tsoya nga je niño, sá kʼoa kao planeta kui kʼoatso jme xi koa̱nle je chjota. Je xi tʼatsʼe astrología kotʼayason kʼoatso nga kui xi tsoni josʼin tjío je niño nichxin nga tsin jngo chjota nga ya bakó jokoa̱nkjoan kʼoa jmeni xi koa̱nle nichxin xi nroaján.

Ningalani ya Babilonia tsʼatsen xi tʼatsʼe astrología, nichxin xi tiyoaa ndʼaibi tojo nʼio ʼyale xi tʼatsʼe jebi. Tonga a koaan koa̱nkjainná. Kataʼyala.

• Je niño kao planeta alikui kui kʼoatso jme xi koa̱nle jngo chjota.

• Je astrología tongóson tsole ngatsʼi je chjota jmeni xi koa̱nle.

• Je astrología tojo yaa bʼangini josʼin koankjainle chjota nichxin kjoatse nga kʼoakitso nga je planeta ya síkʼótjindaile je Sonʼnde, tonga je planeta yaani síkʼótjindaile je Tsʼuí.

• Alikui mangóson jmeni xi tso je chjota astrólogo tʼatsʼe jngo chjota.

• Je astrología kʼoatso nga 12 signo del Zodiaco tjín, kʼoa kui bʼangini jme nichxinni katsin chjota. Tonga jokji siento nó tífaʼato, je Sonʼnde tíbʼantjaiyaa josʼin tíjna, kʼoa je sá xi bʼakaole nga jngó jngó signo del Zodiaco jelikui tikuini.

Je chjota kʼoasʼin makjainle nga je signo del Zodiaco kui kʼoatso jokjoan jngo chjota. Tonga je chjota xi tikui nichxin tsinni, alikui tongóson sʼín. Je nichxin nga tsin jngo chjota alikui jme xi be jokoa̱nkjoan. ʼNdele nga kui kuenta sʼin jokjoan kʼoa josʼín jngo chjota, je astrología tokui fini jme nichxin kitsin nga kʼoatso jokjoan. Nga kʼoasʼín, chjota bʼasjengi.

Saʼnda nichxin kjoatse je chjota jé kjonangile je xi kotʼason jmeni xi koa̱n. Tjínkʼa chjota xi nʼóyʼele cho̱ kʼoa tsa tsʼe chjota kiskotʼa nga “kʼoakitso” jmeni xi koa̱n nichxin xi nroaján kʼoa tsakuije̱ josʼín nga kjen je cháxichá. Kʼoa tjínkʼa xi kui kiskotʼa jomakjoan je tasa kʼianga jeʼbiya té kʼoa tsa kafé. Nichxin xi tiyoaa ndʼaibi, je chjota kotʼa xo̱n baraja, xitjo kjine kʼoa finrʼoe chjine nga tsoyale nijñále. A kʼoatjín jotso chjota xi kui xá sʼín. Kataʼyala.

Je chjota xi kotʼason jmeni xi koa̱n alikui mangóson jme xi tso. Ninga mangóson jmeni xi síchjén nga kotʼason kʼoa ninga mai, kjántʼa jmeni xi tso. Tobʼelañá, tsa jngo chjota kui skónangile jósʼin kʼoéjna nichxin xi nroaján jao chjota xi kotʼason kʼoa tsa baraja kʼoexkiale nga jao, tjínnejinle nga ngóson kuitso tsakai tonga alikuini mangóson jmeni xi tso.

Xi síchjén je chjota xi kotʼason tíʼyale nga tsínni kʼoatjín. Tjínkʼa xi kʼoatso nga je chjota xi kotʼason nga tokui kotsenle josʼín je chjota kʼoa nga je baraja kao jmesani xi síchjén nga tsínni jme chjíle. Tobʼelañá, nkjín koya jmeni xi kjonangile je chjota kʼoa kuenta sʼín josʼin nchja̱ kʼoa kʼiaa kʼoatso jmeni xi koa̱nle. Kʼianga makjainle je chjota jmeni xi ʼmile, nʼio tse tao̱n síkinje je xi kotʼason.

Je astrología kao xi kotʼason kʼoatso nga to jeʼyale jmeni xi koa̱nná. A kʼoatjín jebi. Je Biblia kʼoatso nga koa̱n ñá chjoéjiaan jmeni xi koa̱nkjainná kao jme xi sʼiaan kʼoa xi chjoéjiaan kui xi kuitsoni josʼin kuiyoaa nichxin xi nroaján (Josué 24:15).

Je chjota xi mele nda koatio ngixko̱n Niná tjínsa anni nga tsínkui sísinni xi tʼatsʼe astrología kao xi kotʼason. Je Niná alikui sasénle kjoa jebi. Je Biblia itso: “Nijngojinla chjota katabʼejnajinli [...] xi tongini kʼoatso jme xi koa̱n, xi majia sʼín, nijngojinla xi kui básjai josʼin tsoyanile tsa jmeni xi ma, chjinebʼenda, nijngojinla xi síkaotaon xínkjín, nijngojinla xi chjinebʼenda fikonle kʼoa tsa je fikonle xi tongini kʼoatso jmeni xi koa̱n kʼoa tsa je xi kʼien fákao. Nga̱ toʼyani xi kui kʼoasʼín kjoa jebi nʼio chʼao be je Jeobá” a (Deuteronomio 18:10-12).