Ngatsʼiñá nga koa̱nná si̱choyalee yaoná josatío kon je xi ngikʼa. Tobʼelañá, kʼiatsa ʼyani xi kjoa tífaʼatojin, koaan cha̱niyaa jkoaa jósʼe̱ tokoán tsa ñálani xi kui kjoa tibitjatojiaan. Kuinga kʼoatsoni je chjinexki xi Rick Hanson ʼmi, xi tʼatsʼe kjoafaʼaitsjenná kotʼayason, nga toxá jekichʼañá jebi saʼnda nga tsiaan.

TIKJAʼAITSJENLAI JEBI: Ñá xi chjotaa maná nichoyalee yaoná josatío kon je xi ngikʼa tonga je cho̱ likui male kʼoasʼín. Je Biblia kʼoatso nga je Niná sénle kisikʼaná kʼianga kisindaná (Génesis 1:26). Jebi kui xi tsonile nga kʼoati kjoaan jokjoan je Niná kʼoa nga kʼoati bakoá je kjoanda xi tjínle. Tobʼelañá, kʼianga nijinlee yaoná josatío kon je xíngiaa kʼoati tinʼia jósʼín je Jeobá, je Niná xi kisindaná (Proverbios 14:31).

Je Niná mamakená kʼoa tsín nda sʼe kon kʼianga kjoañʼai chjaʼá. Tobʼelañá, kʼianga kjoañʼai tsakjaʼá je chjota israelita nga choʼnda sʼin tsakatio ya Egipto kʼoa nga 40 nó tsakʼetsoma ya ʼndekixí, je Biblia kʼoatso nga nʼio aon koanle je Niná (Isaías 63:9). Nga tsabe jokji kjoañʼai jaʼatojin je choʼndale kʼoati nʼio aon kisʼe kon. I kitso: “Nanda ʼbe je kjoañʼai xi tjíofaʼá” (Éxodo 3:7). Je Niná itso: “Je xi jon síkaono jéni tolʼíxkoan síkao” (Zacarías 2:8). Kʼianga ʼya xi josíkaoná joxi jéni xokjimatʼain male.

Ningalani sakʼoa tsín nda sʼe tokoán kʼoa tsa kʼoasʼin nikjaʼaitsjeen nga tsín machjénná nga koakoná Niná je kjoamatokonle, je Biblia kʼoatso nga “ngisa ngʼa tíjna Niná kaoni tsa ni̱ma̱ná. Je ñaki be ngayije kjoa” (1 Juan 3:19, 20). Ngisaa nda bexkonná, be jmeni xi maná, jmeni xi nikjaʼaitsjeen, josʼe tokoán kʼoa ñaki nda machoyale.

 Je Biblia itso:

•   “Kuinókjoaní, kʼoa Jeobá kjuinrʼoéli; kʼianga si̱jái nganʼio, i kuitsoli: I tijna” (ISAÍAS 58:9).

•   “Nga̱ nda ʼbe jmeni xi tisikjaʼaitsjen xi tʼatsaon, kui xi tso je Jeobá, kjoafaʼaitsjen xi nyʼán tjín kʼoa ali tsa tsʼe kjoañʼaijin nga tsjoano kjoachoya nichxin xi sʼa nroa. Kʼoa jon kuinókjoanáo kʼoa kjoaʼaiño kʼoa kʼoétsʼoanáo, kʼoa an kjuinrʼoeno” (JEREMÍAS 29:11, 12).

•   “Tʼeyai ndáxkoan je xjoa̱li. A tsí ya tjítʼa je libroli” (SALMO 56:8).

A koasenkaoná jme kjoa xi bitjatojiaan kʼianga ʼyaa nga machoyale Niná josʼe tokoán. Kataʼyala je choa̱le María.

“Nʼio tse kjoañʼai tsakatejnajian kʼianga cáncer kisʼele je ʼndítina xi 18 nóle kʼoa nga jejaʼato jao nó, chaan tsín tikichokjoanile. Ánni nga kʼoakjimatʼainsíñá kixinña. Nʼio koanjtina xi kao Jeobá nga̱ tsín tsakasenkaona.

Kʼoakisʼe tokoan nga tsín tsjoakena je Jeobá. Kʼianga jejaʼato jaon nó, jngo tichjaa xi nʼio miyona mani xi ya jinjtín tíjna, tsakʼeyanajmíle jotjín tokoan. Nʼio nda kinrʼoéna jokjitse tsakjakoa, kʼoa kʼiaa jngo testo xi tsʼe Biblia tsakakóna xi nʼio tsakasenkaona. Yaa 1 Juan 3:19, 20, jñani kʼoatso nga ngisa ngʼa tíjna Niná kaoni tsa ni̱ma̱ná kʼoa nga be ngayeje jmeni xi maná. Kʼoa kʼoakitsona nga je Jeobá nda machoyale je kjoañʼai xi bitjatojiaan.

Ninga kʼoakitsona, tojo tsín nda kisʼe tokoan. Kʼiaa tsakʼexkia Salmo 94:19, jñani i̱ tso: Kʼianga nʼio kisikjáojian, ji kininʼiojin tokoan kʼoa kinikinjenyʼánjin ni̱ma̱na. Kuikjoán jebi xi nʼio machjénna nga kʼia. Nga tsaʼbe nga nrʼoéná Jeobá kʼoa nga machoyale jmeni xi maná, kʼiaa tsakʼeyanajmíle je kjoaba xi tifaʼatojian kʼoa kui jebi xi nda tsakʼé tokoan”.

Nʼio sínʼio tokoán nga ʼyaa nga machoyale Niná jmeni xi maná. Tonga, ánni nga kʼoasikji kjoañʼai tjínsíni. A kjoañʼai tísíkjaʼáná tsokʼoa Niná tʼatsʼe je jée xi bijnyaa. A kuicho nichxin nga tjóxin je kjoañʼai xi tjín. Xi tʼatsʼe jebi yaa kuitsoyaná ya kjoaʼmiya xi fisani.