Jenkjín koya kaʼyaa xi basenkaoná nga majinná ʼyáni je Niná. Je Biblia kʼoatso nga Jeobá ʼmi je jaʼaínle Niná kʼoa nga kui kjoatsjoacha xi ngisa nʼio bakó. Kʼoati jekaʼyaa jmeni xi kisʼin kʼoa meni xi sʼa sʼin xi tʼatsʼe chjotasonʼnde. Tsesa xi machjén nga jchaa xi tʼatsʼe Niná. Tonga a nʼio tjínle kjoandosin nga kjoásjaiyasaa.

Je Jeobá kʼoatso nga “tsjoáʼndee nga kataʼyai” kʼiatsa kjoásjai (1 Crónicas 28:9). Nʼio tse kjoanichikontʼain sʼe̱li tsa kjoásjai je Niná. Miyoli koa̱n (Salmo 25:14). Jósʼin koasenkaoli nga miyoli koa̱n je Niná.

Tsjoa sʼe̱ tokuin. Je Biblia kʼoatso nga je Jeobá jngoo Niná “xi tsjoa tjínle” (1 Timoteo 1:11). Tsa si̱chriantʼalai je Niná kʼoa chjénngilai jokjoan tsjoa sʼe̱li, ndasʼin kuijnai, nda sʼe̱ kjoafaʼaitsjenli kʼoa nda sʼe̱ tokuin (Salmo 33:12). Koasenkaoli nga tsínkui kʼoasʼiain jmeni xi sikiʼaonli, kui xi ndatjín kʼoasʼiain kʼoa ndasʼin kuijnai kao xi ngikʼa. Kʼoati sʼe̱ tokuin jokitso je salmista: “Kʼianga sichriantʼale je Niná nʼio nda síkaona” (Salmo 73:28).

Je Niná sikuindali. Je Jeobá i tsole je xi miyole mani: “Kʼianga tsjoale kjoafaʼaitsjen skotsenle” (Salmo 32:8). Jebi kui bakóyaná nga je Jeobá síkuindaa nga jngó jngó choʼndale, kʼoa tsjoále jmeni xi machjénle (Salmo 139:1, 2). Kʼianga miyoli koa̱n je Niná jchaní josʼin koasenkaoli ngantsjai.

Tsee kjoanichikontʼain tsjoáli. Ninga jetíbasenkaoli nga tsjoa tjín tokuin ndʼai, je Jeobá kʼoatso nga ndasʼin kuijnai nichxin xi nroaján (Isaías 48:17, 18). Je Biblia itso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3). Je kjoachoya xi tsjoáná Niná “kjoakixiní” kʼoa síkʼéjnanʼioná joni tsa jngo ki̱cha̱ʼba̱ nichxin xi tiyoaa ndʼaibi kʼianga nʼio ñʼai kjimachon (Hebreos 6:19).

Kui kʼa jebi kjoanda xi sokóná nga ʼyaa xi tʼatsʼe Niná kʼoa nga miyole maa. Tsa mesali jchai, koaan chja̱kaonajmí jngui je testigole Jeobá, kʼoa kʼoati faʼaitʼa ya Internet ya www.pr418.com/mau.