“Kʼiá saʼndani Jeobá, nga kʼoasʼin skiʼndáxá nga kuise̱nkaonái kʼoa nga tsín kuinóʼyai. Kʼiá saʼndani nga sijé nganʼio nga kʼoasʼin kjoatsʼen tjín, kʼoa nga tsín jme xi sʼiain” (Habacuc 1:2, 3). Kui jebi xi kitso Habacuc xi nda sʼin tsakʼejna ngixko̱n Niná. A kui kʼoakitsoni jebi nga tsín kisinʼiotʼa Niná. Mai. Je Niná kʼoakitsole nga jetíjnachoa̱le jngo nichxin nga kjoaʼaxin je kjoañʼai (Habacuc 2:2, 3).  

Kʼianga kjoañʼai bitjatojiaan kʼoa tsa je xíngiaa xi kʼoakjima, tsakui nichxin kʼoasʼin si̱kjaʼaitsjeen nga nʼio tísíkʼachxin je Niná. Tonga je Biblia itso: “Je Nainá likui sitseya xi kisisʼengi, josʼin síkjaʼaitsjen kʼa nga matseyale, tonga tjínle kjoatsejta xi tʼatsaan. Kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Pedro 3:9). 

Je Niná jeme kʼoasʼin. Je Jesús tongini kʼoakitso jokoa̱nchon kʼianga jetífikjetʼa nichxin kʼoa nga jngojtín mani je chjota (generación) xi koa̱njinle jmeni xi koa̱n (Mateo 24:3-42). Ndʼaibi tíbitjoson je én jebi, kʼoa kui xi tsonile nga jeme kjoaʼaxin Niná je kjoañʼai xi tjín. a

Tonga a koaanle Niná nga kjoaʼaxin je kjoañʼai xi tjín. Kʼianga tsakʼejna Jesús i̱ Sonʼnde tsakakó nga koa̱nle kʼoasʼin. Kataʼyala kʼaa choa̱.

Nga kjoaxkón sʼe. Ñandia kʼianga chitso tjíoya je Jesús kao pastrole nga tjíomajin ya ndáchikon Galilea, toʼikoan jngo ntjao̱nʼio kitjo kʼoa me kiskasʼenngindá je chitso. Je Jesús tsakakó nga je kʼoa kao Nʼaile koaanle kʼoechjoale je kjoaxkón xi sʼe (Colosenses 1:15, 16). Toʼi kitsole je ntjao̱nʼio: “Jyó tijnai. Kisʼejyo ndi̱toon ntjao̱be. Koanndachonni” (Marcos 4:35-39).

Chʼin. Nʼio nkjín chjota xi tsabe nga kisindaya Jesús je xi xka̱ kjoan, xi chjiʼngé, xi chʼinxín tjínle, xi tjíofiʼndojon yaole kʼoa xi kjaʼaísa chʼin. Je Biblia kʼoatso nga Jesús kisindayaa “ngatsʼi xi tjíomʼe” (Mateo 4:23, 24; 8:16; 11:2-5).

Kjinrá. Kʼianga kitsoyason Jesús, jao kʼa nga kʼoasʼin kisichjén je nganʼio xi kitsjoale je Nʼaile nga kisinkjínya je tsojmi xi ma chine, kʼoa jmi mani chjota xi kisikjen (Mateo 14:14-21; 15:32-38).

Kjoabiya. Kʼianga tsakʼejna Jesús i̱ tʼanangi, jan chjota kisikjaʼáyale, jngo xi jeño nichxin kijnakʼien. Jebi kui xi bakó nga je Jeobá koaanle sikjaʼáyale xi jekʼien (Marcos 5:35-42; Lucas 7:11-16; Juan 11:3-44).