JE LUCÍA CHJIʼNGÉ SʼÍN NGA FI. Kʼianga sʼa ʼndí kji kui chʼin xi poliomielitis ʼmi kiskatʼale, jebi yaa naxáná tsoale kʼoa sasaa bakinnile je chjota. Kʼianga 16 nóle, je chjoón xi síxákao i kitsole: “Jé Niná xi kjoañʼai títsjoáli, nga̱ xíjin koain kʼoa tsín tsaʼyaxkuín je na̱li”. Tsanda jenkjín nó jaʼato, je Lucía tojo aon male jmeni xi tsakʼinle.

KʼIANGA KISʼEJINLE DÁMARIS NGA JNGO TUMOR TÍJNAJIN JE XOKOAJKO̱, je nʼaile i kitsole: “Nʼiojin chʼao kinʼiai, kuijin nga kjoañʼai títsjoánili Niná”. Kʼianga kʼoatsakʼinle nʼio kinroajen kon.

Jenkjín jmi nó tjínle nga je chjota kʼoasʼin síkjaʼaitsjen nga je Niná xi chʼin tsjoáná kʼianga chʼao nʼia. Je libro xi Usos y costumbres de las tierras bíblicas ʼmi kʼoatso nga nichxinle Jesús, je chjota kʼoasʼin koankjainle nga chʼin sʼele jngo chjota xi kabajngijée kʼoa tsakui nga xínkjín kabajngijée kʼoa kʼoasʼin bʼainile kjoañʼai tʼatsʼe jmeni xi kasʼín. Je libro Medieval Medicine and the Plague (La medicina medieval y la peste) kʼoatso kʼianga nó 500 saʼnda chrianle nó 1500, tjínkʼa chjota xi kʼoasʼin koankjainle nga Niná kui chʼinʼbi kisichjén nga kitsjoale kjoañʼai je chjota xi totʼatsʼe jéele. A kui xi tsonile jebi nga je Niná xokisʼin nga chʼin kisʼe ya Europa kʼianga siglo 14 axo kuinga ʼbi je chʼin nga kʼoasikji chjota jesonni, tojosʼin tsaʼyale nga koanskanni. Tonga, tsakui nichxin tojo kui chjonangilai yaoli, tsa chʼin síchjén Niná nga kjoañʼai tsjoále je chjota xi jée bajngi. a

TIKJAʼAITSJENLAI JEBI: Tsakuilani kisichjén Niná je chʼin nga kitsjoale kjoañʼai je chjota xi bakinle. Ánni nga Jesús kisindayasíni je xi chʼin tjínle. Tsa kʼoalani tjín jebi, a tsí tsa kontra tsakʼejnale je kjoatéxomakixile Niná (Mateo 4:23, 24). Tonga je Jesús alikuikʼia kʼoakisʼin, tosaa i̱ kitso: “Kʼoasʼian ngantsjai je xi sasénle nga je”. Kʼoa i kitsosa: “Josʼin nga Nʼainá kitsjoana kjoatéxoma, jméni nga kʼoasʼin katabeni sonʼndebi nga tsjoake̱ Nʼainá” (Juan 8:29; 14:31).

Ya Biblia kʼoatso nga “ñaki kixiní” jmeni xi sʼín je Jeobá (Deuteronomio 32:4). Tobʼelañá, tsa yalani tíjnaya avión jngo chjota xi tsajngijée kʼoa tsa jme xi koa̱nle avión jebi kʼoa nkjín chjota kuiyá, a kui xi tsonile nga je Niná xi kjoañʼai títsjoále je chjota xi tsajngijée. Jngo choʼndale Niná xi tsakʼejna nichxin kjoatse xi Abrahán tsakʼin ñaki kʼoasʼin kisikjaʼaitsjen nga Niná alikuikʼia kui kʼoasʼin jmeni xi chʼaotjín. Kuinga i̱ kitsoni: “Alikui kixi tíjna xi kao ji nga kʼoatisʼin si̱kʼain je chjotakixi josi̱koai je chjotatsʼen” (Génesis 18:25). Xi ijngosani, ya Biblia kʼoatso nga “je Niná alikui male nga kui kʼoasʼín xi chʼaotjín” (Job 34:10-12).

Ali tsa jejin Niná xi kjoañʼai tsjoáná kʼianga chjaʼatokoán. Kʼoasʼin tsakakó jebi Jesús kʼianga kisatejin jngo chjota xi xka̱ kji saʼnda nga kitsin. Je chjotatjenngile Jesús itso xi kiskonangile: “Rabí, ʼyá xi tsajngi jée, a jé xi xka̱ kji axo jé xijchále, nga kʼoasʼin xka̱ kjini nga kitsin”. Kʼoa Jesús i kitsole: “Nijejin [chjota] jebi tsajngi jée, kʼoa nijejin xijchále” (Juan 9:1-3).

Tokʼoajin koanle je chjotatjenngile Jesús kʼianga kʼoakitsole nga tsín je xijchále ni jejinla chjota jebi xi tsajngijée nga kui chʼin tjínnile. Kʼianga kisindaya Jesús chjota jebi nga koantsennile kui  tsakakó nga tsín kʼoatjín josʼin kisikjaʼaitsjen je chjota nga kui nichxin (Juan 9:6, 7). Kʼianga ʼyaa nga tsín je Niná xosʼín nga kjoañʼai tjín, nʼio tsjoánganʼiole je chjota xi nʼio táo chʼin tjínle.

Je Biblia itso:

•   “Je Niná alikui male tjoé kjoatsʼen, kʼoa nijngojin xi je chʼao síkao kao kjoatsʼen” (SANTIAGO 1:13). Kʼoa ali tsa tokuijin, je Niná jeme kjoaʼaxin ngayeje xi chʼaotjín xi kjima sonʼnde, jolani chʼin, kjoañʼai kao kjoabiya.

•   Je Jesús “kisinda ngatsʼi xi tjíomʼe” (MATEO 8:16). Kʼianga kʼoasʼin kisindaya Jesús je chjota kui tsakakó jmeni xi sʼin kʼianga jekoatexoma jngo tjíjtsa Sonʼnde.

•   “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (APOCALIPSIS [REVELACIÓN] 21:3-5).

Ánni nga kʼoasikji kjoañʼai kao kjoachjaʼatokon tjínsíni. Kʼiatsa tsín je Niná tjínle jée, ʼyáni xotísʼín. Jokji siento nó tífaʼato kui jebi xi nʼio kjonangile yaole je chjota. Yaa kjoaʼmiya xi fisani kuitsoyaná tʼatsʼe jebi.