ʼYáni je Niná
Nʼio nkjín chjota xi kʼoatso nga makjainle tʼatsʼe Niná, tonga kʼianga kui chjonangile xi tʼatsʼe, kjaʼaí kjaʼaí tso. Tjínkʼa xi kʼoasʼin síkjaʼaitsjen nga je Niná jngoo juez xi nʼio tsʼen, xi ñaki tokui xá sʼín nga kjoañʼai tsjoále chjota xi totʼatsʼe jéele. Kʼoati tjín xi kʼoatso nga kjoatsjoachaní je Niná kʼoa nga síchatʼaná tojme xi nʼia. Kʼoa tjínkʼa xi kʼoatso nga kjin tíjna kʼoa nga tsín mandosinle xi tʼatsaan. Makjoanni nga kjaʼaí kjaʼaísʼin síkjaʼaitsjen je chjota xi tʼatsʼe Niná, tochajinle kʼoasí nga nʼio ñʼai tjínle nga jchaa je Niná.
A nʼio tjínle kjoandosin nga jchai xi tʼatsʼe je Niná. Jaon, nga̱ koasenkaoli nga ndasʼin kuijnai (Hechos 17:26-28). Kʼianga ngisasa si̱chriantʼalai je Niná ngisaa koa̱nndosinle xi tʼatsi kʼoa koasenkaoli (Santiago 4:8). Kʼoa koaan kuijnai ngantsjai nichxin (Juan 17:3).
Jókoa̱nni jchai xi tʼatsʼe Niná. Tikjaʼaitsjenlai je miyoli xi nda ʼyaxkuin. Jókoanni koanmiyui. Kuijin títjon jaʼaínle tsaʼyai, xijekoan, tsaʼyaijin jokjoan, jmeni xi tsjoake kʼoa jmeni xi mai, jmeni xi kisʼin kʼoa jmeni xi sʼa sʼin, kʼoa kuijin xi tsakasenkaoli nga miyoli koan.
Kʼoatisʼinni xi kao Niná, ngisasa nda jchai tsa koa̱njinli jebi:
Je revista jebi kui xá kitjoni nga jchai jotso je Biblia tʼatsʼe kjoachjonangi xi faʼaitʼa ibi. Je kjoaʼmiya xi fisani, koasenkaoli nga jchai ʼyáni je Niná, kʼoati koakoyali jósʼin koasenkaoli nga miyole koai̱n.
