Jóʼmi. Jesoaa Niná xi i̱ tso: “Anña Jeobá. Kui jebi jaʼaínna” (Isaías 42:8). Je jaʼaínle Niná ñatola jmi kʼa faʼaitʼa ya Biblia. Tonga nʼio nkjín Biblia xi títjoxinle je jaʼaínle Niná kʼoa to Señor tso xi kisʼejnangajaonile. Je Niná kui xi mele nga miyole koai̱n kʼoa nga si̱chjáin jaʼaínle (Salmo 105:1).

Josʼin bʼaijaʼaínle je Niná. Ya Biblia nkjín koya josʼin ʼyale je Jeobá, jolani, Niná, je Niná xi ngisasa tse nganʼio tjínle, xi kisindaná, Nʼai, Nai kʼoa Niná xi batéxomale ngayeje. Ya Biblia kʼoati tsoya josʼin tsakʼétsʼoale Niná je choʼndale, nga kui jaʼaínle kisikʼaxki̱ kʼoa kʼoati kisichjén sakʼoa josʼin bʼaijaʼaínle (Daniel 9:4).

 Jókji je Niná. Je Niná espírituní kʼoa alikui matsen (Juan 4:24). Je Biblia kʼoatso nga nisaʼyajin xi be jokji je Niná (Juan 1:18). Kʼoati tso nga be Niná jotjín tokoán. Kʼoa jmeni xi nʼia yaa nroani nga nda sʼe kon kʼoa tsa ba male (Salmo 78:40, 41; Proverbios 27:11).

Jókjoan je Niná. Je Niná tongóson sʼin bekon ngatsʼi chjota, alikui kui fini jñani naxinandále kʼoa jña kitjenni (Hechos 10:34, 35). Je Niná kʼoati bakó kjoamatokon, tsejtaní, ñaki kjoatsjoacha kʼoa ñaki kʼoatjín jmeni xi tso (Éxodo 34:6, 7). Kʼoa ño koya xi nʼio ʼyale jokjoan.

Nganʼio. Jéní Niná “xi ngisasa tse nganʼio tjínle”. Jebi kui xi tsonile nga koa̱nle sitjoson ngayeje jmeni xi tso (Génesis 17:1).

Kjoachjine. Jé Niná xi ngisasa nʼio chjine. Kuinga kʼoatsoni je Biblia nga toje “Niná xi tjínle kjoaʼisentakon”, xi tsonile nga nʼio chjine (Romanos 16:27).

Kjoatéxomakixi. Je Niná kui kʼoasʼínntsjai je xi kixi tjín. Je Biblia itso: “Ñaki nda tíjna je xále” kʼoa “ñaki kixiní je” (Deuteronomio 32:4).

Kjoatsjoacha. Je Biblia kʼoatso nga kjoatsjoacha Niná (1 Juan 4:8). Je Niná ñaki bakó je kjoatsjoachale. Jmeni xi sʼín kao kui ʼyañá nga tsjoakená kʼoa nʼio nkjín koya josʼin basenkaoná jebi.

Símiyo je chjota. Nʼio tsjoakená je Niná (Mateo 6:9). Kʼiatsa makjainná xi tʼatsʼe, koaan miyole koaan (Salmo 25:14). Kui xi mele nga kʼoétsʼoalee kʼoa nga kʼoakʼuínlee jmeni xi makjáojinná nga̱ nʼio mandosinle xi tʼatsaan (Santiago 4:8; 1 Pedro 5:7).

Je Jesús ali tsa Ninájin. Jesoaa Niná kisinda je Jesús. Kuinga kʼoatsoni je Biblia nga ʼNdíle Niná ma (Juan 20:31). Nga jekisinda Jeobá je ʼNdítjonle, kʼoati je tsakasenkao nga kisinda ngayeje xi tjín ngʼajmi kao Sonʼnde (Proverbios 8:30, 31; Colosenses 1:15, 16).

Alikuikʼia kʼoakitso Jesús tsa je xi Niná. Tosaa i̱ kitso: “Nga̱ an nía xi tsʼe [Niná]. Jé kisikasénna” (Juan 7:29). Kʼianga tsakjákao jngo chjoón xi kʼoati chjotatjenngile mani,  i kitsole: “Nʼaina, kʼoati je Nʼaino, je Ninána, kʼoati Nináno” (Juan 20:17). Kʼianga kʼien je Jesús, yaa ngʼajmi kisikjaʼáyanile Jeobá, kʼoa yaa ngakixile kisikʼéjna kʼoa kitsjoale kjoatéxoma (Mateo 28:18; Hechos 2:32, 33).

Je Jesús koasenkaoli nga koa̱nchriantʼalai je Niná

Je Jesús kui xá jaʼaini i̱ Sonʼnde nga kitsoya jokjoan je Nʼaile. Jesoaa Jeobá xi i̱ kitso xi tʼatsʼe Jesús: “Jebi ʼndína xi tsjoake̱, tinóʼyalao nga je” (Marcos 9:7). Jé Jesús xi ngisa nda be xi tʼatsʼe Niná. I kitso: “Niʼyajinsa xi be. Tojé xi ʼndí xi be jo kjoan xi Nʼai. Kʼoa be je xi je ʼndí mele nga koa̱kosontsenle” (Lucas 10:22).

Tsakakó jokjoan je Niná. Je Jesús nʼio nda kiskenngile jokjoan je Nʼaile, i kitso: “Je xi tsabena nga an, tsabe Nʼainá” (Juan 14:9). Jmeni xi kitso je Jesús kao jmeni xi kisʼin kao kui tsakakóni nga tsjoake je Nʼaile, kʼoa tsakasenkao chjota nga koanchriantʼale je Niná. I kitso: “An nía xi ndiaa, an nía xi kjoakixi, an nía xi kjoabijnachon. Nitoʼyajin xi faʼaikonle Nʼainá, tsa tsian nga an” (Juan 14:6). Kʼoati i̱ kitsosa: “Je xi ñaki kjoakixi bexkón Niná, skoe̱xkón Nʼainá kao ni̱ma̱le kʼoa kao kjoaʼyaxkón xi ñaki kʼoatjín, nga̱ je Nʼainá kʼoati básjai chjota xi kʼoasʼin skoe̱xkón nga je” (Juan 4:23). Tikjaʼaitsjenlai jebi, jé tíbásjai Jeobá je chjota xi mele skoe̱ jotjínni xi tʼatsʼe.