Je Niná kʼoasʼin kisinda yaoná nga toje manda ijngokʼani. Tsa jñani tiná, tsa bixjajon yaoná kʼoa tsa tjín xi sʼe̱nná, je yaoná kjitʼanangi batéchjoale je njín kʼoa ndi̱toon mandaya ijngokʼani.

TIKJAʼAITSJENLAI JEBI: Tsa kʼoasʼin kisindaná je Niná nga kjitʼanangi mandaya ijngokʼani je yaoná tsa jñani tiná, a makjainná nga kʼoati koa̱nle sindayaná tsa aon tjín tokoán. Je xi kiski jngo salmo kʼoatsakʼé kon nga je Niná male síndayaná tsa aon tjío tokoán (Salmo 147:3). Kʼoa tsa ji xi aon tjín tokuin, a makjainli nga koa̱nle Niná sindayali ndʼaibi kʼoa kao nichxin xi nroaján.

Je Jeobá itsoná: “Ali tsa nokjonjin, nga̱ an tijnakaole. Ali tsa nikjáojinjin, nga̱ anña Nináli. An tsjoanganʼiole, an koasenkaole” (Isaías 41:10). Nga ʼyaa nga tsjoakená je Jeobá nyʼán sʼe tokoán kʼoa tsjoáná je nganʼio xi machjénná nga chókjoajinná je kjoa xi bitjatojiaan. Kʼianga kui kinchja̱ni je pastro Pablo tʼatsʼe kjoanyʼán xi tsjoáná Niná i kitso: “Je kjoanyʼántakonle Niná xi ñaki faʼatole ngayije kjoafaʼaitsjenle chjota” (Filipenses 4:4-7, 9). Kʼoa i kitsosa: “Kʼoakoa̱nna tojmeni nga̱ tjínna nganʼio xi totʼatsʼe je xi kʼoasʼin tsjoána nganʼio” (Filipenses 4:13, TNM).

Sítajaa je kjoamakjainná jmeni xi tso je Biblia tʼatsʼe jmeni xi sʼin je Niná xi kao chjotasonʼnde. Tobʼelañá, Apocalipsis 21:4, 5 (xi faʼaitʼa ya pájina xi ijngo) tsoyaa jmeni xi sʼin je Niná kʼoa ánni nga koa̱n je si̱nʼiotʼañá.

•   “Kʼoejon ngayije” ndáxkoaan. Je Jeobá kjoaʼaxin ngayeje jmeni xi síkjaʼákonná kʼoa xi kjoaba síkatíojinná, ninga kui xi tosʼa choa kjoa maná.

•   “Je xi tíjnason yáxile” ya ngʼajmi, je xi nʼio tse nganʼio tjínle, xi kisinda ngayeje jmeni xi tjín, sichjén je nganʼiole kʼoa kao je kjoatéxomale nga tsín tikjoañʼai chja̱ʼañá, kʼoa koasenkaoná ngantsjai.

•   Je Jeobá kʼoatsoná nga ñaki “kjoakixiní” jmeni xi tso. Kui xi tsonile, nga Jeobá jé Niná xi kixi, kʼoa kui jaʼaínle síchjén nga ñaki sitjoson jmeni xi tso.

“Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato. Je xi tíjnason yáxile, kitso: Koeni an sichjotse ngayije. Kʼoa kitsona: Chjí, nga je énbi ndaní, kʼoa kjoakixiní” (Apocalipsis 21:4, 5).

Jmeni xi koannda kʼoa kao jmeni xi tso je Biblia basenkaoná nga ngisa nda ʼyaa je Nʼainá xi tíjna ngʼajmi. Tobʼelañá, kʼianga chotsenlee jmeni xi koannda basenkaoná nga miyole Niná maa, kʼoa je Biblia itso: “Tichriantʼalao Niná, kʼia kʼoati je sichriantʼano nga jon” (Santiago 4:8). Kʼoa ya Hechos 17:27 itso: “Tonga kjoakixi nga tsín tsa kjin tíjnaná nga jngójngoá”.

Kʼianga ngisasa si̱kʼayaa nichxin nga jchasaa xi tʼatsʼe Niná, ngisaa sʼe̱jngo tokoán nga mandosinle xi tʼatsaan (1 Pedro 5:7). Jósʼin basenkaoná nga je Jeobá ninʼiotʼaa.

Kataʼyala je choa̱le Toru, xi Japón tsʼe. Ningalani tsakakóyale je na̱le je Énle Niná saʼnda nga sʼa ʼndí kji, yaa kijinle je chjota xi to kjoatsʼen sʼín xi yakuza sʼin ʼyale. Je Toru itso: “Kʼoasʼin kisikjaʼaitsjen nga jtikena je Niná, kʼoa nga kjoañʼai tsjoána kʼianga tjín xi biya, ngisaa tsa je chjota xi tsjoake̱”. Je Toru kʼoatso nga nʼio tsʼen koan, kʼoa nga tsín tichʼao kisʼeni kon nga kjoatsʼen kisʼin. Kʼoa tʼatsʼe jmeni xi kisimekon, itso: “Koanmena kʼien nga sʼa xtia, kʼoa nga nʼio kataʼyana kʼiatsa je sikʼien ʼyani xi ngisa nʼio taja tikʼoajinni an”.

Tonga kʼianga jekiskotʼaya Biblia je Toru kao je chjoónle xi Hannah ʼmi, kisikʼantjaiyaa josʼin kikao yaole kʼoa jofa. Je Hannah itso: “Tokʼoakoanna josʼin kisikʼantjaiya yaole je xʼinna”. Kʼoa  je Toru itso: “Alikui jao tjín tokoan nga tíjna je Niná kʼoa nga makjáojinle xi tʼatsaan. Je Niná alikui mele nga ʼya xi kuiyá kʼoa tíjnanda nga síchatʼale ʼyani xi kao ni̱ma̱le kʼoamanile jmeni xi sʼín. Kʼoa koaan kʼoéyanajmílee jotjín tokoán nga̱ tojé xi koa̱njinle. Je Jeobá jeme kjoaʼaxin ngayeje je kjoa xi tjín, kjoaʼaon kʼoa kao kjoachjaʼatokon. Basenkaoná nichxin xi tiyoaa ndʼaibi. Nʼio makjáojinle xi tʼatsaan kʼoa tsjoánganʼioná kʼianga nroajen tokoán” (Salmo 136:23).

Josʼin bakó je choa̱le Toru, kʼianga majinná nga jeme kjoaʼaxin Niná ngayeje jmeni xi aon bʼé tokoán, tsjoánganʼioná nichxin xi tiyoaa ndʼaibi kʼoa tsjoáná kjoachoya. Ningalani chʼao chon sonʼnde ndʼaibi, basenkaoná je kjoatsjoachale Niná.