Je Niná i kitsole tʼatsʼe jngo yá xi kisasenjna ya ʼndenaxóle Edén: “Nichxin nga kui chi̱nai [je tole yá], kuiyání” (Génesis 2:17). Alikuijin kʼoakitsole Niná tsa tojo koa̱njchíngalani kʼoa kuiyálani. Je Adán bení nga tsínkʼia kuiyá tsa tsín ski̱ne tole yá.

Alikuijin ñʼai koanle tsakai Adán kao Eva nga kisitjoson jmeni xi tsakʼinle, nga̱ nʼio nkjín yá xi to bale kisʼe ya ʼndenaxóle Edén (Génesis 2:9). Tsa tsínlani kiskine je tole yá xi kisʼechjoale, kisitjosonjinle Niná, kʼoa kʼoajinsʼin tsakakóni nga toje Niná xi tiʼndele kʼoakuitsole jmeni xi sʼin.

Kʼianga koa̱njinná ánni nga kʼienni Adán kao Eva, kataʼyala jmeni xi koan ya ʼndenaxóle Edén. Jngoo ye̱ kisichjén je Na̱i nga tsakʼéndiso. Je Biblia itso: “Kʼoa je ye̱ jé xi ngisa maña koan tikʼoajinni ngatsʼi cho̱jñá xi kisinda Jeobá. Kʼoa i kitsole je chjoón: A kjoaixi nga kʼoakitso Niná nga tsín koa̱n chi̱nao tole ngayeje yá xi tjín i̱ ʼndenaxó” (Génesis 3:1).

Je Eva i kitso: “Koaan chi̱naijin je tole yá xi tjín i̱ ʼndenaxó. Tonga xi tʼatsʼe tole yá xi séjna ngabasenle ʼndenaxó i kitso Niná: Alikuijin chinao, alikuijin nikao ánni nga tsín kuiyásíño”. Kʼoa je ye̱ i kitsole Eva: “Likui kuiyáo. Je Niná bení kʼianga je nichxin nga kui chi̱nao tjóxʼángi xkon kʼoa koa̱nngósonño kao Niná, nga jchao xi ndatjín kao xi chʼaotjín”. Je Na̱i énndiso tsakáne Jeobá kʼoa kʼoakitso nga tsín jme xi ndatjín títsjoále je Adán kao Eva (Génesis 3:2-5).

Je Eva koankjainle jme xi kitso je Na̱i. Nga tsabe je tole yá, nʼio kisimekon, kʼoa kuinga kiskoéni kʼoa kiskine. Je Biblia itso: “Kʼoati kitsjoale je xʼinle kʼianga tsabe kʼoa je xʼinbe kʼoati kiskine” (Génesis 3:6).

Nʼiojin ba kisʼe kon Niná nga tsín tsakʼaʼén Adán kao Eva. Kʼoa jmé xi kisʼin je Jeobá. I kitsole je Adán: “Kao ndásjueyali kuichini nioxtila saʼnda nga nangi koa̱nni, nga̱ kui koanndani. Nga̱ chaoní kʼoa chao koa̱nni” (Génesis 3:17-19). Kʼoa kʼoakoan kjoaixi, “je Adán 930 nó tsakʼejna kʼoa xijekoan kʼieen” (Génesis 5:5). Kʼianga kʼien je Adán, alikui ya ngʼajmi ki kʼoa ni xinjinla ki. Kʼianga sʼa kisinda Jeobá chao kisindani, kʼoa chao koan ijngokʼani kʼianga kʼien.

Nga tsín tsakʼaʼénle Niná je Adán kao Eva alikui tichjotatsje koanni kʼoa tsín tikoan tsakationi ngantsjai nichxin. Saʼnda nga kui nichxin chjotajée koan. Tonga nga tsakajngijée kʼoati kisikakinle je ntje̱le. Ya Romanos 5:12 itso: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi”.

Je Biblia kʼoatso nga je kjoabiya yaa mangóson joni jngo najño xi kjijtsa naxinandá (Isaías 25:7). Je najño jebi kʼoati ya mangóson joni je yojbi xi síkiʼaonná ngatsʼiaa. Je Biblia itso: “Xi tʼatsʼe Adán ngatsʼi mʼen” (1 Corintios 15:22). Kʼoati bixoán jokitso pastro Pablo, nga kitso: “Ma̱xónia anbi. ʼYá xi sikʼéjnandaínina yaona xi tsʼe kjoabiyabi” (Romanos 7:24).