Si̱kjaʼaitsjenla jokji tjentʼale xínkjín je xtingʼion xi ngóson kjoan. Jngo xi directora sʼin tíjnale jñani kotʼayajin tʼatsʼe je xtingʼion xi Nancy Segal ʼmi, xi kʼoati ngʼion kao ndichja kʼoatso nga tjínkʼa je xtingʼion xi nʼio nda bexkon xínkjín. Jngo chjoón xi i̱ kitso tʼatsʼe ndichja: “Nʼio nda ʼyaxkuinjin xíngijin”.

Ánni kʼoasikji nda bexkonni xínkjín je xtingʼion. Ningalani kui xosíkao jñani tjíoni kʼoa josʼin nga koanjchínga, tonga tojosʼin kotʼayason je chjota, tjínkʼa xi kʼoatso nga kui mangósonni je xtingʼion nga̱ ngóson sʼin majchá ya yatsʼoa̱ je na̱le.

TIKJAʼAITSJENLAI JEBI: Jé Niná tsakʼénda jokoa̱nkjoan nga jngó jngó chjota, kuinga ngisa nda majinnile jotjín tokoán tikʼoajinni toʼya chjotani. Je David itso xi kiski: “Yaa kinikʼéjnaʼmanái ya tsʼoa̱ je na̱na. Je nindana tsaʼyaní kʼianga toʼma koannda [...]. Tsaʼyanái saʼnda nga sʼa kjimajcháya yatsʼoa̱ na̱na, kʼoa yaa libroli tjítʼaxo̱n ngayeje” (Salmo 139:13, 15, 16). Tojé Niná xi nda bexkonná kʼoa majinle josʼin nga koanndaa. Tonga, ali tsa tokuijin, kʼoati be jokjoaan, jonʼia kʼoa josʼin nga koanjchíngaa. Kʼoa kʼoasʼin ʼyañá nga toje Niná xi ngisa nda majinle jotjín tokoán.

Je rey David i kitso kʼianga tsakʼétsʼoa: “Ji Jeobá, ji tichotʼajin ngakjijngo yaona, kʼoa ʼyanái. ʼYaní kʼianga batejna kʼoa nga bisotje̱n. Kʼoa kjin ʼyani jotjín je kjoafaʼaitsjenna. Kʼoa saʼnda kje tíjnaʼajin én ya ndsoʼba, kʼoa ji Jeobá, jeʼyai jmeni xi xián” (Salmo 139:1, 2, 4). Xi ijngosani, tojé Jeobá xi be jokjoantjín tokoán kʼoa jmeni xi mená sʼiaan (1 Crónicas 28:9; 1 Samuel 16:6, 7). Jméni xi tsoyaná jebi tʼatsʼe Niná.

Kui tsoyaná nga Niná bení kʼoa majinle jotjín tokoán kʼoa josʼin nikjaʼaitsjeen ninga sakʼoa likui ʼyaa jme xi kʼuínlee nga kʼoétsʼoalee. Kuenta sʼín jmeni xi nʼia, kʼoa majinle ánni nga kʼoanʼiañá. Kʼoa ali tsa tokuijin, kʼoati be Niná jmeni xi sʼiaan tsa kʼoantjaiya josʼin tiyoaa. Je Niná kʼoasʼin kisindaná nga bakoá kjoatsjoacha kʼoa nʼio mandosinle josʼin nikjaʼaitsjeen kʼoa jmeni xi mená sʼiaan (1 Juan 4:7-10).

 Je Biblia itso:

•   “Xko̱n Nainá [Jeobá] yaa tíkotsenle xi kixi bʼema, kʼoa xo̱ño tínrʼoéle xi bʼétsʼoa” (1 PEDRO 3:12).

•   Je Niná itso: “Sichoyale, kʼoa xínyale jokji ndiaa xi kʼuínyai. Kʼoa kʼianga tsjoale kjoafaʼaitsjen skotsenle” (SALMO 32:8).

Kʼianga ʼyaa nga je Jeobá majinle jotjín tokoán basenkaoná kʼianga kjoa bitjatojiaan. Tobʼelañá, je Anna xi Nigeria tsʼe itso: “Nʼio kisikjáojian, saʼnda kʼoasʼin kisikjaʼaitsjen nga toxitsjoani nga tijnakoan. Títjon xʼinna kʼien, xijekoan, cáncer kisʼena kʼoa je tsotina yaa hospital tsakajna nga hidrocefalia ʼmi chʼin xi kisʼele (nandá kixinya xokoajko̱). Nʼio ñʼai koanna nga ya hospital tsakajna kʼoa nga kʼoati ya tsakajna je tsotina, kitiyaña, quimioterapia tsakʼaina kao radioterapia”.

Jméni xi tsakasenkao je Anna nga kiskale je kjoa xi jaʼatojin. Itso: “Nʼio kisikjaʼaitsjenjian jmeni xi tso je Biblia. Tobʼelañá, nga i̱ tso Filipenses 4:6, 7: Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno. Kʼianga kisikjaʼaitsjenjian én jebi ngisaa koannʼiotʼa Jeobá, nga̱ koanjinna nga ngisa nda be je kjoa xi tifaʼatojian tikʼoajinni an, kʼoati nʼio kitsjoanganʼiona je xi ngóson sʼin makjainnajin.

Ninga tojo chʼin tjínna, tonga ngisaa tsjoa tjín tokoan nga̱ ʼbeña nga je Jeobá tíbasenkaonajin ngantsjai. Santiago 5:11 itso: Jó tondale ʼmile je xi jchókjoale kjoañʼai. Jekinoʼyao nga kjoatsejta kisʼele Job, kʼoa tsaʼyao josʼin koanmele Nainá, nga je Nainá kjaínga tjínle kjoamatakon, bema̱ní”. Je Jeobá nʼio nda koanjinle je kjoañʼai xi jaʼatojin je Job, kʼoa ñá kʼoati likui jao tjín tokoán nga kʼoati be je kjoa xi bitjatojiaan.