Tsa mená nga ngisa nda jchaxkoaan jngo chjota machjénní nga jchaa jmeni xi kisʼin. Kʼoatisʼinni xi kao je Niná, tsa mená nga nda jchaxkoaan machjénní nga jchaa jmeni xi kisʼin. Tokʼoajinkoa̱nli nga jchai josʼin basenkaoná jmeni xi kisʼin je Niná kʼoa je kjoanichikontʼain xi tsjoáná nichxin xi nroaján.

Jé Jeobá kisindaná kʼoa jokjoan “koantsen saʼnda nga kisʼenda sonʼnde. Je kjoabi tsaʼyale totʼatsʼe tsojmi xi kisʼenda” (Romanos 1:20). “Jé kisinda sonʼnde kʼoa kao nganʼiole kisindani; jé tsakʼénda nangi jña majcháson tsojmi kʼoa kao kjoachjinele tsakʼéndani; jé tsakánda ngʼajmi kʼoa kao kjoachjinele tsakándani” (Jeremías 10:12). Ngayeje jmeni xi kisinda Niná kui bakó nga nʼio tsjoakená.

Tikjaʼaitsjenlai jokji tsjoa sʼe tokoán nga kʼoasʼin kisindaná je Niná jokjoan (Génesis 1:27). Basenkaoná nga koa̱n chjénngilee jokjoan. Kui kjoanda kitsjoaná nga majinná josʼin síkjaʼaitsjen kʼoa nga ʼyaa je kjoatéxomale. Kʼianga kui bándiaaná je kjoatéxomale Niná tsjoa sʼe tokoán kʼoa sʼená kjoachoya kʼoa koaan miyole koaan.

Kʼianga chotsenlee jmeni xi kisinda je Niná ʼyañá kʼianga tsjoakená. Je pastro Pablo i kitso: “Nda kisʼin. Kitsjoa[ná] jtsí xi ngʼajmi nroani, kʼoa nichxin josʼin nga majchá tsojmintje. Kitsjoa[ná] je tsojmi xi biyochon[ñá], kao kjoatsjoa xi sʼejnajin ni̱ma̱[ná]” (Hechos 14:17). Je Niná ali tsa tokuijin kitsjoaná jmeni xi machjénná, nkjín koya jmeni xi kitsjoaná. Kʼoa nichxin xi nroaján ngisa tse kjoanichikontʼain tsjoáná.

Je Jeobá kui xá kisindani je Sonʼnde nga ñá kuiyosoán ngantsjai nichxin. Je Biblia itso: “Je  sonʼnde jé chjotasonʼnde kitsjoale” kʼoa “tsín tsa tokjoatjao kisinda, nga kui xá kisindani nga chjota koatioson” (Salmo 115:16; Isaías 45:18). ʼYáni xi i̱ koatio kʼoa jókji tse, je Biblia itso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Salmo 37:29).

Je Jeobá kui xá kisindani je Adán kao Eva nga i̱ koatio ngantsjai nichxin. Je Niná yaa kisikatío ya jngo ʼndenaxó “kʼianga kʼoentje kʼoa sikuinda” (Génesis 2:8, 15). Jngoo xá kitsjoale xi tsjoa koaya kon, i kitsole: “Katamantje̱ñó kʼoa katamankjínyañó, titsao sonʼnde kʼoa tatexomalao” (Génesis 1:28). Je Adán kao Eva koan tsakatio ngantsjai nichxin tsakai, tonga tsín kisitjosonle je Niná kʼoa likui ti “kixi” koanni kʼoa kisichaa je kjoanda xi kisʼele nga i̱ koatio Sonʼnde ngantsjai nichxin. Ningalani kʼoakisʼin je Adán kao Eva, je Niná alikui kisikʼantjaiya jmeni xi tjínndajinle xi kao chjota kʼoa kao Sonʼnde. Kataʼyala jmeni xi kisʼin je Niná.

Ánni nga kui Biblia kitsjoaniná je Jeobá. Xi títjon kuinga kataʼyaxkoaan (Proverbios 2:1-5). Kjoaixiní nga je Biblia alikui tsoya ngayeje xi tʼatsʼe Niná kʼoa nijngojin libro xi kuitsoyaná (Eclesiastés 3:11). Tonga jmeni xi tso je Biblia basenkaoná nga ʼyaxkoaan jokjoan je Niná, josʼin bekon je chjota kʼoa jokjoan chjota xi sasénle (Salmo 15:1-5). ʼYañá josʼin mele nga si̱xálee, ʼyañá je kjoafaʼaitsjen xi tsjoáná nga nda koanngínkoaa yaoná kʼoa josʼin tjínnele jchatokoán je tsojmi xi tjín sonʼnde. Je Biblia kʼoati basenkaoná nga ngisa nda ʼyaa je Niná xi totʼatsʼe jmeni xi kisʼin je Jesucristo (Juan 14:9).

Je Jeobá kʼoati kui xá kitsjoaniná je Biblia nga tsjoa sa̱tío tokoán kʼoa nga sʼe̱ná kjoachoya. Je Biblia tsoyaná jmeni xi tjínnele sʼiaan nga nda kuiyoaa kao familianá kʼoa nga tsín nʼio si̱kjáojiaan. Tojosʼin jchaa xi fisani, je Biblia tsoyaná jmeni xi nʼio chjonangilee yaoná. Tobʼelañá, ánni nga kjoañʼai chjaʼañá kʼoa jméni xi choyalee nichxin xi nroaján. Kʼoati tsoyaná jmeni xi kisʼin je Niná nga kuitjoson xi tjínndajinle.

Nkjínsa koya jmeni xi tsoya je Biblia xi tokʼoamaná kʼoa xi bakó nga tʼatsʼe Niná kinroani. Ñachanla koanni je chjota xi kiski je Biblia kʼoa jngo jmi kao jaon sientola nó koanjngoni, ninga kʼoalani alikui bʼantjaiya jmeni xi tso nga̱ tʼatsʼe Niná kinroani (2 Timoteo 3:16). Je Biblia alikui mangóson kao je libro xi kichji ngasʼa, jokji tífaʼa nichxin alikui tíbʼantjaiya jmeni xi tso, tojo kui faʼaitʼa jmeni xi tso je xo̱njchá xi kjio. Je Biblia tojo tífaʼatoya kʼoa tíbʼabíson ninga tjíobatiochjoa kʼa chjota. Ndʼaibi, tokuisa xi ngisa nkjín tísaténa kʼoa tífaʼatoya. Nga tojo tjín Biblia ndʼaibi kui xi bakó nga je Énle Niná kʼoéjna “ngantsjai nichxin” (Isaías 40:8).

Kʼianga kuitjoson jmeni xi tjínndajinle Niná, jngoo kjoatjao xi nʼio chjíle kitsjoa. Tojosʼin jesa kaʼyaa, je Niná kui xi koanmele nga je chjota koatio ngantsjai. Tonga nga tsín kisitjoson je Adán alikui koan tsakatio ngantsjai kao xtile. Je Biblia itso: “Xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Romanos 5:12). Kʼianga kʼoakoan. A tsínni kitjoson jmeni xi tjínndajin je Niná. Jókisʼin je Jeobá.

Jmeni xi kisʼin kui bakó jokjoan. Kui kjoatéxomakixile kisichjén nga kitsjoale kjoañʼai je Adán kao Eva nga tsín kisitjoson. Tonga kʼoati tsakakó kjoatsjoacha tʼatsʼe jmeni xi kisʼin nga kitsjoaná kjoachoya. Kui kjoachjinele kisichjén kʼianga tokjoan tsakʼéndajin jmeni xi koan (Génesis 3:15). Nga ndái kuiyolee je jée kao kjoabiya je ʼNdíle kitsjoa kʼianga kinikʼien.

Kʼianga nda kuiyo ijngokʼá. Je Jeobá kisikasén je Jesús i̱ Sonʼnde nga kitsoyale je chjota  jmeni xi sʼin nga sʼe̱le kjoabijnachon kʼoa kitsjoa “kjoabijnachonle nga nkjín chjota kʼoechjíntjai” a (Mateo 20:28; Juan 14:6). Je Jesús koan tsakʼéchjíntjainá, nga̱ tsín jme jée kisʼele joni je Adán, tonga jmeni xi tsín koanngóson kao je Adán kuinga kisitjosonle ngantsjai je Niná saʼnda nga kinikʼien. Ningala kʼoakoan, je Jeobá kisikjaʼáyanile kʼoa ki ijngokʼani ya ngʼajmi. Nga kʼoasʼin kisitjoson je Jesús koaan kuiyoaa ngantsjai nichxin. Je Biblia itso: “Josʼin nga kjaínga nkjín xi chjotajée koan xi totʼatsʼe nga jngo chjota xi tsín kisitjoson, kʼoatisʼin kjaínga nkjín xi chjotakjoakixi koa̱n xi totʼatsʼe nga jngo chjota xi kisitjoson” (Romanos 5:19). Nga kitsjoa je kjoabijnachonle Jesús, je Niná sitjoson jmeni xi tjínndajinle, nga koa̱n kuiyoaa ngantsjai nichxin.

Josʼin tsakʼéndajin je Jeobá jmeni xi kisʼin je Adán basenkaoná nga ngisa nda ʼyaa jokjoan. Majinná nga tsín jme xi kʼoechjoale nga kuitjoson jmeni xi tjínndajinle, jmeni xi tso “ñaki kʼoakoa̱n” (Isaías 55:11). Kʼoati kui bakó nga nʼio tsjoakená Jeobá. “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá. Kisikasén ʼndíle xi jéentjainá koanle” (1 Juan 4:9, 10).

Kʼianga kitsjoa Niná je ʼNdíle nga kʼienntjainá, alikui jao tjín tokoán kʼianga “kʼoati tsjoákjoatjaoná ngayije” jmeni xi tongini kʼoatítsoná (Romanos 8:32). Tonga, jmésani xi tso je Niná nga tsjoáná. Kataʼyala.