NʼIO NASKÁNATJÍN KJOACHOYA JEBI. Je Niná xi kisindaná kʼoatso nga koa̱n kuiyoaa ngantsjai nichxin i̱ Sonʼnde. Tonga nʼio nkjín xi tsín makjainle. Je chjota kʼoatso nga kuicho nichxin nga kuiyá ngatsʼiaa kʼoa nga toxá kʼoamañá. Kʼoa tjínkʼa xi kʼoasʼin makjainle nga tokʼia koa̱n kuiyoaa ngantsjai nichxin ya ngʼajmi kʼianga jekuiyá. Jósingái ji.

Kuila títjon kataʼyaa jotso Biblia xi tʼatsʼe jebi. Jókji tse tjínnele kuiyochoaan josʼin nga koanndaa. Jmé xá kisindani Niná je Sonʼnde kʼoa kao chjota. Ánni nga mʼesíñá.

Kʼianga ʼyaa ngayeje jmeni xi kisinda Niná majinná nga tsín mangóson josʼin nga koanndaa. Ánni. Je Biblia kʼoatso nga toñá xi chjotaa xi sénle Niná kichʼá (Génesis 1:26, 27). Jósʼin tsoyanile jebi. Kuinga kʼoasʼin kisindaná Niná jokjoan je, tobʼelañá, bakoñá kjoatsjoacha kao kjoakixi.

Xi ijngosani, je Niná kʼoasʼin kisindaná nga maná nikjaʼaitsjeen kʼoa nga ʼyaa jmeni xi ndatjín kʼoa kao xi chʼaotjín kʼoa nga mená jchaa xi tʼatsʼe kʼoa nga miyole koaan. Kuinga ma ʼyasíñá jokjije kijna je ngʼajmi kao je Sonʼnde, kao ngayeje jmeni xi koannda, kʼoati tsjoa sʼe tokoán nga chotsenlee jmeni xi nʼio nda sʼin koannda, nga noʼyalee músika kʼoa kao poesía. Tonga toñá xi chjotaa xi kʼoasʼin ma bʼetsʼoalee je xi kisindaná. Ngayeje jebi kui bakó nga tsín mangósoán kao jmesani xi koannda.

Tikjaʼaitsjenlai jebi. Kʼiatsa kʼoalani sʼin koanmele Niná nga tochoa nó si̱jchá yaoná, ánni nga kʼoasʼin kisindaniná nga nʼio nkjín koya jmeni xi maná nʼia kʼoa nga koa̱n si̱chjén ngantsjai jebi. Kui kʼoasʼin kisindaniná nga̱ kui xi mele nga kuiyoaa ngantsjai nichxin.

Tjínkʼa chjota xi kʼoasʼin síkjaʼaitsjen nga tsín kʼoasʼin tsakʼéndajin Niná nga i̱ kuiyoaa ngantsjai i̱ Sonʼnde. Tjínkʼa xi kʼoatso nga tochoa tse biyoaa i̱ Sonʼnde kʼoa nga i̱ chotʼayakaoná tsa koa̱n koanngínkiyoaa ya ngʼajmi ngantsjai nichxin. Tsa kʼoalani tísʼín je Niná joxi kontrajinni tíjnale jokjoan. Tonga jebi alikui kʼoatjín, nga̱ je Biblia itso xi tʼatsʼe: “Ñaki kixi je ndiaale. Niná xi tsín bʼéndiso, xi tsínle kjoatsʼen; ñaki kixiní je” (Deuteronomio 32:4).

 Je Biblia kʼoatso jme xá kisindani Niná je Sonʼnde, itso: “Je ngʼajmi tsʼení je Jeobá, tonga je sonʼnde jé chjotasonʼnde kitsjoale” (Salmo 115:16). Je Niná kui xá kisindani je Sonʼnde nga koa̱n i̱ kuiyoaa ngantsjai nichxin, kʼoa kitsjoaná ngayeje jmeni xi machjénná kʼoa xi tsjoa bʼé tokoán (Génesis 2:8, 9).

“Je ngʼajmi tsʼení je Jeobá, tonga je sonʼnde jé chjotasonʼnde kitsjoale” (Salmo 115:16).

Je Biblia kʼoati tso jme xá kisindani Niná je chjota. I kitsole je chjota xi títjon tsakatio: “Titsao sonʼnde kʼoa tatexomalao, kʼoa tjanentsjao [...] ngatsʼi cho̱ xi tjío i̱ tʼanangi” (Génesis 1:28). Nʼio tse kjoanda tsakʼaile nga je sikuinda Sonʼnde kʼoa nga ʼndenaxó sikao. Je Adán kao Eva koan tsakatio tsakai ngantsjai nichxin i̱ Sonʼnde kao xtile.

Je Biblia kʼoatso nga jngo ánkje xi kisinda Niná, je xi Satanás tsakʼin nga koanskanni, kontra tsakʼejnale kʼoa koanmele kisikixoyajin jmeni xi tjínndajinle Niná. Jméni xi kisʼin.

Je Adán kao Eva koankjainle jmeni xi kitsole je Na̱i nga kontra tsakatiole je Niná. Je Na̱i kʼoakitso nga je Niná kui tíbʼéchjoale xi ndatjín kʼoa nga koa̱n je skoéjin jmeni xi ndatjín kao xi chʼaotjín. Je Adán kao Eva jé Na̱i kitsjoanganʼiole kʼoa yátsʼin tsakinyále Niná. Jósʼin kichomani nga kʼoakisʼin, nga jeki nichxin kʼieen jokjoan kitsole Niná. Alikui tikoan tsakationi ngantsjai nichxin ya ʼNdenaxó (Génesis 2:17; 3:1-6; 5:5).

Nga kʼoasʼin yátsʼi̱n tsakinyále Niná je Adán kao Eva nʼio tse kjoa tjíobatiojin je chjota. Je Énle Niná itso: “Je xi jée ʼmi jaʼasʼenjin sonʼnde xi totʼatsʼe jngo chjota [Adán]. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Romanos 5:12). Kuinga mʼesíñá nga jée kichʼá, ali tsakuijin nga je Niná xi “kʼoasʼin tjínndajinle”.

Ninga yátsʼi̱n tsakinyále Niná je Adán kao Eva alikui tsʼantjaiya jmeni xi tjínndajinle Niná xi kao Sonʼnde kʼoa kao chjota. Jé kjoatsjoachale kao kjoakixile xokisikao nga tsakʼéndajin nga ndái kuiyolee je jée kao kjoabiya. Je pastro Pablo i kitso: “Je chjíle jée kjoabiya ní, tonga je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá” (Romanos 6:23). Nga nʼio tsjoakená Niná kui xokisikao “nga kitsjoa je xi tojngo ʼndíle [Jesucristo], jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Nga kao kjoatsjoa tsakʼéchjíntjainá Jesús, koaan sʼe̱ ijngokʼaná ngayeje xi kisicha je Adán. a

Jeme kuitjoson jmeni xi tjínndajinle Niná nga ʼndenaxó sikao je Sonʼnde. Kʼianga koa̱n sʼe̱li kjoanda jebi, tʼintjenngi je kjoafaʼaitsjen xi kitsjoa je Jesús, nga i̱ kitso: “Titjásʼennio xo̱ntjoa xi nrʼoeya, nga teya xo̱ntjoa, kʼoa teya je ndiaa xi fini jña nga cha̱jin, kʼoa ali kʼoakji nkjín xi ya faʼasʼen. Nga̱ nrʼoeya je xo̱ntjoa, kʼoa xkóya je ndiaa xi fini kjoabijnachon, kʼoa choa mani xi ya masjaile” (Mateo 7:13, 14). Ji xi síni, jméni xi chjoéjin.