Je xi jngo ora nga jekatsin jngo ʼndílee nʼio chjíle. Nga̱ kʼiaa fitsʼiani jokji tsjentʼale xínkjín je na̱ kao ʼndílee kʼoa kui xi koasenkao josʼin koa̱njchínga je ʼndílee kʼoa josʼe̱ kon nga koa̱nskanni. a

Jméni xosíkao nga kao kjoatsjoa síkuindani je ʼndíleele jngo na̱. Je libro xi The Journal of Perinatal Education ʼmi, xi kiski je maestra Jeannette Crenshaw kʼoakitso kʼianga jetsin jngo ʼndílee, je na̱ sʼeele hormona xi oxitosina ʼmi kʼoa kui xosíkao nga tsen male nga ʼndí tjínle, nga tjao manile kʼoa nga síkakini. Kʼoati sʼesale hormona xi basenkao nga nʼio tsjoake mani xínkjín. Ánni nga nʼio tjínsínile kjoandosin jebi.

Jé Jeobá xi kʼoasʼin kisinda nga tjao manile je ʼndíle jngo na̱. b Je rey David kitsjoale kjoanda Niná nga kitsin kʼoa nga tsín jme xi kisikjáojin nga tsakáyandsome je na̱le nga sʼa ʼndílee. Koanjinle nga je Jeobá kisikuinda saʼnda nga kitsin. I kitsole Niná nga tsakʼétsʼoa: “Jiní Ninána saʼnda nga sʼa tijnaya tsʼoa̱ na̱na” (Salmo 22:9, 10).

TIKJAʼAITSJENLAI JEBI: Tsa je Niná xi kʼoasʼin tsakʼénda nga síkuinda jngo na̱ je ʼndíle. A tsíkui xi bakóná jebi nga je Niná kʼoati mandosinle xi tʼatsaan nga jngó jngoá, xi xtile maa (Hechos 17:29).

Je Jesucristo, xi nʼio nda bexkon je Niná xi kisindaná, i kitso: “A tsí tsa saténa jao niseʼndí nga tojngo ʼndítaon. Nda tsa kʼoatjín nijngojin nga je katʼanangi, tsa tsín tsa jyole Nʼaino. Nda tsa ntsja̱jko tjíoxki ngayije. Kʼoasʼin ali bijkonjion, nga ngisa chjíno nga jon kaoni tsa nkjín niseʼndí” (Mateo 10:29-31).

Nʼio tochoa chjota xi kuenta sʼín je ʼndínise kʼoa ngisaa tsa jekamʼe. Tonga je Nʼainá xi tíjna ngʼajmi kuenta sʼín nga jngó jngó ʼndínise. Ningalani chjí be Niná je nise ngisaa nʼio chjí bekon je chjota. Kuinga tsín koa̱n jao kʼoésíni tokuin nga̱ je Niná mandosinle xi tʼatsi kʼoa kuenta sʼínli.

 Je Biblia itso:

•   “Je xko̱n Jeobá tíkotseen ngakjijnda, tíkotsenle je xi nda sʼín kao xi chʼao sʼín” (PROVERBIOS 15:3).

•   “Je xko̱n Jeobá yaa tíkotsenle je xi chjotakixi, kʼoa je xo̱ño nrʼoéle nga síje nganʼio” (SALMO 34:15).

•   “Nʼio tsjoa sʼe̱ tokoan xi tʼatsʼe kjoatsjoachali, kjoatsjoacha xi ñaki kjoakixi, nga̱ tiʼyaní je kjoaba xi tijnajian, kuenta tinʼiai je kjoañʼai xi tifaʼatojian” (SALMO 31:7).

A basenkaoná nga ʼyaa nga mandosinle Niná xi tʼatsaan kʼoa nga síkuindaná. Je Hannah c xi Inglaterra tsʼe, itso:

“Nʼio nkjín kʼa nga kʼoasʼin kisikjaʼaitsjen nga tsín tsjoakena Jeobá kʼoa nga tsín nrʼoéna nga bʼetsʼoale, nga̱ tsín nʼio kisʼejna je kjoamakjainna. Kjoañʼaijin títsjoána kixinña kʼoa tsakuije̱ nga tsín chjí bena. Kʼoakisʼe tokoan nga tsín mandosinle xi tʼatsʼan”.

Ndʼaibi, je Hannah ñaki kʼoatjín kon nga tsjoake je Jeobá kʼoa nga mandosinle xi tʼatsʼe. Jmé xi tsakasenkao nga tsín tikʼoasʼin kisikjaʼaitsjenni. Itso: “Alikui tosasa nga kʼoakisʼeni tokoan. Jenʼio kjoatse nga kinrʼoe jngoa je kjoanokjoaya xi kui kinchja̱ni nga Jesús kitsjoantjainá kjoabijnachonle kʼoa koanjinna nga tsjoakena je Jeobá. Kʼianga tsaʼbe nga nrʼoé Niná nga bʼetsʼoale, nkjín kʼa kiskiʼnda. Nga kiskotʼaya Biblia kʼoa nga kia je kjoajtín xi batío je testigole Jeobá tíbasenkaona nga ngisa nda ʼbe jokjoantjínni xi tʼatsʼe kʼoa jotjín kon xi tʼatsaan. Ndʼaibi, ʼbeña nga je Jeobá tsjoakená, basenkaoná kʼoa mele sikuindaná”.

Én jebi nʼio tsjoánganʼioná. Tonga jósʼin jchani tsa majinle Niná jotjín tokuin. Yaa kjoaʼmiya xi ijngo kuitsoyaná xi tʼatsʼe jebi.